Urak ini sang kathaot pak xã Phan Thanh daok takik, jaik 3%. Min dom sang kathaot ralo meng lac sang kurang taneh ngak nong pala drak. Sang sa-ai Đặng Kha Ly lac sa dalam dom sang nan. Dua diuk pasang sa-ai Ly khin gauk hu 8 thun, hu 3 urang anek min dalam sang hu 5 cambuai mbang tok caong tame jien ngak thợ cakak mbuk di sa-ai. Sang dahlak amaik ame gah diuk jeng ye amaik ame di dahlak oh thei hu taneh pala drak. Khin gauk blaoh dahlak nao ngak thợ cakak mbuk, diuk daok di sang khik anek. Dahlak cakak mbuk harei hu harei oh, anek bhik ruak hakik oh hu jien padai, glaih glar ralo.

Jeng kayua oh hu taneh piah pala drak nan ye sa-ai Lư Thanh Tuyền daok di palei Mai Lãnh njauk klaak palei tame bal Phan Thiết ngak mbang duah jien. Dua urang anek sit sa-ai payua ka ong amuk. Tuk halei hu padeih sa-ai meng nao rivang anek. Sa-ai Tuyền brei thau, oh thei khin nao atah anek min kayua candaih mbang nan ye sa-ai njauk ngak yau nan. Rambah ralo! Kham merat ngak ralo bruk thei pah hagait drei ngak nan, rao panjin tathak jaluk dalam quán mbang… jien ngak hu jeng ginup piah raong anek min tuk ruak kik  pandik harao ye oh ginup.

Piah langyah bruk kurang taneh ka dom sang mikva urang Cam, tỉnh Bình Thuận hu Chị thị 04 ba brei taneh ka mikva. Min sarak ini oh ka ba mai siam mekre kayua tui ong Lư Hán akaok palei Mai Lãnh ye taneh ba brei ka mikva nan nyu thu lagu, daok pak labik atah bayah nao mai kan kan kandah. Yaok vụ ngak bloh mikva daok laba oh hu hadom. Meng blaoh UB bhap bani tỉnh jeng brei taneh 04 min daok atah lô  labaih 20km, taneh bak randaih patau,  jalan mbak nao mai atah bayah. Pala drak oh lagaih, bhian njauk khat lihik, mikva ralo meng pala tangeiy, pala lange, langik tasik siam lagaih ye hu mbang, daok oh laghaih ye njauk tavak sre.

Hu daong brei taneh pala drak min bruk ngak mbang kinh tế di sang sa-ai Trần Thị Thanh daok pak palei Mai Lãnh jeng oh ka hu ralo salih bahrau. Sang sa-ai Thanh hu tal 1,5 mẫu taneh min yaok thun jeng oh ginup mbang. Dom urang anek di sa-ai umo 15, 16 thun njauk nao ngak apah. Sa-ai Thanh brei thau, taneh thu lagu daok njauk pandiak bhang. Nan ye dua diuk pasang sa-ai ngak harei ngak melam jeng oh ginup ka 6 cambuai mbang. Puh taneh 04 ngak 3,4 thun ini mai oh mek hu hagait patih tangin. Dom urang anek nao ngak apah tok ginup raong rup nyu lavik lavik meng payua mai ka amaik, njauk nao ngak apah piah duah mbang tapa harei.

Jeng hu daong brei labaih 2 hecta taneh apuh min sang sa-ai Lư Văn Biên daok pak palei Cảnh Diễn jeng daok dalam kan kandah. Yaom lac taneh riya ralo min thu lagu oh hu aia, thun halei njauk tua riya pandiak bhang dui atah ye patih tangin. “Ngak ralo min yaom padai oh tagok meyah ngak joi ginup phun, ngak khat min jeng ngak, kayua oh ngak  ye thau ngak hagait  ini…”

Klau thun ini mai, sang kathaot di xã Phan Thanh jeng dang veik di tanut 3% bo oh trun jang. Kayua lingiu di bruk lac taneh thu lagu, ralo randaih patau bo Phan Thanh daok lac sa dalam dom labik hu tua riya pandiak bhang dui atah. Ong Đặng Phúc Chính, Phaok Bí thư Đảng ủy xã Phan Thanh brei thau: Bhap bani xã Phan Thanh ralo meng ngak nong, pala padai sa thun 3 vụ min vụ đông xuân kayua langik pandiak bhang dom mblang hamu bhian padeih ngak kayua kurang aia, nan ye xã Phan Thanh jeng daok duh hatai ka bruk ini.

Yaok thun ngak 3 vụ padai min meyah tua riya pandiak bhang ye mikva meda patih tangin. Kayua yau nan ye, xã jeng hu ba tabiak ralo jalan ngak yau padang ngak dom ribaong dalam mblang hamu piah khik ia atau ba dom janih phun pala diuk hu dalam pandiak bhang piah ba tame pala daong ka mikva patrun dom kan ndah bo mikva daok gaok./.