Baha hu padang ngak angaok ceik Bà Rá 

Ndom tal Bình Phước, rilo urang hadar tal dom căn cứ cách mạng daok di puac jalan Trường Sơn huyền thoại bo urak ini hu jeng dom labik inem mek pakat negar yau: Căn cứ Bộ Chỉ huy miền Tà Thiết (huyện Lộc Ninh); căn cứ cách mạng “Nữa Lon” - sóc Bom Bo (huyện Bù Đăng). Langiu di dom bhum taneh hu angan sajarah, tỉnh Bình Phước daok hu langik tasik alin brei dom labik that hijao saong gheih mekre, laghaih ka du lịch sinh thái. Njauk ndom tal di abih lac Bein negar Bù Gia Mập praong labaih 25.600 ha daok di gah Barak tỉnh Bình Phước. Lac glai đặc trưng ka hệ sinh thái meng Tây Nguyên trun bhum Đông Nam Bộ. Labik ini daok khik ramik nguồn gien quý hiếm di hệ động, thực vật duh ka bruk roh duah ilamu, pato pakai môi trường saong cakrok patagok du lịch sinh thái.

Meng dom pren khang hu blaoh, yaok thun, tuai damuai mai rivang ma-in Bình Phước hu meng 200.000 tal 300.000 mbang urang. Thun 2018, hu labaih 333.000 mbang tuai damuai, tagok labaih 72% dut haong tukvak ini thun 2017, abih tih jien mek tame meng du lịch hu jaik 278 tỷ đồng. Min tapa nan jeng oh ka njuak haong pren khang du lịch di Bình Phước, tok bahrau meblah jaik 22% dalam cơ cấu nền kinh tế.

Makna halei ngak ka gah du lịch Bình Phước oh ka par tagok hu yau hatai caong khin? Amuk Trịnh Thị Nghìn, akaok Công ty Du lịch Thuỵ Khuê urak ini daok di  tỉnh Bình Phước ndom lac, dom labik hu angan meda peih hu dom tour du lịch sinh thái yau sóc Bom Bo, ceik Bà Rá atau khu căn cứ miền Tà Thiết daok atah di guak, piah nao meng labik ini tal labik diah abih biak rilo tukvak nan ye ngak ka bruk rami ramik tour gaok rilo kan kandah. Lingiu di nan, dom labik ndih daok veik oh ka hu rilo, gam haong ilamu di menuac duh ka bruk du lịch oh ka glaong ba tal bruk rivang iek di tuai damuai oh ka hu siam laghaih: “Bruk njauk biai nan lac ilamu duh ka bruk du lịch oh ka gheih. Praong di abih jeng lac menuac ngak du lịch. Manuac ngak hu bruk ye oh daok di Bình Phước, daok urang khin ngak di Bình Phước ye ilamu daok biar”. 

Piah pasiam veik dom labaih kurang ini, dom doanh nghiệp lữ hành, du lịch hu duah bruk pambuak gauk di tỉnh Bình Phước haong dom tỉnh, bal jaik taphia, pandar hạ tầng saong chất lượng urang ngak di dom tỉnh ban yau: bal raya HCM, Bình Dương, Đồng Nai, Lâm Đồng... Langiu di bruk pambuak pagam tour tuyến haong dom tỉnh di bhum Đông Nam bộ, dom doanh nghiệp di Bình Phước jeng merat peih ngak, meyaih khan, saong peih prong talei pambuak bruk haong dom negar jaik taphia yau Campuchia, Lào, Thái Lan, Myanmar dalam bruk padang dom tour, tuyến du lịch dunya, peih tabiak bruk pambuak gauk gah du lịch pambak tame dom siam lagaih hu bloh. Ong Nguyễn Đức Hiếu, Akaok Công ty Du Lịch Việt Phước lac: "Ndom ka jalan meyaih khan ye meda hu bruk pambuak guak di dom doanh nghiệp di tỉnh ini saong dom doanh nghiệp di tỉnh diah. Meng hu yau nan bo khaol dahlak klah rabha dom danak dak du lịch, piah hu rilo jang dom tour tuyến dalam sa baoh siphau tacei pato du lịch di tỉnh ayut”.

Dom kham merat di doanh nghiệp du lịch tok lac jalan ngak piah langyah bruk di anak meta. Suai lavik, karja tỉnh Bình Phước njuak hu dom jalan ngak praong, lagaih piah ka gah du lịch cakrok patagok njuak haong pren khang di nyu. Meng thun 2015 mai ini, Bình Phước jak ba hu labaih 300 tỷ đồng, dalam nan hu jaik 70% lac meng xã hội hóa piah patagok hạ tầng du lịch. Bình Phước jeng jul pakhang bruk meyaih khan pren khang gah du lịch sinh thái pambuak pagam haong tâm linh; padang sarak ưu đãi pachreih urang buh jien tame ngak. Ong Trần Văn Chung, akaok Sở Ilamo, padhih saong rivang ma-in tỉnh Bình Phước brei thau:”Urak ini hu biak rilo puk palei hu pren khang gah du lịch, Sở hu danak dak pambuak bruk di rilo gah piah hu bruk pambuak guak ba tuai damuai mai, klah rabha bruk khik iek saong cakrok patagok du lịch, peih nyaom biai xúc tiến du lịch haong dom tỉnh miền Tây, haong TPHCM, Bình Thuận saong dom tỉnh dalam bhum Đông Nam bộ, palagaih ka dom doanh nghiệp, công ty lữ hành pambuak bruk haong guak piah ka tuai damuai hu trải nhiệm rilo jang tui hatai caong khin”. 

Piah patagok du lịch tui jalan chuyên nghiệp, tỉnh Bình Phước njuak pataom tame  pato pakai, paglaong ilamu urang ngak gah du lịch, jaik ba xã hội hóa ngak siam labik daok, labik ndih, labik ma-in giải trí. Taphia di nan, tỉnh jeng njuak patabiak dom sarak pachreih doanh nghiệp du lịch ngak bruk siam jang, buh jien tame bruk meyaih khan thaik binguk puk palei tal taong abih bhap bani dalam negar./.

Urang lang: Jasi