Apui khuah khang di Công ty cổ phần thực phẩm CJ Cầu Tre xã Hiệp Phước, huyện Nhà Bè, Ban raya HCM 

Oh ta-eng hagait thun 2020 bo meng akok vaktu negar drei dang anak rilo kan kandah, min meng kham merat, taong abih gah ngak tabiak hu labaih 1.220 tỉ USD abih tih GDP dalam 5 thun, Thủ tướng Nguyễn Xuân Phúc ndem anak Quốc hội page harei ini 10-11. Ndem ka bruk pamaong cak rok patagok 6,5% thun 2021, Thủ tướng brei thau lac bruk pamaong tal nan lac daok takik dut saong prein khang di taneh ia, yau nan min bruk jit ruak daok catang, meda ngak kan tal bruk pasiam veik kinh tế taneh ia.

Jeng dalam mesup ni, javap jalei tangi sua anak Quốc hội ka bruk peih ngak danak dak jalan cao tốc nao tapa dom tỉnh di bhum taneran krong CL, ong Nguyễn Văn Thể, Akaok mintri jalan mbak pajeng ba brei thau, tal thun 2023 meda ngak salah bloh piah brei ka radaih peih nduac meng ban raya HCM tal Cần Thơ. Daok jalan cao tốc Cần Thơ - Cà Mau meda ngak salah bloh dalam thun 2025.

Piah khik hu salamat ka anak saih, gru pato, samar caga pacang ribuk ka 12, harei ini Sở Pato megru tỉnh Ninh Thuận brei ka anek saih padeih bac. Sở hu harak iew dom labik pato bac, sang bac, abih di nyu lac sang bac di labik mbuan glut jaleih, ia dauh…samar pasang iek veik; brei manuac khik iek luac harei melam, peih ngak tui jalan 4 di labik; samar pacang caga tuk hu bala rah tabiak.

Meyah sraiy kan ndok hu di dom gilang pariak di tuk puac quý II/2020 tok tagok hasit dut song akaok thun, ye tal puac quý III, bruk ni daok tagok glaong veik. Pathau khan ka jalan ngak bilan 11 di Công ty Chứng khoán Rồng Việt brei thau, sraiy kan ndok hu di 17 gilang pariak kuhria tal abih quý III/2020 lac labaih 97.280 tỷ đồng, tagok 31% dut song puac thun 2019 song pok jien sraiy kan ndok hu samu 1,8% tong abih drap ar.

Tukvak 8 tuk meteh page harei 10.11, hu apui khuah khang di Công ty cổ phần thực phẩm CJ Cầu Tre di jalan ka 1, xã Hiệp Phước, huyện Nhà Bè, Ban raya HCM dalam khu công nghiệp Hiệp Phước. Apui khuah praong bak abih sang xưởng, sauk glaong yaok pluh mét. Gah PCCC Ban raya HCM ba rilo kapul tame daong. Yau nan min, mbiah tal mong 10, hangin yuh khang ngak pui khuah kan pandam jang. Sa urang ngak praong di Công ty brei thau: “Tuk apui khuah oh hu urang ngak, tuk apui khuah cong ty brei ka urang ngak thau juai tame cong ty. Urak ini, bruk apui khuah oh hu urang halei njauk hagiat”.

Ribuk Eta ngak brei rilo menuac metai saong khut, lahik drap ar biak praong kuhria meng di tuk tuh tame bhum Trung Mỹ adit dahlau. Honduras lac sa dalam dom negar njauk khat lahik trak di abih. Ủy ban pacang caga bruk drah samar di Honduras brei thau urang metai kayua ribuk Eta di negar ni tagok tal 57 urang, saong 8 urang dok lahik. Abih ith hu labaih 1.871.700 urang dalam negar gaok kan kandah tapak meng ribuk. Langui id nan, ribuk jeng ngak khut tayah yaok pluh ribau boh sang, labaih 100 jalan mbak. Urak ni, gah chức năng dok peih bruk dong duah urang gaok bala pak di labik ni.

Tal urak ini, di dunya hu labaih 50 trieu urang njom Covid-19, dalam tuk virus corona daok njom mbak samar jang saong atah jang. Dalam tuk ini, langiu dom vaccin pacang caga Covid-19 akok meti hu brei adat ngak di Nga saong Trung Quốc, dom hãng jru saong pasak roh duah di rilo taneh ia jeng daok pataom parein yawa tame ngak vaccin.

Ô-xtrây-li-a dok pasang iek peih veik pabah mbang negar song dom taneh ia châu Á. Ni lac panuac batabiak harei ni di Thủ tướng Ô-xtrây-li-a Scott Morrison, dalam tuk negar ni dok duah jalan pasiam veik kinh tế njauk kan kandah trak di jit Covid-19. Ô-xtrây-li-a di bilan 3 meng bloh oh brei tame negar dom menuac oh lac urang Ô-xtrây-li-a song thường trú nhân. Tal bilan 10 meng bloh, negar ni brei adat ka urang Niu Di-lân tame./.

 Urang lang: Ái Nghiêm – Hani Pha – 10/11 15:27:02