Bruk pala raong salih gauk hadang – padai hu maong lac bruk ngak nong hadah krah

Rilo urang nong praong thun di Phước Long khan lac: Dahlau dieh huyện ni kathaot lo, kathaot abih di dalam tỉnh Minh Hải (klak). Hadei ni tuk kaoh tabiak jeng tỉnh Bạc Liêu, bruk kan kathaot jeng daok nao tui Phước Long oh padeih. Kayua ni lac huyện bhum atah bayah, labik taong kalin meng kan njauk yaok rituh ribau tấn bom siu dalam mesruh metak. Sang danaok khut rilo, bhap bini diuk meng phun padai , bo pala hu phun padai di taneh lakhun, njom mbak ini, lac oh mbuan.

Bhum palei kathaot Phước Long tok hu salih mbaoh mata meng tuk hu peih bruk padang ngak palei pala bahrau. Ong Huỳnh Kiến Thiết daok di xã Phước Long,  brei thau: Ribaong Ba Ngàn labik sang ong daok, tuk nan jalan glut baok, tatua kreim jaoh trun, jaoh tagok. Tuk hajan rabuk bhap bini nao mai biak kan kandah min urak ni lac biak khang kadang, hacih saat, radaih ô tô nduac tal sang. Abih di nyu nan lac, raidiuk di bhap bini pak ni hu salih bahrau mboh di anak meta. Atah di ni 10 thun, jien mek tame di bhap bini dalam huyện labaih 19 triệu đồng sa urang sa thun ye urak ni tagok tal labaih 66 triệu đồng sa urang sa thun. Mboh cambaih dom kein laba bo danak dak palei pala bahrau ba mai nan ye bhap bini Phước Long daok pambuak haong Đảng bộ karja pak ni daok ba tangin, rik prein tame ngak: “Padang ngak palei pala bahrau tal urak ni mbaoh meta salih bahrau biak cambaih laih. Bhap bini biak njauk hatai saong biak chrieh chrai. Kayua yau nan ye padang ngak palei pala bahrau hu paglaong, bhap bini atau urang jaka, saong dalak jeng kham marat rik prien tame kayua drei ngak ye dahlau di abih lac kein laba tapak ka sang drei ”

Ngak tui jalan “ Kanja saong bhap bini ba gauk ngak” dalam bruk padang ngak palei pala bahrau, tal urak ni Phước Long hu ngak salah jaik abih jalan mbak puk palei dalam huyện, pabak siam bruk nao mai di bhap bini. Meng kein lagaih lac huyện daok dalam bhum gah barak jalan raya 1A di tỉnh, gam hu hệ sinh thái yamen gam hu ia mbak, ia meteh mbak meteh taba, Phước Long pataom tame jhul khang bruk rami ramik veik jalan ngak kinh tế, parilo janih phun pala athur raong, ba bruk ngak mbang, kinh tế di huyện dak harei dak tagok glaong. Di bhum ia yamen tani tanat, huyện hu ramik taneh pala jaik 13.800ha, rilo abih lac ngak padai meng 2 tal 3 mbang sa thun, padang ngak 7 mblang hamu praong ngak  padai chất lượng glaong di taneh praong mangaok 7.200 ha, ngak 27 ar pacang hu 28 bilai njuk điện, jhul khang bruk pandar ilamu- kỹ thuật, ba jamriak tame bruk pala drak. Taong abih padai brah yaok thun di huyện mek hu labaih 291.000 tấn.

Di gah raong kaya ikan ngan saong taneh praong abih tih labaih 22.400 ha, huyện jeng pataom phun jien tame saong pathau khan pachrieh ba urang nong peih ngak dom bruk raong glang pambuak gauk ba mai kein laba saong khang kajap, yau bruk raong hadang sú 3 vụ pambuak saong pala padai, bruk raong pablak hadang – rieng, hadang – ikan, hadang giraong hijao – ikan, pala njam patam di vuông hadang. Dalam nan, bruk pala raong salih gauk hadang – padai hu maong lac bruk ngak nong hadah krah, patagok kein laba glaong, khang kajap, lagaih haong biến đổi khí hậu saong taneh ni yaok thun oh padieh hu peih praong. Urak ni dalam huyện hu labaih 15.000 ha hu urang nong pandar ngak tui jalan ni.

Meng salih bruk ngak mbang lagaih, njauk jalan nan ye  raidiuk di bhap bini pak ni hu patagok biak rilo. Urak ni Phước Long oh daok sang taik tahak. Dom sang kathaot di huyện meng labaih 19%  di 5 thun dahlau, trun daok 0,51% di puac thun dahlau saong huyện daok kham marat oh daok sang kathaot halei di puac thun ni.

Dalam mbang nao rivang saong ngak bruk di huyện Phước Long di akaok bilan 8 meng blaoh, Ủy viên Mintri chính trị, Thường trực Ban Bí thư Trần Quốc Vượng hu pok manyaom dom bruk bo Đảng bộ huyện Phước Long ngak hu dalam bruk padang ngak palei pala bahrau, meng nan daong ka dom sang kathaot di huyện trun biak rilo, raidiuk di bhap bini jeng hu patagok biak rilo: “ Mai tal Phước Long harei ni, dalak mboh mbaoh mata salih bahrau rilo, puk palei drei biak ghieh mekre. Padang ngak hu yau huyện ni oh lac mbuan. Tapa nan brei mboh bruk kham marat chính trị, di Đảng bộ, di abih hệ thống chính trị saong bhap bini huyện meng ngak hu. Pak ni khol drei ngak siam oh rah tabiak bruk mbang jien padai, oh caik ka bhap bini ndom jhak, nan lac sa bruk jak jeng”

Meng hatai kham marat tame bruk di abih hệ thống chính trị saong bruk pachrieh tui di bhap bini, Phước Long hu padang huyện mek hu chuẩn palei pala bahrau di thun 2017. Min, jeng ka oh njauk hatai haong bruk ngak hu ni, huyện daok ba tabiak jalan padang ngak palei pala pok paglaong, yam tal palei pala bahrau kiểu mẫu. Tapa labaih 2 thun kham marat ngak, tal urak ni huyện hu 67/67 puk hu brei angan mek hu chuẩn palei pala bahrau kiểu mẫu, 7/7 xã hu UB bhap bini tỉnh brei angan mek hu chuẩn palei pala bahrau pok paglaong saong kham marat tal puac thun ni, huyện hu 2/7 xã hu brei angan mek hu chuẩn palei pala bahrau kiểu mẫu.

Ong Lê Văn Tần- Phó Bí thư Huyện ủy- akaok UB bhap bini Huyện Phước Long brei thau:  Dalam 5 thun anak tal, Phước Long iek glaong bruk cak rok patagok ngak nong tui jalan pandar khoa học, padang ngak mblang hamu praong pala drak tui chuỗi giá trị meng pala ngak tal pablei kaya nong, peih ngak hu kein laba bruk padai – hadang saong dom bruk ngak hu yaom glaong kinh tế: “ Piah ngak hu bruk padang ngak palei pala baharu kiểu mẫu, anak tal Huyện ủy meda tabia sarak chuyên đề saong UB bhap bini huyện meda padang sa danak dak meng nan peih tabiak dalam abih hệ thống chính trị saong bruk pachreih tui di bhap bini hu mbaok tame paglaong dom kadha padang ngak palei pala bahrau pok paglaong piah jeng palei pala bahrau  kiểu mẫu”

  Tapa nan mboh lac, daok di pak halei, tuk Đảng, bhap bini hu sa hatung hatai haong gauk, ye nyu ngak jeng prein khang piah daong ka puk palei nan yam tapa yaok kan kandah. Meng tuk ba tangin tame padang ngak palei pala bahrau tal urak ni, tuk halei Phước Long jeng tagok hu prien khang di abih gah, prein khang  di abih bhap bini./.

Urang lang: Thu Thảo – 31/08