UBMTTQ Việt Nam TPHCM dom quận, huyện haong TP Thủ Đức daok pasang iek, padang angan dom sang njauk daong

Piah samar daong dom sang gaok kan kandah tuk daok peih bruk pa-atah di gauk, UBMTTQ Việt Nam TPHCM hu caga ginup 250.000 pok pandap, yaok paok yaom 500.000 đồng piah daong di tukvak anak tal (mbang 1 hu ba nao daong blaoh 3.000 paok). UBMTTQ Việt Nam TPHCM dom quận, huyện haong TP Thủ Đức daok pasang iek, padang angan dom sang njauk daong, oh labaih, oh kurang, oh klaak tapa, oh caik ka sang halei caong daong bo oh hu daong brei.

UBMTTQVN tỉnh Lâm Đồng tabiak sarak daong 5 tỷ đồng ka bhap bini TP.HCM, dalam nan hu menuac di tỉnh Lâm Đồng daok diukrai, bac da-a, ngak bruk di TP.HCM yam tapa kan kandah kayua jit ruak Covid-19. Bruk daong ini tapa UBMTTQVN TP.HCM taduan mek saong parabha brei tapak ka dom menuac njauk daong. Gam haong bruk daong mbang ini, dahlau di nan, dom kapul nyaom chính trị xã hội, MTTQVN haong dom kapul nyaom, dom doanh nghiệp, HTX, menuac urang dalam tỉnh Lâm Đồng hu peih rilo mbang rik pataom, daong kaya nong haong dom janih pandap ngak mbang huak ka rahra daok dalam dom bhum jit di TP Hồ Chí Minh haong dom tỉnh jaik taphia. 

Sở Công thương TP Hồ Chí Minh brei thau, TP urak ini daok hu 33 darak pasar meng kan daok ngak bruk, rilo meng pablei ralow, ikan, njam patam baoh kraoh, ikan pandam... Hu 201 darak meng kan haong 3 darak đầu mối praong daok kreik pabah mbang piah pacang jit. Lambaok dom quận, huyện haong ban Thủ Đức ndom lac, urak ini jit ruak daok srau kadau, labik vil val darak haong dom menuac pablei salih dalam darak, urang khik iek darak hu menuac dương tính haong SARS-CoV-2 atau daok daok dalam dom labik pacang veik, labik daok karei, nan ye karja jeng daok pasang iek, taong yaom, meyah mboh darak halei khik hu bruk pacang caga jit, meda brei peih pablei veik. 

Pambuak tal bruk angaok mạng xã hội brei thau bruk kateik yaom ngak ndam metai dom sang hu menuac metai kayua Covid-19, ong Nguyễn Toàn Thắng- Yam ndok Sở Tài nguyên Môi trường TP.HCM ndom lac, oh hu bruk nan,; labik ngak ndam metai ini kayua Karja khik ramik saong jao ka Cty Môi trường đô thị dang tabiak ngak, daok ngak bruk luac harei melam saong oh hu bruk tagok yaom, oh hu bruk oh  taduan menuac ba nao am cuh. Ong Nguyễn Toàn Thắng daok brei thau lac, bruk khik piah talang, bau di menuac metai kayua Covid-19 hu ngak biak tani tanat, hu tauk harak brei thau cambaih laih piah gauk gar di urang metai mai taduan mek. Daok urang kathaot njauk ruak saong metai kayua Covid-19 ye ban raya daong brei saoh, oh mek jien hagait. 

Meng harei ini (6/8), Tổng đài ieu radaih Be Group hu peih tabiak piah daong ka Tổng đài 1022 di TPHCM dalam bruk brei thau veik rahra kan kandah, saong hu jeng tổng đài taduan mek, daong ka dom urang kan kandah karei. Tui nan, yaok harei, Sở Thông tin - Truyền thông TP pabak brei Be Group angan rahra hu ieu tal Tổng đài 1022– dhar 2 saong hu hệ thống tương tác automatic taduan mek, salih ka dom urang tổng đài daok tavak bruk. Meng nan, dom urang di tổng đài kayua Be Group khik ramik meda ieu tal laik phone (028) 7100.6869 piah xác nhận veik dom kadha pambuak tal yau ye: angan, labik daok, bruk caong hu daong…blaoh payua veik ka dom jabat pambuak tal di TP piah samar daong brei.

Mesup ini 6/8, Thủ tướng Hàn Quốc Kim Boo-kyum brei thau, taneh ia ini meda khik bruk paatah di gauk catang jang dalam 2 adit tra piah pacang cakak bruk njaom mbak di jit ruak COVID-19, dalam tuk dom bhum karei jeng daok khik bruk paatah di gauk di pakat 3 (biar jang 1 pakat duk haong tanut glaong abih di Seoul). Thủ tướng Hàn Quốc brei thau, oh mbuan piah rajaei tabiak bruk nan kayua dom doanh nghiệp sit dalam taneh ia meng lavik mai gaok kan kandah kayua bruk paatah di gauk. Min urak ini, bruk pasang iek saong pacang caga jit ruak lac bruk njauk ngak dahlau.

Dalam sa kham merat nduac pakacah piah pacang dom biến chủng di virus SARS-Cov-2, abih di nyu lac biến chủng Delta, rilo hãng jru di Trung Quốc bahrau ini brei thau lac daok hu panuac ieu jabat jru tavao dom taneh ia brei pandar janih vắc xin pandar dalam bruk samar drah piah pacang dom biến chủng ini. 
Cty jru tavao Mỹ Moderna harei 05/08 brei thau vaccine di drei jeng hu siam 93% 6 bilan hadei di mbang klauk ka 2. Min Cty ini mboh lac dom mbang klauk veik meda njauk ngak dahlau di bilan brak kayua dom kháng thể meda trun tui tukvak. Moderna haong Pfizer urak ini daok hu panuac ieu jabat khik ramik di Mỹ brei adat klauk veik piah khik prein di kháng thể hu glaong, piah pacang veik Covid-19./.    

Urang lang: M. Phương – 06/08 15:51:03