Biar harei 9/9, Phó Thủ tướng Vũ Đức Đam pan akaok mbang nyaom haong dom chuyên gia, dom urang ilamu piah ginum biai dom jalan pacang caga jit dalam tukvak bahrau. Dua bruk hu dom chuyên gia, dom urang ilamu sangka pataom tame ginum biai lac jalan patrun patakik menuac metai kayua jit Covid-19 saong jalan pacang caga jit lagaih haong yaok bhum, palei, yaok tỉnh, ban.  Brei panuac di mbang nyaom, Phó Thủ tướng Vũ Đức Đam brei thau, jit ruak saong dom jalan pacang caga di dunya hu salih karei. Anak meta mboh lac taneh ia drei njauk ramik veik jalan  pacang caga jit. Tui bruk jit ruak dalam taneh ia meda parabha jeng 2 bhum karei di gauk. Bhum ka 1 lac  ban raya Hồ Chí Minh haong dom ban sit, dom huyện di Bình Dương, Đồng Nai, Long An. Bhum daok veik daok hu salamat. Kayua yau nan ye, dalam jalan ngak haong gauk di taneh ia, brei hu jalan ngak karei ka 2 bhum karei gauk.

Ndom ka harak công văn harei 4/9 di Mintri Y tế tabiak bruk kỷ luật y bác sĩ meyah “eng drei klaak bruk atau ngak suan gah đạo đức bruk ngak”, ong Nguyễn Trường Sơn, Thứ trưởng Mintri Y tế brei thau, tukvak tapa, hu dom labik iek ruak dalam taneh ia oh taduan urang ruak tame iek ruak, ba tal metai lahik urang ruak. Dang anak bruk srau kadau, kan kuhria mboh dahlau hu, dom menuac ruak trak, metai rilo nan ye hu dom bác sĩ mboh biak duh hatai, biak pandik harao bo oh daong hu ka urang ruak nan ye eng drei klaak bruk. Thứ trưởng Nguyễn Trường Sơn ndom lac, bruk kỷ luật, langyah bruk ngak suan di dom y bác sĩ oh lac bruk ba tabiak di công văn  bo nyu tok lac piah kakei, piah pahadar min.

Tui pasang iek samar di Mintri Pato Megru, bruk peih pato bac dalam dom harei camereip di thun bac bahrau 2021-2022 gaok rilo kan kandah, abih di nyu lac di dom tỉnh ban daok brei pa-atah di gauk. Rilo labik peih pato bac online oh ka lagaih, kayua dom jalan ba Internet takik dung lượng, phần mềm pato bac brei saoh chất lượng oh siam, rilo anek saih kurang pandap piah bac... Akaok Mintri Pato Megru ndom lac, taong abih dom tỉnh ban hu jit ruak khang ye Mintri brei ramik veik tukvak tamat thun bac, ramik veik jalan pakacah pakat bac, pkacah tamat THPT, pilih ruah tame đại học tui jalan daong palagaih ka anek saih, oh caik ka dom adei njauk khat, lahik.

Hadei di 2 harei ban raya HCM brei adat peih pablei pandap mbang menyum, pablei ba nao sang tapa online haong jao tapa shipper, meda lac taong abih labik pablei jeng daok kreik pabah mbang. Dreih yau nan, cửa hàng tiện lợi jeng hu adat brei peih pablei meng harei 8-9, min hu biak takik labik peih pabah mbang, tuai jeng biak takik. Dom labik pablei salih brei tut angan haong karja palei piah hu brei harak adat nao jalan, menuac ngak brei klauk takik di abih lac 1 mbang vaccine saong test samar âm tính 2 harei sa mbang. Ini jeng lac makna ngak brei dom kuan mbang tapen jalan kan pabak hu piah peih pabah mbang veik.

Tui Sở Y tế ban raya Hồ Chí Minh, urak ini bruk caong hu menuac halan hatain lac F0 thit abih ruak di dom labik taong ruak saong dom quận, huyện lac 1.728 urang. Kuhria tal harei 8/9, Sở Y tế ban raya hu taduan raok 273 urang halan hatian lac F0 abih ruak tut angan tapa jalan link di Sở Y tế. Hu 108 menuac halan hatian caga nao ngak bruk, Sở Y tế hu brei bruk tal dom labik daok caong hu. Langiu di nan,  Hội Doanh nhân ban raya Hồ Chí Minh hu jak ba, taduan raok 1.270 urang halan hatian lac F0 thit abih ruak, brei bruk ka 378 urang nao tal 14 labik caong hu.

Mintri Y tế Japon harei ini (10/9) brei thau, hu 18 urang njom biến thể Eta di vi rút SarsCoV-2 hu mboh di taneh ia ini. Ini lac mbang camereip Japon brei thau lac hu dom menuac njaom biến thể Eta. Biến thể Eta di vi rút SarsCoV-2 mbang camereip hu mboh di negar Anh di bilan 12 thun blaoh. Tal urak ini, biến thể Eta di vi rút SarsCoV-2 hu mboh di labaih 70 taneh ia, rilo meng mboh di Mỹ haong Châu Âu. Gah Y tế dunya hu ba biến thể Eta tame angan dom Biến thể njauk caik hatai sang.

Kuhria tal harei 09/09, Campuchia ngak salah hu 96,85% bruk klauk vaccine brei ka labaih 10 triệu menuac umo labaih 18 thun saong ngak hu 86,46% bruk klauk vaccine brei ka uranaih umo meng 12 -18 thun dalam taneh ia. Bruk njauk biai nan lac, Campuchia jeng hu klauk mbang 3 brei ka labaih 726.000 urang. Mintri Y tế Campuchia brei thau, taneh ia ini urak ini hu ginup vắc-xin piah klauk mbang 3 ka dom menuac hu klauk ginup 2 mbang vắc-xin Covid-19.

  Dom urang roh duah di Thái Lan daok patagok sa jamriak duah mboh virus nao mai iek tui ia hauk saong hu ngak iek nyu angaok jalan ngam saong dom po labik pablei salih dalam sa darak pandap mbang di Bangkok dalam adit ini. Meng dom mẫu dut iek, urang mboh lac dom menuac njom Covid-19 prah tabiak dom hóa chất biak karei”. Dom urang ilamu Thái Lan brei thau, dut iek ini tantu cambaih laih tal 95% saong caong lac nyu meda hu ba tabiak ngak piah salih ka gai dut iek urak ini chit jien jang saong oh lagaih ka menuac hu dut iek./.

Urang lang: M.Phuong -10/9/2021