Phó Thủ tướng Vũ Đức Đam

Mesup ni 23/6/2021, di jabat rajaei, Phó Thủ tướng Vũ Đức Đam, akaok mban tacei jalan pakat negar pacang caga jit  COVID-19 dang akaok mbang ginum biai online Thường trực mban tacei jalan  song urang pal akaok tỉnh Bình Dương ka bruk peih ngak dom jalan samar drah piah pacang cakak jit  ruak di pak ni .Jeng dalam harei, Kapul ngak bruk di mintri Y tế kayua Thứ trưởng Nguyễn Trường Sơn, Phaok mban tacei jalan pakat negar pacang caga jit  COVID-19 pal akaok mai ngak bruk, pasang iek bruk pacang caga jit di  Bình Dương. Kapul ngak bruk  mintri Y tế hu pasang iek labik sang  trọ di urang ngak pak  phường Bình Hòa, ban sit Thuận An lac sa dalam dom sruh jit hu rilo urang ngak njom  COVID-19; pasang iek labik brei dok karei di sang bac  Lý Thái Tổ, phường An Phú, ban Thuận An song pasang iek duah thau di sang iek ruak Đa khoa tỉnh.

Tok dalam 12 mon, meng mon 6 biar harei 22/6 tal mon 6 mesup harei 23/6, TP.HCM hu 51 urang njaom covid-19 bahrau, njauk biai nan lac hu 10 urang mboh hu tuk nao pasang iek prein yava di sang iek ruak saong oh ka thau njom meng halei mai. Dahlau di nan, sang iek ruak đa khoa Sài Gòn jeng brei padeih taduan raok urang ruak dalam 3 harei piah pametai anek ruak, kayua hu 5 urang njaom Covid-19 hu mboh tapa pasang iek ruak dalam biar harei 21/6. Bruk gam gam hu dom urang njaom Covid-19 hu mboh tapa pasang iek di sang iek ruak brei mboh lac, hu rilo F0 dalam bhap bini oh ka hu pasang iek saong brei daok karei, kayua yau nan ye Pasak pasang iek ruak kik TP.HCM (HCDC)  kakei bhap bini ngak njauk tui Sarak 10 di UBND TP.HCM, tok tabiak truh sang tuk hu bruk saong pacang caga jit tui 5 paka di Mintri Y tế.

 Langui di bruk brei padeih dom bruk oh cần thiết, tỉnh  Long An hu panuac ieu lac meng kreh melam 23-6, dom nhà hàng, labik pablei pandap mbang menyum di dom huyện Đức Hòa, Bến Lức, Cần Đước, Cần Giuộc, Châu Thành song ban sit Tân An tok hu pablei ka urang ba nao sang, oh pablei mbang menyum di labik.  Domom huyện dok veik pachreih pablei ba nao sang, meyah tuai khin mbang menyum pak di labik ye oh brei tapa 10 urang dalam sa tuk vak song brei  ngak catang tui  5 paka di Mintri Y tế, paatah di gauk di  2 urang takik di abih lac  1 mét  meteh. 

Tui UBMT negar Việt Nam TP.HCM, meng harei 20/3/2020 tal ini, mBan jak ba, taduan mek saong parabha Kadung jien pacang caga jit Covid-19 ban raya taduan hu jaik 709 tỷ đồng jien mbaok di rilo tỉnh ban dalam taneh ia daong ka bruk pacang caga jit Covid-19 di ban raya. Gam haong jien mbaok, TP.HCM daok taduan hu pandap panda yaom labaih 105 tỷ đồng yau: 10 tấn bei java di tỉnh Vĩnh Long, 20 tấn brah di tỉnh Đồng Tháp.. Urak ini TP.HCM hu parabha jien, pandap yaom labaih 709 tỷ đồng brei ka dom labik pacang jit. Ini lac bruk pachreih ba praong ka dom urang daok pacang caga jit mboh bui sambai saong sahanag hatai ngak bruk.

UBND tỉnh Bình Phước bahrau batabiak sarak brei  463 anek saih hu mbang tui sarak dong anek saih di  xã, bhum biak kan kandah, thun bac 2020-2021. Tui sarak 116/2016/NĐ-CP di rajaei. Dom anek saih dalam sarak dok bac meng tal bac 8 tal tal bac 12, rilo meng daok di dom huyện Lộc Ninh, Bù Đốp, Bù Đăng, Bù Gia Mập, saong rilo meng lac urang bangsa takik yau S’Tiêng, Khmer, Tày, Nùng.... sang dok di dom bhum palei atah bayah , bhum tapen negar, kinh tế kan kandah, jien duah hu meng pala phun  công nghiệp lavik thun.

Gah Y tế Dunya (WHO) daok huac lac jit praong Covid-19 meda tamuh veik di negar Anh hadei di tuk taneh ia ini khan lac brei labaih 60 rabau menuac tame sân vận động Wembley di ban ine London piah maong iek dom mbang bán kết saong chung kết Ơ-rô thun ini, dalam tuk camereip lac tok brei 40 rabau menuac tame min. Dalam tuk nan, Đan Mạch jeng brei thau lac 29 urang njaom Covid-19 pambuak tal dom mbang pakacah Ơ-rô di ban ine Cô-pen-ha-gen, hu menuac tame iek dalam sân di Đan Mạch jeng bahrau brei tagok, meng 16 rabau tagok 25 rabau menuac.

  Dalam 24 tuk tapa, Nga hu  546 urang metai kayua Covid-19, tui nan urang metai kayu jit prong  ni pak di negar ni  tagok 130 ribau 347 urang , glong ka 6 di dunya. Ni lac harei hu urang metai kayua  Covid-19 glong abih di Nga meng di akaok bilan 2 thun ni. Urang njom song metai kayua  Covid-19 tagok khang di Nga jiak di ni, makna hu mong lac kayua tamuh  anek ruak  Delta  hu duah mboh mbang camereip di Ấn Độ.

Harei 23/6, Lambaok Trung Quốc di Jabat Liên hợp quốc (LHQ) daok di Geneva (UNOG) Trần Húc hu panuac ieu taong abih dom taneh ia, tui jalan jum pataom gauk saong pambuak bruk dunya, ba dom sanya jeng bruk ngak saong daong vaccine pacang COVID-19 di dom taneh ia daok patagok. Ong Trần Húc hu panuac lac, dalam 2 tỉ 600 triệu mbang vaccine hu pandar di dunya, tok hu 0,3% lac di dom taneh ia hu jien mek tame biar ./.