Urang patruh kathaot meng bruk pala drak 

Saai Cao Xuân Lực song haduik lac saai Cao Thị Liên daok di palei  Ón bahrau pablei kayau keo hu  50 triệu đồng hu ginum gauk vak harak likau tabiak truh kan kathaot. Saai Lực bui sambai lac: “Tuk bahrau tabiak daok karei ye kan kandah lo, khol dahlak hu karja sangka dong, ba tame angan boh sang kan kathaot, duik pasang tari tarieng ngak bruk padang hu 3ha glai pala, urak ni, yaok thun rong  5 drei kubao, limo , 3 drei pabui. Yau nan, dut song mik va bangsa Rục di dalam palei ye oh meda lac drei kan, yau nan ye, hulin vak harak likau tabiak truh kan kathaot . Pablei kayau keo duah hu 50 triệu đồng bo daok mbang tui sarak boh sang kan kathaot  ye mboh melau rup eng”.

Jalan ngak hadei di tuk tabiak truh kan kathaot hu saai Liên ba tabiak cambaih laih: “Tabiak truh kan kathaot ye brei kham merat yam tagok, meyah lah ngak bruk bloh laik tame kathaot veik oh dok mbaok meta halei mong iek mik va dalam palei. Kayua yau nan ye, bo duik pasang dahlak hu padang danak dak patagok rai duik, mesraiy jien gilang pariak ngak mbang piah kinh tế ginup meda jang, hu bruk ngak mbang piah hu jien brei ka anek bhik bac daa siam jang song dong ka dom urang kathaot ”.

Saai Trần Xuân Vinh jeng dok di palei Ón jeng hu vak harak tabiak truh boh sang kathaot, saai lac: “Dahlau deih hulinraong amaik ame taha, rai duik oh tani tanat meng puh angaok ceik patau chu. Hu dong brei mesre, urak ni hulin hu glai pala, rong pabui, menuh, kubao , limo song padang hu sang kiak khang kajap, nan ye hulin vak harak likau tabiak truh boh sang kan kathaot piah dam dara dalam palei bac megru ngak tui ”. 

Daok dalam palei Cha Cáp xã Trong Hóa hu ong Hồ Đon (umo 60 thun) luh sa gah tangin jeng bahrau vak harak likau tabiak truh  boh sang kathaot. Saai Phạm Văn Bắc, Phó Chủ tịch UBND xã, khan lac “Ong Hồ Đon yaom lac luh sa gah tangin, min ghieh pak dom pandap dalam palei yau talam lisei, pandap tong chap ikan. Yaok bilan ong  Hồ Đon duah hu labaih  3 triệu đồng, di palei ini duah hu jien yau nan, lac labaih ye, nan ye ong lac tabiak truh kathaot piah brei ka sang karei, duah hu jien ye bo dok lac kathaot  iek oh jeng”.

Ong Hồ Ta Long (umo 63 thun) daok di palei Tà Vờng, bhian trun bhum taneran  blei pandap tagok bhum ceik pablei veik ka mik va  dalam palei, tui nan bo rai duik hu ginup meda jang.

Ong brei thau “Ngan song hulin, tabiak truh kathaot lac  bruk ngak oh lac thành tích. Boh sang  3 urang, drei kham merat ngak mbang, sang hu karja ngak, brei anek pajaih rilo thun, brei taneh ngak glai, urak ni lac kathaot mboh melau song ayut sahabah  . Drei pablei salih hu bo dok dalam boh sang sarak karja ye oh urang halei ma in hong drei Njauk patruh kathaot piah dok pablei salih rilo jang tra, jhui padeih di tanut kathaot jeng oh tagok hu”. 

Di palei Ông Tú, Bí thư chi bộ Hồ Chui song akaok palei  Hồ Đăm jak gauk tabiak truh kathaot tui jalan lac: “Drei ngak urang jakar, hu tangin takai, hu pren ngak bruk, pala glai, jak ba puk palei jum pataom khik iek glai tamo, drei oh nao dahlau dalam bruk patruh kathaot, mik va mong iek meteh meta. Yau nan ye khol drei tabiak truh kathaot, kayua brah hu mbang anek taco hu bac daa, duah hu jien oh rilo min tani tanat ye tabiak truh kathaot”. Meng dom bruk ngak siam nan hu dong jhul samar bruk patruh iek patrun kathaot di  huyện bhum ceik  huyện Minh Hóa./.

Urang lang: Hanipha- 17/2