Pabui jhuk meng livik mai hu thau tal lac athur raong hu ralow bingi, hu rilo menuac takre mbang. Pabui jhuk Thuận Bắc hu Cục sở hữu trí tuệ chứng nhận nhãn hiệu tập thể. Ini lac bruk mbuan lagaih piah padang angan, jeng ye pablei salih di darak pasar. Kayua lac tuk hu angan, urang blei mbang jeng mboh sahanang hatai. Min ngan saong bhap bini Raglai  di xã Lợi Hải, huyện Thuận Bắc, meng rilo thun ini mai, bruk raong pabui jhuk daok sit sot nan ye oh ka ba mai kein laba glaong. Meng hatai sahneng, cakrok patagok kinh tế meng angan pabui jhuk di palei; ngak habar ba hu bruk ngak ka rilo dam dara Raglai, thun 2017 anh Patau Asah Quốc hu jak ba dam dara urang đoàn dalam palei rik pataom phun jien piah raong pabui jhuk.

Sa-ai Patau Asah Quốc, Bí thư xã Đoàn Lợi Hải, h.Thuận Bắc, t.Ninh Thuận lac: Dahlak mboh mikva Raglai drei jeng raong pabui jhuk rilo. Saong darak pasar jeng blei biak rilo. Min dahlak mboh lac mikva Raglai drei raong takik lô. Dahlak sahneng drei njauk raong iek. Drei raong praong piah pablei hu yaom glaong. Drei ngak piah pachreih mikva ngak tui. Meng nan duah labik pablei tani tanat ka mikva.

Tuk camereip, yaok urang dalam kapul rik tame  500 ribau đồng, blei 4 drei pabui binai, 10 drei pabui jhuk. Meng tari taring bac megru saong iek glang siam mekre nan ye tapon pabui jhuk di kapul tagok hu jaik 50 drei. Sa-ai Quốc caik 20 drei raong di sang piah palagaih ka dam dara dalam palei mai iek, bac megru, daok 30 drei sa-ai ba nao raong di lingiu puh. Sa-ai Patau Asáh Quốc brei thau lac bruk raong pabui jhuk biak mbuan, pandap mbang ka nyu rilo meng lac phun patei, njam puan, phun njam baok nan ye ralow pabui bingi, menuac blei rilo, oh lac dalam tỉnh saoh bo daok hu dom tỉnh gah meraong duah blei. Bruk njauk biai nan lac, janih pabui ini hu pren khang pacang caga ruak saong ralow nyu catang nan ye hu rilo menuac takre. Sa-ai Patau Asah Quốc daok brei thau lac: Tuk dahlak raong hu laba ye rilo mikva karei dalam palei jeng raong tui. Dahlau daih, mikva raong 3-4 drei min. Urak ini, mikva raong rilo saong pablei jeng hu yaom jang dahlau.

Padang mbang ngui meng raong pabui jhuk di sa-ai hu pachreih daong ka rilo dam dara urang đoàn dalam xã khang hatai buh jien tabiak raong pabui jhuk piah patruh kathaot.Oh lac ngak kinh tế joi, sa-ai Patau Asah Quốc daok lac sa urang jakar Đoàn sami samar, halan hatian, sa-ai bhian pathau khan, pato tacei, jak ba dam dara urang đoàn abih drei buh pren ka bruk xã hội, abih di nyu nan lac palei daok peih ngak danak dak bruk ngak negar ka padang ngak palei pala bahrau. Sa-ai Katơr Minh, xã Lợi Hải, huyện Thuận Bắc, tỉnh Ninh Thuận lac: "Dahlak mboh sa-ai Quốc raong pabui jhuk biak siam. Tapa nan hu jalan piah cakrok, patagok. Meng nan, rilo mikva dalam palei jeng bac megru tui. Bruk ngak nan hu peih tabiak jalan ka dam dara dalam palei ba gauk patagok bruk ngak mbang, kinh tế.”

Lac Bí thư xã đoàn, dalam dom mbang sinh hoạt, sa-ai Patau Asah Quốc bhian pablak bruk ngak di Đoàn haong bruk pachreih ba, tacei pato urang đoàn kham merat patagok kinh tế saong hu daong ka yaok pluh dam dara urang đoàn dalam palei padang mbang ngui tapa bruk raong glang, pala drak. Meng dom rik daong ka bruk ngak di đoàn saong bruk patagok kinh tế di palei, sa-ai Patau Asah Quốc hu taduan rilo harak meyaom di Đoàn pakat angaok saong pakat ủy, karja palei. Sa-ai Phạm Cao Thuận, Phó Bí thư huyện đoàn Thuận Bắc, t.Ninh Thuận khan lac: Ngan saong bruk patagok pabui jhuk di sa-ai Quốc meng tuk padang tabiak tal urak ini jeng hu 1 năm. Bruk ini jeng hu kein laba rilo. Hatai sahneng di sa-ai Quốc ka bruk raong pabui jhuk, urak ini di Thuận Bắc hu jeng bruk raong pabui jhuk. Saong pabui jhuk Thuận Bắc jeng hu chứng nhận thương hiệu di Sở Khoa học saong Công nghệ. Sa-ai Quốc hu pataom dam dara piah pambak praong bruk ngak ini. Meng nan, padang kalup kapul ngak kinh tế xã drei dak harei dak tagok khang jang.

Meng sami samar, tari taring, sahneng duah, kham merat ngak di umo daok dam, sa-ai Patau Asah Quốc lac sa kreih camin hadah ka bruk padang mbang ngui, lac pren pachreih ba dom urang đoàn dalam palei bac megru, ngak tui./.