“ Patao pala glai” di bhum taneh pasei Xuan Loc

Xuân Lộc lac huyện palei pala barau akaok meti di tỉnh Đồng Nai saong dalam taneh ia. Mai Xuan Loc harei ini, trei sir haniem phuan hu  mboh cambaih tapa dom mblang tangei atah, dom bein caphe, amraik kalu praong, dom glai keo lai praong, atah…Dom jak jeng ini hu pren yava rik daong oh lac sit di dom urang nong thau sahneng, thau ngak ngan saong hatai caong khin tabiak truh eik lipa, kathaot rambah. Rilo urang nong jeng Tỷ phú. Dom urang nan daok hu bhapbini dalam saong langiu tỉnh ieu meng dom angan ye “Patao tangei”, « Patao amraik kalu”, « Patao pala glai”…Dalikan ala ini di urang pambuak bruk Đình Hưng yaih khan ka “ Patao pala glai “ - Hồ Tư Sơn:

 Meng Bình Định tame bhum taneh Xuân Hòa, Xuân Lộc ngak mbang hu jaik 40 thun, ông Hồ Sơn Tư padang mbang ngui meng dua plak tangin saoh. Meng hu hatai kham merat, tari taring, urak ini ông hu labaih 30 hecta dom janih phun pala hu yaom glaong yau : pa-ok cuah Hòa Lộc, keo lai, cao su… Langiu di nan, ong daok pala 185 hécta keo lai di tỉnh Bình Thuận piah pabak kayau tamo ka xưởng mộc di sang drei. Xưởng mộc lac labik langyah jalan tabiak ka nguyen liệu glai saong ba bruk ngak ka 80 urang ngak di puk palei ngan saong yaom jien mek tame 8 triệu đồng/sa urang/ sa bilan. Bruk ngak mbang ini hu ba mai ka sang ông yaok thun dom pluh tỷ đồng. Yau nan ye, ông hu mikva dalam bhum ieu lac “ Pataopala glai” . “Patao pala glai” Hồ Sơn Tư brei thau : Đảng, karja, urang jakar palei daong biak rilo. Yaom lac oh daong meng jien padai min daong meng hatai, daong tacei jalan ngak. Tacei pato drei ngak kinh te, tacei pato dom alamu, dom jalan ngak ka sang drei. Gam saong bruk kham merat di drei meng hu jak jeng yau harei ini”

Tuk hu ginup meda, ông Tư caik rilo tukvak jang piah daong ka urang kathaot di puk palei. Ông brei ka bhapbini dalam xã nyim limo pajaih nao raong, tuk halei limo menek anek ye bayar veik limo pajaih piah ông brei ka sang karei nyim bo oh mek jien laba halei. Meng jalan ngak ini, dalam 5 thun tapa, ông hu daong ka labaih 40 sang kathaot dalam palei tabiak truh kathaot. Langiu di nan, ông daok nao tal dom sang kan kandah hu anek daok bac piah duah jalan daong. Yau nan ye, langiu angan “Pô plaa glai” ông daok hu bhapbini ieu lac “ “Ong Tư pachreih bac”.

Oh lac yau nan saoh, pachreih tui bruk padang ngak palei pala barau di xã Xuân Hòa, ông daok rik daong jaik 600 triệu đồng saong brei labaih 3 rabau  m² taneh. Ngak pahla rilo, rik daong padang ngak palei pala barau jeng oh takik, min ông tok hu sa caong khin lac pasiam raidiuk di bhapbini saong pambuak haong puk palei peih ngak siam danakdak bruk ngak negar padang ngak palei pala barau. Ông Lê Hữu Thiện, Phó akaok thường trực Kapul urang nong tỉnh Đồng Nai ndom ka ông Hồ Sơn Tư yau ini: “Xuân Lộc lac sa dalam dom huyện nao dahlau, hu rilo điển hình, hu rilo sang urang nong ngak mbang naih joi hu alin harak meyaom di Thủ tướng rajaei. Hu dom sang meng kathaot yam tagok jeng sang ngak mbang joi yau ông Hồ Sơn Tư daok di xã Xuân Hòa, ini lac sa sang urang nong nao dahlau dalam bruk pala glai jeng ye ngak mbang pablei salih. Abih di nyu nan lac kham merat hu mbaok tame bruk padang ngak palei pala barau”.

Khang hatai saong jak jeng dalam bruk ngak mbang pablei salih gam saong hatai caong daong ka bhapbini, ông Hồ Sơn Tư hu maong lac sa urang hadah trah di dom urang nong urak ini. Ông hu Trung ương kapul urang nong Việt Nam taong yaom glaong ka jalan ngak mbang barau. Thun 2014, ông hu Thủ tướng rajaei alin harak meyaom kayua dom thành tích dalam padang ngak palei pala barau saong hu Trung ương kapul urang nong  Việt Nam brei angan lac “ urang nong Việt Nam hadah trah”./.