Jalan tame palei hu tuh bê tông tapak
Tuk hu ruak, muk Nguyễn Thị Mỡ urang bangsa Chăm daok di palei Bình Thắng, xã Phan Hòa huyện Bắc Bình, tỉnh Bình Thuận nao tal pasak y tế xã piah hu dom y, bác sĩ pak ni iek ruak, brei jru. Sang muk oh ginup meda, nan ye muk biak huac meyah njauk ruak trak, oh hu jien iek ruak. Kayua yau nan ye, meng di tuk akaok thun, muk tut angan blei bảo hiểm y tế, muk Nguyễn Thị Mỡ brei thau.
" Sang dahlak kan kathaot tuk ruak kik trak oh hu jien, nan ye dahlak blei bảo hiểm y tế..."
Di xã Phan Hòa, oh lac thei jeng sahneng tal bruk blei bảo hiểm y tế yau muk Nguyễn Thị Mỡ, bruk jak ba mik va blei bảo hiểm y tế jeng gaok kan kandah, kayua hatai sahneng ka bruk blei bảo hiểm y tế di mik va oh ka glong. Bác sĩ Ức Chiến Tuyến – Akaok bilai y tế xã Phan Hòa, huyện Bắc Bình lac.
"Bruk patrun yaom jien piah ka urang kathaot hu jien blei hu karja pak ni biak sangka..."
Thau lac danak dak padang ngak palei pala bahrau lac danak dak prong, piah palei pala patagok khang kajap, meng di tuk peih ngak danak dak, pakat ủy Đảng song karja dom xã, abih di nyu nan lac dom xã harat bangsa takik hu pataom tame ngak, meng rilo jalan piah ngak habar ka tong abih rahra mboh hu makna prong di danak dak. Meng ngak siam bruk jak ba, pathau khan, gam hong bruk caik hatai sangka buh jien tabiak padang ngak, tal puac thun 2017, xã Phan Hòa hu ngak salah dom tanut padang ngak palei pala bahrau song hu tỉnh pok meyaom.Ong Bá Hoàng Anh Tuân – Akaok UBND xã Phan Hòa, huyện Bắc Bình brei thau.
"Karja pak ni hu rilo jalan ngak piah pachreih urang blei BHYT..."
Hu 2 tanut hu xã mong lac kan si ngak hu, brei hu bruk ba tangin tame ngak di tong abih dom mban, dom gah, kapul nyaom di xã, nan lac tanut ka 15 ka Y tế dalam nan hu tanut urang blei Bảo hiểm y tế song tanut ka 17 ka alam Môi trường song hacih saat pandap mbang, 2 tanut nan brei hu bruk pachreih tui ngak di bhap bini.
Ngan song tanut Y tế, thun 2017, piah khik kajap bruk bảo hiểm y tế hu 85% rahra dalam xã blei tui tanut dalam bruk padang ngak palei pala bahrau, xã hu tabiak jalan ngak cambaih laih meng akaok thun song tacei pato dom mban, dom gah, kapul nyaom hong ban điều hành dom palei nao tal yaok baoh sang piah jak ba mik va blei, langiu di nan, xã jeng hu padang kapul piah nao jak ba dom urang ngak pahla dok dalam song langiu tỉnh, anek kamuan di xã Phan Hòa nao ngak mbang atah ba gauk dong jien blei bảo hiểm y tế ka dom sang kan kandah, meng ngak pakhang tal puac thun 2017 xã Phan Hòa hu 86% rahra blei hiểm y tế. Xã Phan Hòa jeng hu tỉnh brei angan mek hu tanut chuẩn palei pala bahrau ngan saong 19/19 tanut ngak salah bloh.
Min, 2 thun mai ini, xã ni oh khik hu tanut 15 ka y tế, kayua tanut blei bảo hiểm y tế di mik va dalam palei oh ngak hu, thun 2020 dalam xã tok hu 66% rahra blei bảo hiểm y tế. Ndom ka kan kandah dalam tuk peih ngak tanut, ong Khê Văn Lê – Urang dalam mban tacei jalan padang ngak palei pala bahrau xã Phan Hòa, huyện Bắc Bình, tỉnh Bình Thuận brei thau.
"Mik va pak ni pachreih tui bruk blei BHYT…. "
Mik va Chăm xã Phan Hòa, huyện Bắc Bình rilo meng ngak nong saong rilo meng pala padai ia. Dom thun jiak di ni, bruk pala drak di mik va gaok rilo kan kandah kayua langik tasik, mik va tok ngak hu 2 vụ padai, 3 thun mai ini, vụ padai di mik va njaku khat lahik kayua ia sua tal 70%. Bruk ni ngak kan kandah biak prong tal jien mek tame di mik va. Thun ni, kayua kurang ia, vụ padai Đông Xuân di mik va oh ngak hu. Piah lang talaih dom kan kandah, brei hu dom pakat caik hatai sangka, duah bruk ngak ka urang ngak, hu jien tame tani tanat, gam song bruk pathau khan di xã, cong lac bruk blei bảo hiểm y tế di mik va pak ni hu patagok. Bruk ni, oh lac rik dong ka xã Phan Hòa, huyện Bắc Bình mek song khik hu tanut chuẩn palei pala bahrau bo dok dong ka mik va tuk ruak kik hu bảo hiểm bayar jien, hu siam lagaih piah iek ruak./.
Urang lang: Hanipha- 24/2
Viết bình luận