Rilo urang Qh hu mbaok pak di labik piah ginum biai

Patui danak dak mbang nyaom ka 11, mesup ini (30/03) dom urang QH ginum biai di hội trường ka dom Patahu khan bruk ngak tukvak 2016-2021 di Tòa án bhap bini pakat glaong di abih, Viện kiểm sát bhap bini pakat glaong di abih. Dalam vaktu tapa, tòa án hu pasang iek, duah thau labaih 2 triệu bruk, langyah hu 97%. Dom bản án njauk klaak, njauk pasiam veik kayua sahneng oh tal yaok thun jeng trun 1,5%, mek hu tanut ba tabiak tui Sarak di QH. Tòa án jeng hu peih bruk langyah labaih 7 rabau dom vụ án tham nhũng, kinh tế biak praong, biak kan kandah, trak damak, saong kaoh duas biak njuak haong bruk ngak suan.

Pathau khan pataom iek veik bruk ngak dalam vaktu mbang 14 di Viện Kiểm sát bhap bi pakat glaong di abih jeng brei thau, dalam vaktu Quốc hội mbang 14, hu khởi tố rilo bruk ngak suan gah khik ramik kinh tế rah tabiak di gah jien padai – gilang pariak, đầu tư công ba tal khat lahik biak trak. Gah Kiểm sát hu ba tabiak khởi tố labaih 375 bruk hình sự. Dom bruk khởi tố suan, oh njauk biak takik, trun tui yaok thun saong trun 52% duk saong vaktu QH mbang 13. Abih di nyu nan lac, samar langyah catang, khik kajap tui bruk chính trị, njauk adat hukum dom vụ án gah tham nhũng, kinh tế praong.

Mon sa kreh melam blaoh, pui khuah tagok pak di pabah mbang tame tabiak di boh sang pakat 4 angaok jalan Nguyễn Thị Định, ban  Thủ Đức, kayua ong Lục Kiến Tâm, umo 54 thun, ngak po sang. Tuk nan, ong Tâm dok ndih di gah langiu, gam song rilo urang daok jaik taphia ieu preo padam pui min oh hu.. 50 urang lin pandam pui, 4 radeih pandam pui song rilo  radeih cứu thương mai dong. Tuk peih hu pabah mbang, cảnh sát mboh 6 urang dalam sang ong Tâm metai, nan lac: haduik  (umo 52 thun), anek metau kamei (24 thun , 2 urang anek  (meng 25-27 thun), taco nội (7 thun), taco ngoại (sa thun). Di pak nan tuk mon  7, labik jalan tame sang khuah , pak di takai tatua Mỹ Thuỷ, daok hu pacang caga veik .

Tỉnh Cà Mau hu labaih 43.000 ha rglai glam mbuan khuah tuk bilan thu tal mai. Dom glai nan rilo meng daok dalam huyện Trần Văn Thời haong U Minh. Piah caga pacang khuah, padam khuah glai, meng akaok bilan thu, Chi cục Kiểm lâm tỉnh Cà Mau hu pambuak bruk haong gah công an, dom puk palei peih pato pasram pacang khuah padam khuah glai thun 2021 ka rilo jabat, kapul nyaom, po glai. Bruk pataom bhap bini piah brei thau bruk ngak di drei, mbaoh tangin sanya pambuak bruk khik caga glai, pacang khuah padam khuah glai hu samar peih tabiak piah ka bhap bini, dom gah ba tangin tame ngak.

Harei kabroi (29/3), hadei di tuk nghị án dui atah, Hội đồng xét xử Tòa án bhap bini tỉnh Bình Dương hu kaoh duas  muk Trương Thị Cao Thảo (umo 35 thun, di  phường Phú Thọ, ban sit  Thủ Dầu Một, tỉnh Bình Dương) dok guk abih rai  ka duas pasot meblah mek drap ar. Hội đồng xét xử ndom lac, bruk ngak di muk Thảo lac biak trak Muk padang tagok  bruk duah jien biak mbuan  meng bruk pablei salih tanyiah, hadei di nan pachot urang buh jien tame. Bruk ngak ni oh bahrau, min kayua hawa, yaok pluh urang njauk lah pasot. Langiu di di duas nan, muk  Thảo dok njauk bayar ka  11 urang, ngan song yaom jien labaih  98 tỷ đồng.

Tui pasak pasang iek ruak kik TP Hồ Chí Minh, dalam kapul 10 urang tame negar suan hukum meng Phú Quốc, dalam nan hu urang ruak 2580, tal urak ini duah mboh 9 urang. Tui nan, di TP Hồ Chí Minh, 1 urang daok sang pah di quận Gò Vấp (urang ini dahlau daih hu iek ruak Covid-19), 2 urang hu duah mboh dalam 1 hotel daok di quận 1 haong 1 urang duah mboh di quận 8. Taong abih dom urang taom gaok F1 di urang ruak 2580 saong di 4 urang tame negar suan hukum daok di TP Hồ Chí Minh tapa dut iek jeng mboh âm tính.

Tổng thống Joe Biden bahrau tabiak panuac lac  90% urang Mỹ meng umo dam dara tagok hu klauk  vắc-xin pacang Covid-19 song hu sa labik  klauk dalam labaih 8 km meng labik urang nan dok  dalam harei 19/4 anak tal. Dalam harak ndom puac ka pacang caga jit  ruak Covid-19 song bruk klauk vắc-xin di beir harei  29/03 (tui tuk vak Mỹ), Tổng thống Bai-đừn brei thau negar  Mỹ dok mek hu rilo siam mekre dalam bruk klauk jru,  gam haong nan jeng brei thau lac urang njom bahrau dok patagok song jit ruak daok njom mbak di rilo labik. Dalam harei nan  Akaok pasak pasang iek song pacang caga jit ruak Mỹ Rô-shen Oa-len-ski (Rochelle Walensky) hu panuac brei thau dahlau ka jit ruak Covid-19 mbang ka 4  meyah bhap bini negar ni oh peih ngak dom jalan pacang caga

Kapul daong urang guk Chính trị Myanmar  brei thau, hu gac 14 urang metai dalam dom mbang trun jalan harei 29/3, dalam nan hu  8 urang di langiu ban Yangon, ban praong abih di Myanmar. Takik di nyu 510 rahra metai dalam bruk trun jalan cagar veik bruk pajaleih karja di Myanmar jaik 2 bilan tapa, dalam tuk yaok rabau menuac jeng daok trun jalan.

Harei kabroi (29-3), Ngoại trưởng Mỹ Antony Blinken hu panuac ieu Hội đồng Bảo an Liên hợp quốc padeih bruk pagam pambak tame bruk ngak pahla  ka  Xyri piah duh ka dom bruk chính trị, saong hu panuac ieu peih dom pabah mbang tapen negar  piah ba pandap mbang song dom dong ba karei karei ka 13,4 triệu urang dok cong dong. Ngọai trưởng Mỹ hu panuac ieu peih gilai veik pabah mbang ka 2  meng Thổ Nhì Kỳ, dahlau deih hu pandar piah ba pandap panda dong ka 4 triệu bhap bini Xyri song sa pabah mbang negar karei meng  Irắc piah ba pandap panda dong ka  1,3 triệu urang di  đông bắc Xyri.Min, Thứ trưởng Ngoại giao Nga Sergey Vershinin khang hatai cakak veik bruk ba pandap panda dong tapa jalan tapen negar song hu panuac lac dom kapul nyaom daok neh rabha dom bhum palei kayua  karja Xyri pasang iek./.

Urang lang: Hanipha- Mousaphuong -30/3