Hadei di var lisei biar harei, amuk Đỗ Thị Lâm daok di palei Hội An, xã Tam Thanh, huyện pulao Phú Qúy peih tivi eik dom danak dak daoh tamia, pang dom khaw tin. Muk brei thau, meng harei pulao Phú Qúy hu điện luac harei melam, langiu tivi sang muk daok blei tu la-ar saong dom janih pandap karei piah pandar dalam sang. Raidiuk hu paglaong jang. Muk Lâm bui sambai lac:

“ Dahlau diah, điện hu tuk harei min. Urak ini, hu luac harei luac melam paje. Melam atau harei tuk halei jeng hu. Bhap bini hu mbuan sahanang

 Dahlau diah, tuk oh ka hu điện, bhap bini daok di pulao njauk truac gom menyek. Bruk ngak mbang, ngak huak, bruk me-in sambai daok kurang rilo. Thun 1999, Điện lực Phú Quý hu padang tagok saong peih tabiak Sang mac điện diesel camereip hu điện 5 tuk yaok harei, meng 18h30 tal 23h30 melam. Công suất sit, tok piah truac hadah di tuk melam. Mbiah tal bilan 4 thun 2002, Công ty Điện lực 2 (urak ini lac Tổng Công ty Điện lực miền Nam) brei tagok tukvak peih điện di pulao Phú Qúy lac 12 tuk yaok harei. Sa thun hadei di nan, tagok 16 tuk.

Bilan 8 thun 2012, C.ty TNHH Năng lượng tái tạo Điện lực Dầu khí Việt Nam ba hệ thống tua bin hangin tame ngak tabiak điện, gam saong điện di Sang may diesel pabak ka pulao ini. Hadei di nan, he thong tua-bin ini hu jao brei ka Điện lực Phú Qúy khik iek saong peih điện.

 Piah pabak bruk ngak mbang ngak huak saong patagok kinh tế di huyện pulao ini, meng harei 1 bilan 7 thun 2014, Tổng công ty Điện lực miền Nam hu pasiam veik he thong, patagok tuk peih điện meng 16 tuk tagok 24 tuk yaok harei, khik kajap bruk pabak điện pandar saong điện ngak mbang ngak huak di pulao. Saong gah điện jeng kuhria yaom điện sumu yau yaom di baoh taneh, tapa nan daong cak rok patagok kinh tế - xã hội di pulao.  

Oh lac bhap bini rahra, bo dom doanh nghiệp jeng hu kein laba meng bruk ini. Dom labik ngak kaya ikan hu blei dom jamriak bahrau, patagok bruk ngak mbang. Yaom pandap hu trun, patagok bruk meriak gauk  di darak pasar. Ong Nguyễn Văn Phú, Akok C.ty TNHH che bien hải sản Phú Nuôi, huyen pulao Phú Qúy brei thau:

“ Dahlau diah, takik điện njauk peih mac điện, jien blei menyek rilo jang. Urak ini, điện hu tani tanat, abih takik phun jien. Tuk điện hu ginup, bruk ngak mbang dak harei dak patagok”

Yaom lac, hu pabak klau tua-bin hangin, min urak ini Diesel jeng lac điện praong di pulao Phú Qúy. Ngan saong menyek diesel saong langik tasik oh lagaih di pulao,  jien buh tame ngak rilo saong jien khik ramik, pasiam điện lưới biak ralo, yau nan ye yaok thun gah điện pabak jien tame piah pabak điện. Thun 2017, gah điện pabak tame jaik 60 tỷ đồng piah huyen pulao Phú Qúy hu điện pandar luac harei melam. 

 Huyện pulao Phú Qúy hu 3 xã: Tam Thanh, Ngũ Phụng saong Long Hải. Urak ini, taong abih 6.640 baoh sang di pulao hu điện pandar. Điện pablei dalam thun 2017 jaik lac 15 triệu kWh, tagok 7,8%. Ngan saong bruk kinh tế - xã hội dak harei dak cak rok patgok yau urak ini ba tui bruk pandar điện ralo jang. Kayua yau nan ye, bruk buh jien tame piah paglaong he thong điện lac bruk njauk ngak. Ong Pham Van Thanh, Akok Điện lực Phú Quý, tỉnh Bình Thuận brei thau:

“Piah pabak bruk pandar điện dak harei dak rilo, urak ini Tổng công ty Điện lực miền Nam saong C.ty Điện lực Bình Thuận hu mbaok tangin brei ngak danak dak buh jien tame ngak điện saong yaom jien abih tih lac labaih 250 tỷ đồng. Danak dak daok hu peih ngak, tui kuhria hu ba  tame pandar dalam thun 2018 ini”

Tui danak  ini, anak tal Điện lực Phú Quý hu ba tame pandar  5 mac điện birau, patagok prein khang di diesel tagok 10 Mê-ga-oát gam saong 3 tua-bin hangin 6 Mê-ga-oát. Langiu di nan, meng bruk ngak dom bồn padang menyek, ye menyek khik piah hu rilo jang ginup pandar labaih 1 bilan  caga tuk langik, tasik di pulao oh lagiah.

  Meda lac, meng tuk Điện lực Phú Qúy hu padang tagaok mbiah tal harei ini, yaom lac gaok rilo kan kandah, min meng bruk sangka di Tổng Công ty Điện lực miền Nam saong bruk kham merat di Công ty Điện lực Bình Thuận, điện di pulao hu pabak tani tanat saong siam mekre, duh siam ka bruk patagok kinh tế - xã hội di huyện pulao ini./.