Thủ tướng Nguyễn Xuân Phúc taom gaok song dom urang ngak bruk naiih gheih 

Dalam bui sambai, chreih chrai song mboh hadah mbaok meta  tuk hu brei panuac di var pok meyaom, ong Trần Thanh Phong- akaok dhar kapul urang nong  pala kruac aik  di palei  An Hoà, xã An Hiệp- huyện Châu Đức- tỉnh Đồng Tháp brei thau: “Ni lac mbang camereip hulin mai ban ine hu mbaok tame bruk pok meyaom 90 akaok dhar kapul urang nong naih ghieh thun  2020. Dalam rilo thun ngak bruk Kapul  song ba abih drei ka mik va  urang hội dalam palei, hulin oh sahneng tal bruk hu pok meyaom yau harei ni. Hulin mboh biak drut droi song hadah mbaok meta yau hu pachreih ba, daong pren piah kham merat dalam bruk ngak di drei".

Peih ngak danak dak 24 di Ban Thường vụ Kapul urang nong VN pakat negar ka bruk padang dhar kapul urang nong bruk ngak, nyaom kapul urang nong  bruk ngak, lac sa urang pan akaok dhar kapul, ong Trần Thanh Phong hu ba tabiak jalan piah pachreih 11 nyom kapul salih jeng nyaom kapul urang nong bruk ngak. Gam haong nan, ong jeng hu panuac ieu  padang kapul bruk ngak pala kruac aik di palei  An Hoà. Tapa jalan ngak  chi Hội urang nong nghề nghiệp, chi Hội pala kruac aik palei An Hoà hu dong ka urang nong  bhian klah rabha dom ilamu dalam bruk pala, tacei pato ka mik va patagok bruk pambuak gauk piah tani tanat bruk pablei salih piah tagok jien duah hu . Urak ni  dhar kapul 272 urang hội , urang nong hu mbaok tame pala phun kruac aik ngan song taneh prong  87 ha. Meng thun  2016 mbiah tal ni, dhar kapul hu dong ka  10 urang hội urang nong tabiak truh kan kathaot.

Jeng hu bui sambai saong mboh hadah mbaok meta yau nan, amuk Nguyễn Thị Bích Nhuần- akaok dhar kapul urang nong ban sit  Vĩnh Bảo- ban  Hải Phòng chreih chrai brei thau: “Yaom lac hulin hu 5 mbang  hu pok meyaom di tỉnh kayua ngak hu rilo bruk dalam bruk kapul nyaom  song bruk ngak mbang pablei salih naih gheih , min lac mbang camereip hu tabiak  Hà Nội hu mbaok pok meyaom  akaok dhar kapul urang nong naih gheih pakat negar biak lac bruk hadah mbaok meta biak praong. Hulin brei kham merat ngak mbang naih joi, ba pren yava di drei ka bruk Kapul nyaom song urang hội, urang nong dalam palei”. Meng rilo thun ni mai, sang muk Nhuần lac kreih camin  ka bruk pala  quất cảnh naih joi di palei, jien duah hu yaok rituh triệu đồng/sa thun . Taphia di nan, muk dok kham merat tacei pato ka rilo sang urang hội , urang nong karei karei ka ilamu pala piah ba jien tame rilo, tani tanat rai duik.

Uỷ viên T.Ư Đảng, Bí thư Đảng đoàn, akaok mBan Chấp hành Kapul urang nong VN pakat negar Thào Xuân Sùng ndom lac: akaok dhar kapul lac dom urang hu dong padang Kapul khang kajap di dom dhar kapul. Dhar kapul urang nong dok lac labik peih ngak tapak dom bruk di Kapul jang yau peih ngak dom bruk pakacah gauk. Kayua yau nan ye, bruk ngak di dom akaok dhar kapul lac biak hu yaom dalam peih ngak dom bruk di Kapul song bruk di urang nong. Akaok dhar kapul urang nong di dom puk, palei  rilo meng lac halan hatian ngak bruk.

Akaok Kapul urang nong VN pakat negar  Thào Xuân Sùng ndom lac:”Khol drei dok hu biak rilo kreih camin naih ghieh dalam dom gah di bruk Kapul daok di grauk dom bhum palei dalam taneh ia dok harei melam kham merat ngak bruk, pakacah gauk ngak mbang, pala drak, rik dong tame bruk patagok khang kajap di kapul, rik dong dak padang song khik caga taneh ia palei negar”.

5 thun tapa, dom pakat  Kapul hu pal akaok, tacei pato urang jakar, urang hội, urang nong dalam negar kham merat, sahneng duah peih ngak hu siam lagaih dom bruk pakacah gauk anit ranam taneh ia. Meng nan, dom bruk pakacah gauk di Kapul hu tagok khang song prong dalam, pabak pren khang, rik dong peih ngak jayah dom bruk chính trị, patagok  kinh tế - xã hội di  dom puk palei.

Hội đồng pakacah – pok meyaom Kapul urang nong VN pakat negar hu ba tabiak rilo bruk pakacah gauk dalam negar  tuk vak  2020- 2025 ngan saong kadha: “Dân chủ, jum pataom, salih bahrau, sami samar, hadah krah, kham merat pakacah gauk dak padang kapul urang nong Việt Nam hacih saat, khang kajap piah patagok  bruk ngak nong siam mekre, urang nong kaya meda, puk palei hadah hadai salih bahrau mbaok meta”./.

Urang lang: Hanipha- 14/10