Tỉnh Kiên Giang padang dom kapul nao ravang, tadhau ayuh tết, alin hadiah pandap brei ka dom ong bhik, urang phật tử

Patui bruk menuac ngak di mbang nyaom ka 11 QH mbang 14, mesup ini, QH hu pok ong Trần Sỹ Thanh ngak Tổng kiểm toán karja; ong Bùi Văn Cường ngak TTK QH saong pilih ruah, pok ngak Chủ nhiệm dom UB di QH. Dalam biar harei ini, Thủ tướng rajaei Phạm Minh Chính ba tabiak harak dom angan piah QH pasang iek, brei adat pok ngak dom Phó Thủ tướng rajaei, dom akaok mintri saong dom urang karei di rajaei.

Mintri Công an brei thau kuhria tal urak ni, công an 63 tỉnh, ban pataom hu labaih 15 triệu harak căn cước bhap bini pagam chip. Dom tỉnh ban hu peih ngak siam, yam tapa tanut ba tabiak yau Hà Nội, Thanh Hóa, Hải Dương, Thái Bình, Nam Định, Đắk Nông, Bình Phước… Min, dom tỉnh hu rilo xã, ban sit lac bhum tapen negar, bhum atah bayah oh ka hu riyak điện thoại, kan kandah ka bruk duah thau, ba tame cơ sở dữ liệu pakat negar ka rahra. Dom mik va urang bangsa takik oh thau sap Yuan, ngak kan kandah dalam tuk ngak harak gar

Harei ini (7/4), Tỉnh uỷ, HĐND, UBND, UBMTTQ VN tỉnh Kiên Giang padang dom kapul nao ravang, tadhau ayuh tết, alin hadiah pandap brei ka dom ong bhik, urang phật tử daok di 21 baha Phật giáo Nam tông haong 40 sang sarak karja urang bangsa Khmer daok dalam tỉnh di tuk urang harei Chôl Chhnăm Thmây. Dahlau di nan, mBan Dân tộc tỉnh Kiên Giang hu tadhau ayuh tết, alin hadiah pandap brei ka 2 baoh baha, 1 sang bac bangsa gam bac gam daok saong 30 sang urang bangsa takik hadah krah tui uỷ quyền di UB bangsa. Tỉnh jeng hu kaoh tabiak meng kadung jien karja labaih 700 triệu đồng daong brei ka labaih 2.300 sang kathaot lac urang Khmer.

Mesup ni, pagam tal bruk mesruh pacang, peih prong chuyên án 920G, Công an tỉnh Đồng Nai pambuak bruk song Cục Cảnh sát hình sự song dom jabat nghiệp vụ mintri Công an, Công an TPHCM song công an dom tỉnh: Lâm Đồng. Bà Rịa - Vũng Tàu, Bình Phước pasang iek 9 labik lac jabat di công ty, sang dok song dom labik pablei xăng di Cty CP Nhiên liệu Phúc Lâm. Doanh nghiệp ni hu jabat di quận 7, TPHCM ngan song phun jien labaih 153 tỷ đồng, kayua ong Trần Huy Lập ngak Tong Yam ndok. Urak ni Chuyên án 920G dok hu pasang iek peih prong.

CA tỉnh An Giang mesup ini brei thau, kapul pambuak gauk di dom gah pacang pablei salih pandap pakauk di tapen negar bahrau mboh, cap khik 4 urang Trung Quốc daok duah jalan nao tapa Campuchia suan hukum. Dom urang nan khan lac, kayua oh hu bruk ngak nan ye tame Việt Nam suan hukum meng jalan sit di pabah mbang negar gah barak harei 27/3, haong hatai caong duah jalan tapa Campuchia piah duah bruk ngak. Hadei di nan, nao meng radaih ôtô meng gah barak tame gah meraong negar. Urak ini 4 urang Trung Quốc daok hu brei daok karei. Bruk nan daok hu pasang iek, ngak brei cambaih laih.

Tổng thống Joe Biden khan lac, negar Mỹ meda ngak salah bruk klauk vắc xin pacang Covid-19 ka tong abih urang ginup pren klauk dahlau di harei 19/4, avar jang 2 adit dut song bruk batabiak. Yaom lac, jit ruak dak harei dak hu pasang iek, min Tổng thống Biden jeng dok hu panuac kakei lac, negar Mỹ ka oh jayah hu jit ruak, ieu bhap bini patui ngak dom bruk khik caga salamat. Urang njom bahrau Covid-19 di Mỹ dok patagok, abih di nyu nan lac dom urang njom anek ruak bahrau. Tui kuhria dalam 7 harei tapa, yaok harei hu 61 ribau urang njom bahrau, tagok 10% dut song vaktu dahlau.

Dalam sa adit tapa, taneh ia Guinea di Tây Phi hu gilac 5 urang njom bahrau virút Ebola saong 3 urang metai. Kuhria tal harei ini, di bhum taneh ini hu abih tih 35 urang njom Ebola, dalam nan hu 18 urang metai. Cộng hòa Dân chủ Công-gô hu 12 urang njom saong 6 urang metai. Jit Ebola tamuh veik meda ngak brei kan kandah jang ka dom bruk y tế di taneh ia hu 12 triệu menuac daok mesruh haong jit praong Covid-19. Hu thau, mbang tamuh jie Ebola meng thun 2013 tal thun 2016 ngak brei 11.300 urang metai. 

Facebook harei kabroi brei thau, bruk rò rỉ dữ liệu hu pathau khan jiak di ni gaok tal 530 triệu urang pandar meda kayua bruk pandar suan sa tính năng di thun 2019. Labik ba tal bruk rò rỉ dữ liệu ni dahlau daih hu tacei tabiak song Facebook hu duah jalan pasiam veik di tuk nan. Facebook langyah lac, tội phạm mạng mek hu dom dữ liệu dahlau di bilan 9/2019 meng bruk duah thau hồ sơ di urang pandar. Facebook ndom lac, ni lac dom dữ liệu klak, hu ba tagok meng thun 2019 song hãng công nghệ ni samar mboh song yah klaak./.

Urang lang: Hani Pha – Thu Thảo – 07/04 16:56:44