Tổng Bí thư Nguyễn Phú Trọng pal akaok song hu kadha ndom puac 

Mesup ni, Nyaom biai mbang ka 4 Mban Chấp hành Trung ương Đảng mbang 13 hu peih tabiak dalam prong prang di ban ine Hà Nội, Tổng Bí thư Nguyễn Phú Trọng pal akaok song hu kadha ndom puac peih mbaok prong di nyaom biai. Nyaom biai hu ginum biai, brei panuac ka bruk pacang caga jit prong Covid-19 song jalan sahneng, jalan ngak ka pacang caga jit dalam tuk vak bahrau; Bruk kinh tế - xã hội thun 2021, jalan patagok kinh tế - xã hội thun 2022; pasiam, pabak sarak ka 47-QĐ/TW, harei 01/11/2011 di Mban Chấp hành Trung ương ka dom bruk bo urang đảng oh brei ngak, song dom bruk prong karei karei.  Ndom tal bruk padang ngak, pasam veik Đảng, Tổng Bí thư Nguyễn Phú Trọng hu panuac ieu Trung ương tame dalam langyah, blac draih, ngak cambaih laih, tacei tabiak njauk labik, batabiak dom jalan ngak tpasiam.

Tui tacei pato dut iek brei daok karei pacang caga jit COVID-19 di Mintri Y tế payua UBND dom tỉnh ban, dom menuac daok gar ka oh mai sang hu dalam tukvak hu jit meng blaoh hu mai sang. Meng tacei pato ini, mai meng bhum mbuan hu ruak, hu klauk ginup dua mbang klauk vắc xin jeng brei dut iek saong brei daok karei 7 harei, meyah klauk vaccine ka oh ginup ye brei daok karei 14 harei. Tukvak tapa, dom menuac gar veik di grauk labik biak rilo, dalam nan hu uraniah, ngak kan kandah tal bruk bac da-a di rilo adei…

Kuhria tal harei  3/10, ban raya .HCM hu  16 quận, huyện song ban Thủ Đức klauk hu abih mbang ka 1 ka bhap bini umo labaih 18 thun, dom quận huyện dok veik jeng klauk hu 94% tal 98%. Dom quận, huyện song ban Thủ Đức jeng klauk mbang ka  2 hu meng  43% tal  99%. Tui yaok pataom di ban raya HCM, urak ni, ban raya dok 4% urang umo labaih 18 thun oh ka hu klauk jru mbang ka sa  1.

Melam blaoh 3-10, yaok rabau menuac daok nao tapa dom bilai di pabah mbang tame tabiak TP.HCM piah nao palei di dom tỉnh miền Tây. Jabat PC08 brei rilo menuac di drei tabiak pasang iek catang, urang halei hu ginup harak gar meng brei tapa bilai. Dom harak gar nan lac: harak klauk vaccine caga COVID-19 (takik di abih lac 1 mbang klauk ngan saong janih vắc xin 2 mbang klauk saong klauk hu takik di abih lac 14 harei) atau F0 thit ruak ala 180 harei, hu harak test COVID-19 âm tính (dalam 72 tuk kuhria meng tuk mek mẫu) meng brei tapa bilai. Gam haong nan, gah pasang iek tuk mboh dom menuac kan kandah gaok bruk oh lagaih di angaok jalan jeng hu daong ka dom urang ini.

Urak ni, jit ruak COVID-19 di tỉnh Phú Yên daok hu pasang iek, nan ye, meng kreh melam 5-10, Phú Yên brei paatah di gauk dalam  tỉnh tui sarak 19. Jit COVID-19 di Phú Yên tamuh tabiak meng harei 23-6. Tal beir harei 3-10, tỉnh ni hu abih tih 3.034 urang njom COVID-19, dalam nan hu 35 urang metai, 2.864 urang thit ruak hu tabiak truh sang iek ruak song 135 dok hu taong ruak dalam dom sang iek ruak. Meng harei  20-9 mbiah tal ni, Phú Yên oh hu urang halei njom dalam bhap bini di dom puk palei .

Ong Kishida Fumio jeng Thủ tướng Japon dalam mbang buh phiếu harei kabroi di quốc hội, labik Đảng Dân chủ tự do (LDP) pan quyền pasang iek. Ong ba tangin tame ngak bruk dahlau di tuk dang anak bruk tổng tuyển cử di bilan hadei. Meng labaih 60% menuac sia hu klauk caga COVID-19 ginup, bruk camereip abih di ong Kishida haong rajaei bahrau lac khik ka jit oh tamuh veik saong brei pacadu meneing dom bruk daok ngak catang.

Dalam 2 harei akaok bilan 10, Trung Quốc hu ba takik di abih  77 sruh kapan haoh quân sự tame jiak palao Đài Loan. Dalam nan, njauk di harei negar 01/10, 38 kapan haoh quân sự par tame  bhum “nhận dạng phòng không”  di Đài Loan, yam tapa mbang rilo di abih lac 28 mbang di harei 15/6. Gah pacang caga Đài Loan hu ba tiêm kích piah pacang caga, saong brei peih dom tổ hợp tên lửa phòng không piah pasang iek.  Mintri Quốc phòng Trung Quốc oh ka ndom nyai hagait ka dom bruk ni.

Negar Anh daok laik tame bruk srau kadau xăng menyek biak trak. Hu rilo makna ba tal bruk ini. Tui Rayo CNN, makna praong lac kayua kurang biak rilo dom menuac peih radaih pajeng xang menyek meng pabah lamnge atau meng sang mac halang menyek nao tal dom cây xăng. Gam haong nan, bruk rilo menuac huac kurang xang menyek, ba gauk nao blei mai sang piah, jeng ngak ka bruk kurang xang menyek tagok khang. Hu menuac daok piah xang menyek tame dom klaok saoh./.

Urang lang: H.Pha – M.Phuong - 4/10/2021