Phun Phượng di sang bac THCS Bạch Đằng tak trun hadei phun buac kateik anek saih

Dom phun praong, taha lac xà cừ, phi lao, phượng vĩ hu pala meng di tuk padang sang bac mbiah tal urak ini hu meteh abap, tuk halei jeng lac bruk hadah mbaok meta di gru saong saih sang bac THPT Quang Trung, quận Đống Đa, Hà Nội. Thau cambaih bruk di sang bac lac gam ngak jeng labik hijao, hacih, mekre, gam iek bruk salamat di anek saih, gru pato lac bruk praong dang akaok, min dom sang bac urak ini daok gaok kan kandah tuk khik ramik, iek glang phun hijao kayua oh ginup ilamu piah taong yaom phun hijao. Amuk Đinh Thị Thu Trang, Phó Hiệu trưởng Sang bac THPT Quang Trung, quận Đống Đa, Hà Nội brei thau, piah taong yaom phun khang kajap atau njauk halak mbang ye dom gru pato, dom urang jakar khik ramik tok maong iek meng meta saong bhian taong yaom tui hatai sahneng di drei: “Thun halei kol dahlak jeng hu da-a dom jabat chuyên môn mai pasang iek dom phun hijao saong brei cakak dhar gam gam, 1 thun kaoh cakak 1 mbang. Blaoh pasang iek, duah dhar bruk, piah plaih laik trun njauk anek saih, gru pato. Daok bruk taong yaom phun hijao ye kan thau hu phun bruk di gah dalam. Gah saong phun bruk meng gah dalam ye kol dahlak oh thau hu.” Oh hu ilamu gah pala, iek glang, taong yaom phun hijao, min daok brei khik ramik taong abih phun hijao dalam sang bac, nan lac bruk daok rah tabiak di taong abih dom sang bac urak ini.

Phun hijao dalam mblang sang bac kayua dom sang bac eng drei khik ramik saong oh hu bruk daong di karja jeng yau jabat chuyên môn dalam bruk tacei pato, pasang iek, taong yaom “prein yava” phun hijao. Bo tuk halei phun hijao “rah tabiak bruk” sang bac pathau khan ye jabat khik ramik saong karja meng “tame bruk” saong dom sang bac brei bayar jien.

Di ban raya Hồ Chí Minh, lambaok Sở padang ngak ban raya brei thau, phun hijao dalam dom sang bac kayua dom sang bac eng drei khik iek, min meyah khin kaoh, tak phun hijao dalam sang bac ye brei likau adat jabat chuyên môn, Hiệu trưởng eng drei oh hu adat brei kaoh, tak phun tui hatai. Daok lambaok Sở padang ngak Hà Nội brei thau, UB bhap bini pakat khik iek dom phun hijao di sang bac, jabat ngak bruk karja. Min biak di nyu dom phun hijao dalam sang bac jeng kayua dom sang bac eng drei khik iek. Meyah mboh phun mbuan jaoh, jaleih, sang bac pathau tagok ka UB bhap bini quận, huyện thau. Hadei di nan, jabat ini brei urang jakar hu ilamu gah phun hijao trun iek, taong yaom, ngak harak, brei kaoh klaak saong salih phun karei tui quy định.

Dom urang ilamu jeng mboh lac, tui Sarak ka 64 thun 2010 di Rajaei ka bruk khik ramik phun hijao đô thị, ngan saong phun hijao brei takik pala dalam đô thị (hu phun hijao dalam mblang bein dom jabat ngak bruk karja, sang bac, sang iek ruak, nghĩa trang, dom labik kakauh di dom agama, biệt thự, sang daok saong dom labik karei karei) kayua dom kapul nyaom, menuac urang khik iek saong ba pandar. Min, tok caik ka sang bac khik iek lac oh ka ginup. Urang pan akaok sang bac kurang thau, kurang ilamu saong kurang jamriak mbuan ba tal 2 bruk biak palai, damen ka anek saih tuk khik veik phun taha atau kaoh klaak nao phun hijao siam nan lac: mbuan oh khik hu salamat tuk phun jaoh jaleih, atau lac njauk khat lahik tuk “hala phổi hijao” di sang bac njauk palai pajoa. Tiến sỹ- Kiến trúc sư Trương Văn Quảng, Phó Tổng Thư ký kapul rami ramik patagok đô thị Việt Nam, urang dalam kapul mblang bein – phun hijao Việt Nam brei thau lac: “Dahlak sahneng lac sang bac njauk pambuak bruk haong karja phường, quận pak nan, dom doanh nghiệp khik ramik phun hijao, mblang bein, yaok thun peih bruk pasang iek, duah thau dahlau di tuk dom anek saih tame bac, dahlau di bilan hajan rabuk piah ravang, iek prein yava ka dom phun hijao.”

Sang bac oh kurang hu phun hijao, min piah hu dom phun hijao khang kajap, salamat ka anek saih, tui dom urang ilamu, brei hu dom quy định cambaih laih ka bruk pala, iek glang, khik ramik phun hijao dalam sang bac, dalam nan tacei tabiak cambaih bruk di sang bac, bruk di jabat khik ramik saong gah hu brei bruk khik iek phun hijao. Tuk halei hu dom quy định cambaih laih, gam haong bruk pasang iek gam gam, ye bruk khik ramik, iek glang phun hijao di sang bac, jeng ye phun hijao dalam jabat ngak bruk karja, di sang daok meng hu siam mekre, salamat./.

Urang lang: M.Phương - 14/6/2020