Urang Raglai ngak apuh di xã Phước Thành, H. Bác Aí

Nde an Danak dak pakat negar ka patagok bruk kinh te -xa hoi bhum urang bangsa takik saong bhum ceik tukvak 2021-2030 meda daong jhul bruk kinh te - xa hoi di bhum urang bangsa takik saong bhum ceik patagok samar, khang kajap; ba bruk ngak mbang, patagok jien mek tame ka bhap bini; langyah hu siam jang dom suh sah di bhap bini. Min tui Phaok Akok Quốc hội Phùng Quốc Hiển, dom bruk pamaong ngak njauk brei mboh cambaih bruk peih ngak Danak dak piah salih birau dom hagiat: Salih birau raidiuk, jien mek tame, kinh te atau xa hoi…di bhum urang bangsa takik?

  “Dahlak sahaneng, dahlau di abih khol drei brei pataom phun jien, prein yava saong akaok sahaneng di taong abih he thong chinh tri di khol drei piah ngak ka bahu danak dak ini. Rilo tuk khol drei ba tabiak bruk praong min oh pataom hu prein khang brei ka nyu, nan ye kan si ngak hu. Saong, brei tame tapak bruk urak ini daok biar abih dalam tuk khol drei peih ngak dalam dom thun tapa.” 

Dalam mbang ginum biai di Tổ, ralo urang QH njauk hatai saong Harak khan di Rajaei saong Harak pathau khan taong yaom di Hội đồng bangsa. Min, piah peih ngak danak dak hu siam lagaih, njauk pasang iek veik dom danak dak, plaih bruk kateik angaok gauk, ngak palai pajoa saong bruk daong oh njauk manuac urang. Phaok Akok Quốc hội Uông Chu Lưu taong yaom lac:

“Palih ruah kadha hagait, nyaom kadha hagait piah ba tame dalam nyaom nde an di Quoc hoi ye dahlak sahaneng brei ginum biai ka tantu cambai laic saong tani tanat, tui jalan lac gam buh jien tame ngak min gam daong ngak, saong brei ieu pataom abih prein khang di abih gah, pambuak saong bruk cak rok khang kajap, an ninh quốc phòng, pambuak saong bruk ngak po bhum taphia negar.”

Langiu bruk ba tabiak tanut parabha bhum urang bangsa takik bhum ceik tui ilamu patagok, Rajaei saong dom jabat  chuyen mon njauk brei parabha ngan saong urang mbang tui, GS.TS Trần Trí Dõi, Yam ndoc Pasak roh duah cak rok patagok bangsa saong bhum ceik, lac:

“Urang bangsa takik brei ngak po ka bruk patruh kathaot saong Rajaei lac urang daong min bruk ngak hu siam lagaih halei oh nan daok pak khol drei daong brei njauk urang njauk bruk halei oh?”

Meng bruk caong buh jien tame ngak biak praong dalam tuk phun jien jeng yau prein ngak oh ka pabak hu, dom urang QH caong khin Rajaei kuhri kuhria tani tanat dom bruk njauk ngak chip, brei palih ruah bruk praong njauk ngak gam saong dom jalan ngak lagaih haong yaok tukvak, ba mai kein laba glong di abih. Ong Đặng Ngọc Nghĩa, urang lambaok Kapol urang QH tỉnh Thừa Thiên - Huế sahaneng lac  “njauk brei sanya meng nguon luc”:

“Danak dak ye mboh lagiah, phun jien praong, min yaok thun ba hu hadom ye khol drei oh hu jalan pacap ngak catang, dom rituh rabau tỷ jien ye ngak habar ini? Brei khik yau habar, kadung jien ye oh hu, buh jien tame ngak brai rai, buh jien tame ngak jalan oh siam ye sa mbang ribuk tuh trun ba theik ye ngak habar? Pataom tame ka do tỉnh halei dahlau? Meyah oh ngak yau nan, ye brei ngak pataom veik, dahlak huac di abih lac phun jien oh tal.”

Meng var ngak bruk ini jeng yau dom asar kadha di bruk karei di mbang ginum biai, meda mboh lac, tukvak tapa, Quoc hoi biak sang ka tal sarak bangsa. Oh ka hu Quoc hoi mbang halei tabiak rilo bruk praong pambuak pagam tal sarak bangsa yau Quoc hoi mbang 14./.

Urang lang: Aí Nghiêm - 15/6/2020