Brei hu ginup pandap pandap rilaow pabui piah duh ka bhap bini 

Piah khik kaya mbang hu salamat dalam tuk Tet thun anek sak Rimong saong le hoi Xuan 2022, trun takik di abih dom bruk njauk jru mek kayua pandap mbang, tui nan khik brei cak rok patagok saong prein meriak gauk hu siam lagaih di dom labik ngak tabiak pandap, chế biến, pablei salih kaya mbang, meng harei ini mbiah tal bilan 3 thun 2022, Mban tacei ba dom gah Trung uong ka bruk pandap mbang hacih sa-at meda pakhang bruk pasang iek, duah thau pambuak dom gah meng Trung uong tal pakat xã, pataom tame dom nyaom kaya blei pandar rilo dalam tuk Tet saong le hoi meda mbuan njom jru mek glong, dom palei ngak kaya mbang, dom tỉnh hu pabah mbang negar. Tui nan, jak ba rilo gah truyen thong piah pathau khan  dom kadha hukum ka bruk khik brei pandap mbang hacih sa-at jeng yau dom ilamu palih ruah, khik piah, ngak tabiak saong pandar kaya mbang  tal taong abih bhap bini dalam negar.

Danak dak buh jien tame patagok  jalan krong Chợ Gạo tuk vak ka 2 bahrau hu mintri jalan mbak pajeng ba  pambuak bruk haong  UBND tỉnh Tiền Giang padang ngak. Tui kuhria danak dak hu ngak slaah bloh dalam thun  2023 haong yaom jien buh tame ngak abih tih labaih 1.335 tỷ đồng. Piah padang ngak, UBND huyện Chợ Gạo hu peih bruk bayar jien, peih taneh, padang 5 labik tái định cư, samar tani tanat rai duik ka labaih  600 boh sang di tapen krong. Krong Chợ Gạo atah labaih  28 km meng  Rạch Lá tal  Rạch Kỳ Hôn pambuak krong Tiền song krong  Vàm Cỏ. Ni lac jalan krong prong ka bruk nao mai di bhum taneran krong Cửu Long song ban raya.HCM.

Kayua jit Covid-19 dalam tỉnh pasang iek hu, meng harei ini An Giang brei padeih bruk bhap bini takik tabiak jalan meng 20 tuk harei dahlau tal mong 5 tuk page harei hadei, langiu dom bhum palei hu jit ruak pakat 4. Piah hu mbuan lagaih ka dom bruk pablei salih, ngak tabiak, pablei saong blei gilac veik dalam tukvak siam mekre birau, UB bhap bini tỉnh iew gah y tế saong dom palei  brei patui bruk samar klauk pabak vaccine, kham merat  tal puac bilan 12, taong abih bhap bini dalam tỉnh hu klauk ginup vaccine, rik tame brei salamat saong pacang hu siam jit ruak Covid-19. Gam haong nan, pakhang bruk pathau khan ka bhap bini, oh iek biar  yaom lac hu klauk ginup vaccine; paglong akok sahaneng ka kan kandah di jit ruak, abih di nyu lac mbuan njom tame di biến thể Omicron.

Dom harei ni urang nong di  tỉnh Ninh Thuận, thar var trun pajaih dom janih njam patam , boh karaoh pablei ka drah pasa  Tết. Min, thun ni, langik oh ka siam yaom khak tagok glong yau nan ye bruk pala njam patam gleih glar jang.  Tết thun ni, tỉnh Ninh Thuận pala jiak  3.000 ha njam patam dom janih, pandap panda tui kuhria mek hu jiak  50.000 tấn. piah pacang caga dom khat lahik kayua langik tasik  song khik hu kein laba glong, Chi cục pala drah song khik ramik phun pala tỉnh hu tacei pato pathau khan  dom ilamu  iek glang song pacang cakak  sinh vật palai kaik njam. Jang yau hu panuac kakei doanh nghiệp, hợp tác xã  jhul pakhang  bruk pala njam patam  tui jalan khép kín, pablei salih pandap, dong ka urang nong bhain randap ngak mbang sit sot, padang bhum pala pandap panda  ba mai kein laba kinh tế glong .

Indonesia brei padeih dom mbang nao haji  Um-ra tal Méc-ca di urang Islam di taneh ia  hu rilo urang Islam  abih di dunya ni kayua huac bruk njom biến thể Omicron. Bruk ni hu batabiak  tuk  Tổng thống Joko Widodo hu panuac ieu  bhap bini  Indonesia oh tabiak negar langiu  piah nyaih di ruak  song ba biến thể Omicron njom talap veik tame  negar ni . Urak ni, Indonesia hu  3 urang njom  biến thể Omicron. Dahlau di nan, bruk nao haji  Um-ra dalam tuk jit ruak  Covid-19 hu karja  Indonesia mong lac sa bruk ngak iek piah ngak sa paka prong glong  jeng  Hajj biak siam mekre di puac thun  năm 2022 tui saka Islam.

Gah daong urang gaok bala saong dom urang halan hatian Ma-lai-xi-a hu daong panduan ba  21 ribau  bhap bini kayua ia sua ia dauk. Hu thau, labaih 66 ribau cảnh sát, urang lin saong urang daong padam khuah hu jak ba  piah ba bhap bini tabiak truh dom jalan dauk dalam ia ribuk. Dom mbang hajan khang dui atah meng harei 17/12 ngak brei ia di dom kraong tagok glong sre tapa ar, dauk rilo đô thị , rilo jalan oh daok nao mai hu. Tok kuhria ia hajan dalam dom harei tapa sumu jaik taong abih ia hajan dalam sa bilan yau bhian mboh.

Tui kuhria yaok thun hu labaih 1 triệu kaya tasik metai kayua hareik nhựa . Hu labaih  300 triệu tấn nhựa hu ngak tabiak yaok thun, min bahrau  hu 9% hu ngak veik. Sa drei kara kanduh hajao  hu palao di  Argentina hadei di tuk mbang biak rilo hareik nerak di langiu tasik. Dom  bác sĩ thú y brei thau, drei kara kanduh atah labaih  35 cm min dalam sa tuk vak katut  hu  mek tabiak  18 gram candiak  nhựa yau halam tuk  nhựa, xốp, nylon song ba ar jangeih camin. Yaok thun, tui kuhria hu labaih 1  triệu kaya tasik metai  kayua hareik nhựa. Dom urang gah alam môi trường hu panuac khan  dom candiak nhựa ala tasik hu rilo jang ikan  dalam thun 2050./.

Urang lang: Hanipha- Ái Nghiêm -20/12