Y aom lac njauk jaoh jo pakat 4/4, min tuk luai ngak lin  mai veik puk palei, urang thương binh bangsa Cam angan Thiết Ngữ, daok di palei Hau Sanh, xã Phước Hữu, huyen Ninh Phuoc, tinh Ninh Thuan tuk halei jeng kham merat  yam tagok,  ngak rilo bruk piah daong ka puk palei.  

Yaom lac umo jaik 80 thun, mbuk patih, kaing kaong min thương binh Thiết Ngữ jeng daok hadah krah saong sami samar. Tame sang ong, angaok pak gah daning tuan bak dom harak meyaom saong dom baoh huan chuong, huy chuong di Đảng, Karja alin brei ka ong dalam luac dom pluh thun ngak bruk cach mang. Tuk tangi sua ka bruk mesruh metak, ong lac: “Sang dahlak kathaot rambah, meng sit daok pah haong rang, tal Tay mek nao pak ndon Ram, mboh Tay mek bhap bini taong paoh ba nao cuh meng nan pamaoh di Tay. Blaoh duah di thang nao tagok ceik tui cach mang tuk nan hu 12 thun 1947 ngak bruk ka cach mang tal tuk giai phong. Thun 1997, dahlak padeih huu mai ngak bruk daong palei”.  

 Yaom lac bruk ngak mbang kinh te sang ong hu tani tanat meng bruk ngak padai saong raong limo, min ong cai pandar biak kali kalih. Jien patak pataom hu, ong ba nao daong ka anek saih, sinh vien sang kan kandah  nao bac. Kadha njauk pok meyaom ong, yaom lac umo thun praong min ong kham merat jak ba mikva dalam palei dak padang sang ilamu, palei ialmu, jak ba dom baoh sang kan kandah oh caik ka anek kamuan drei klak bac meteh dhi. Ong pato anek kamuan pasram jalan diuk rai siam mekre, tari tarieng bac da-a, ngak rilo bruk daong ka baoh sang saong xa hoi. Ta-eng but pajaih ong urak ini hu labiah 50 anek kamuan daok bac di dom sang bac đại học, cao đẳng saong trung cap chuyen nghiep. Taong abih dom anek kamuan palei Hau Sanh di ong tal umo tal thun jeng hu nao bac. Dalam palei hu 40 baoh sang hu pok brei angan baoh sang pachreih bac.

Oh lac kham merat rik daong ka bruk pachreih bac, pachreih megru, ong Thiet Ngu daok lac urang nao dahlau dalam bruk padang ngak palei pala birau di puk palei. Yaom lac rup pabhap oh daok khang kajap, njauk rambuac 21%, min ong hu jak ba gauk gar but pajaih, puk palei ngak hu rilo tanut padang ngak palei pala birau, daong ka palei Cam Hau Sanh jeng labik hadah hadai di xa. Ong lac urang nao dahlau dalm bruk kaoh brei taneh saong rik jien tame piah ngak jalan dalam palei. Sa-ai Trượng Lẽo, Bí thư chi bộ Đảng palei Hậu Sanh, xã Phước Hữu, huyện Ninh Phước ndem ka ong yau ini: “ Ong Thiet Ngu thun praong min kham ngak rilo burk daong ka puk palei. Mikva thei jeng anit nam iek praong ong nan. Karja palei ye jai tame ong, ong jak ba mikva ngak siam ngak njauk tui jalan tacei ba di Ndang, hukum Karja”.

Umo 79 thun, jaik 50 thun Đảng, thương binh Thiết Ngữ mboh hadah mbaok meta hu rik prein yawa abih umo dam dara di drei brei ka Đảng, ka bruk peih paha bangsa saong dak padang puk paga, palei negar. Ong hu iek yau phun kayau taha di palei, lac kareih camin hadah piah ka dom rairah anek bangsa Cam bac megru ngak tui./.