Hu dom labik tamuh gilac veik urang karja pruh jru 

Tui ong Nguyễn Trí Dũng, Akaok Pasak pasang iek ruak kik di bal raya HCM, adat hukum ka bruk brei daok karei pataom sa labik atau daok karei pak sang hu Mentri Y tế brei thau cambaih laih. Labik brei daok karei pataom sa labik di VNA pak bal raya HCM kayua jabat ini dang tabiak peih ngak, khik iek, saong gah y tế bal raya peih bruk pasang iek. Tuk urang ruak brei daok karei pak sang, brei mbaoh tangin sanya saong ngak njauk tui panuac sanya nan. Taphia di nan, y tế puk palei  pasang iek pren yava di urang brei daok karei.

Lambaok sở Y tế bal raya HCM daok brei thau lac VNA hu adat brei daok karei tui yaok labik ngan haong yaok mbang par min dalam tukvak daok karei pataom sa labik 4 harei, urang ruak 1342 (lac urang likei tiếp viên hàng không) daok di labik ini nao tapa labik diah. Urang dang akaok Sở Y tế TP HCM ndom lac: "Urang ini ngak suan adat di labik brei daok karei. Ini jeng lac bruk ngak cadu dalam khik iek, lac bruk suan di VNA".

Atah di ini oh lavik, bruk 2 urang ngak di khách sạn Mường Thanh di Hà Nội njauk brei daok karei kayua taom gaok urang ruak Covid-19 mai meng negar langiu, nyu brei mboh bruk peih ngak oh ka siam ka jalan ngak, jalan pasang iek urang brei daok karei ngan haong dom labik brei daok karei halar hatian.

Dom urang ilamu gah y tế brei thau dalam tukvak urak ini, pasang iek bruk pacang caga Covid-19 meng negar langiu tame brei hu ngak catang. Tui ong Nguyễn Huy Nga, urang dahlau diah ngak Akaok Cục Y tế pacang caga, Mentri Y tế, dom jabat njauk ngak catang tui dom adat di Mentri Y tế, dom harak tacei pato di Mban tacei pato pakat negar pacang caga jit Covid-19 ka bruk manuac sia tame negar drei, brei daok karei urang tame negar drei hu brei thau blaoh dalam adat hukum dahlau nan dalam tuk daok cang sa jalan ngak siam jang hu ba tabiak.

Meng bruk dut iek Covid-19 di negar urang nan daok tal bruk brei daok karei, pajeng ba meng labik tame negar tal labik brei daok karei di Việt Nam jeng njauk peih ngak catang, oh caik ka nyu hu gilaong huan. Tuk mbang par hu urang ruak dương tính, njauk tui iek catang dalam mbang par. Tuk brei daok karei di khách sạn jeng brei ngak njauk tui dom adat hukum ka taom gaok, oh caik ka tuai eng drei nao mai tui hatai, urang ngak di khách sạn taom gaok haong urang ruak Covid-19 njauk ngak tui adat hukum, meyah ngak suan ye ba tal kan kandah biak praong".

Urang ilamu Nguyễn Huy Nga jeng brei thau ka bruk jit ruak biak mbuan tame meng jalan haluk, jalan sit, kayua nan ye bruk pasang iek jeng brei ngak catang.

Tui dom urang ilamu, bruk brei daok karei di khách sạn saong labik daok ngan haong urang mai meng negar langiu saong dom urang F2, F3 nan lac lagaih min kadha prong di abih nan lac urang hu brei daok karei saong jabat peih ngak bruk brei daok karei njauk ngak catang tui dom adat hukum ka bruk brei daok karei piah pacang caga jit. Langiu di nan, dalam tukvak yau urak ini, bruk cuk pataih pacang mbao tuk tabiak jalan, labik pataom rilo manuac njauk peih ngak ka nyu siam. Yaok urang njauk khik ka nyu siam bruk dang atah di gauk tui adat.

Dahlau di nan, ndom ka bruk mbuan tamuh gilac veik jit ruak Covid-19, akaok mentri Y tế Nguyễn Thanh Long brei thau jit ruak Covid-19 tuk halei jeng mbuan njaom mbak, abih di nyu lac tuk brei patagok dom mbang par ba bhap bani Việt Nam saong urang ilamu mai veik negar (dalam nan hu dom mbang par pajeng tuai, pajeng pandap dunya). Langiu di nan, tukvak anak tal lac bilan đông - xuân, SARS-CoV-2 meda diuk hu lavik jang, mbuan njaom mbak jang. Langiu di nan, bilan la-ar daok hu rilo jit cúm, cảm la-ar, cảm cúm, biak mbuan meluk haong jit Covid-19./.

Urang lang: Jasi -7/12