Di nyaom biai pataom iek veik bruk pabak điện palei pala, bhum ceik song palao kaoh tuk vak 2016-2020, Mintri Công Thương brei thau: điện khí hóa palei pala lac sa dalam dom jak jeng prong di Việt Nam, Urak ni hu pabak  điện ka labaih 17 triệu boh sang palei pala,bhum atah bayah, bhum tapen negar, palao kaoh; uerak ni dok labaih  0,74% boh sang palei pala oh ka hu điện. Jalan ngak dalam tuk vak 2021-2025 hu ba điện ka tong abih dom boh sang palei pala, song phun jien buh tabiak  dok kurang labaih 26.000 tỷ đồng.

Mintri jalan mbak pajeng ba brei thau, danak dak peih praong, pasiam jalan nduac samar TPHCM - Long Thành - Dầu Giây saong buh jien tame padang ngak jalan nduac samar Đồng Nai - Lâm Đồng daok hu jhul samar. Tapa pasang iek, tal thun 2025, labik meng canah jalan An Phú tal canah jalan Long Thành njauk peih praong tagok 8 jalan radaih. Mintri jalan mbak pajeng ba jao ka Ban khik ramik danak dak Thăng Long ngak harak pathau khan piah caga ka bruk buh jien tame ngak, tui kuhria hu peih ngak dalam tukvak 2021-2025.     

  Hadei di tuk vak ngak iek, Sở jalan mbak pajeng ba TPHCM hu harak likau UBND TP brei peih bruk sarong hareik angaok krong meng công nghệ bahrau di labik krong Vàm Thuật - Trường Đai - Tham Lương (labik meng krong Sài Gòn tal labik công nghiệp Tân Bình). Pok jien peih ngak dalam 10 bilan, meng bilan 3 tal bilan 12-2021, tui kuhria labaih  13 tỉ đồng. Urak ni, jalan krong ni hu njam baok, hareik pandar tathuak tabiak rilo, hu rilo labik pacang sre jalan ia nduac ngak kan bruk nao mai angaok krong  song nerak môi trường, nan ye patagok bruk srong mek hareik hu tong yaom lac bruk njauk ngak.

Tui Báo Pháp luật TPHCM, dah page 15/1, Cục khik ramik taong ruak (Mintri Y tế) hu tabiak harak payua tal dom sang iek ruak daok caik rah tabiak bruk njuk pakao dalam mblang bein di sang iek ruak. Tui nan, ieu kakei dom sang iek ruak brei thau bruk pakauk njuk pakao, oh blei adat pablei salih, yaih khan pakao dalam labik sang iek ruak. Langiu di nan, dom sang iek ruak oh hu taduan paok jien daong di dom công ty pakao atau dom kapul pambuak tal tui dom jalan halei; ba asal kadha oh brei njuk pakao tame asal kadha pacacah di urang jaka, urang ngak dalam sang iek ruak.

Mesup ni (15/1), Đồn Biên phòng Ba Sơn (huyện Cao Lộc, tỉnh Lạng Sơn) hu ngak harak, jao urang tame suan hukum ka gah y tế piah brei daok pa-atah, pacang caga jit Covid-19. Tong abih 7 urang Việt Nam jeng khan lac nao suan hukum tapa Trung Quốc tui jalan sit tapen negar piah ngak mbang pah . Tal harei  15/1, dom urang ni nduac dauk tapa jalan sit mai veik Việt Nam.

Tổng thống hu pilih ruah di Mỹ lac Joe Biden bahrau brei thau paok jien daong Covid-19  yaom 1.900 tỷ đô-la piah daong kinh tế ka bhap bini Mỹ saong dom doanh nghiệp, abih di nyu nan lac pamaong tal bruk klauk hu 100 triệu mbang jru vaccine di harei puac abih dalam 100 harei camriep ông Biden tagok rai. Paok jien daong jeng hu peih praong dom danak dak daong lahik bruk, patagok yaom jien daong lahik bruk liên bang meng 300 đô-la tagok 400 đô-la yaok adit saong dui atah tal puac bilan 9.

Nyaom urang ilamu dunya di Gah Y tế dunya (WHO) hu nao tal ban  Vũ Hán, tỉnh Hồ Bắc, Trung Quốc piah peih bruk duah thau ka asal di jit prong  Covid-19. Dahlau di tuk tagok kapan haoh meng Singapore tal Trung Quốc, 2 dalam 15 urang hu duh iek mboh dương tính. Dom urang ilamu dok veik brei dok karei 2 adit jang yau duh iek Covid-19 song tui kuhria meda ngak bruk song dom urang ilamu Trung Quốc tapa video dalam tuk vak brei dok karei.

Magei taneh khang 6,2 độ rahtabiak di pulao Sulawesi di Indonesia harei ni, ngak ka 7 uảng metai saong yaok rituh uảng njauk rambuac, yaok ribau bhap bini njauk panduan tabiak truh labik nan. Dom maong dahlau di nan, sa mbang magei baoh taneh khang 5,9 độ jeng rahtabiak di labik nan. Dom mbang magei baoh taneh daok ngak brei kan kandah jang dalam bruk pacang caga dom bala di Indonesia, tuk negar ni bahrau rahtabiak 2 mbang jaleih taneh di tỉnh Tây Java melam 9/1, ngak ka takik di nyu 11 urang metai saong rilo urang karei lahik./.

Urang lang: Thu Thảo & H.Pha  15/1/2021 16:07:16