Piah jhul pakhang bruk padang ngak jalan mbak nao mai dalam palei, meng bilan 7 -2014, Ủy ban bal sit Buôn Ma Thuột, tỉnh Đắc Lắc peih danak dak daong xi măng ngak jalan. Hu karja daong taong abih xi măng, bhap bani dom puk palei dalam bal sit buh cuah, patau saong harei ngak piah padang ngak yaok pluh ki lô mét jalan bê tông, ngak brei hadah hadai mbaok meta puk palei. Tapa nan brei mboh pren pambak khang meng sa jalan ngak njauk hatai bhap bani.

Jaik puac biar harei, ong Lâm Ngọc Thắng daok pak tổ liên gia 8, khối 9, phường Khánh Xuân haong anek likei daok kham merat lai bê tông, tuh ka nyu salah labik tapen jalan anak sang. Jalan bê tông atah labaih 300 mét, praong 3 mét, tapen jalan hu tauk kiak, ngak ka mbaok meta di labik daok ini hadah hadai tagok. Ong Lâm Ngọc Thắng brei thau: Drei ngak ka jalan nyu prong tabiak, hacih sa-at jang. Jalan bê tông praong 3 mét, bhap bini peih praong jang 80cm, anak sang thei ye urang nan ngak.

Sa-ai Thái Thị Cúc, sa baoh sang daok jaik nan jeng bui sambai khan ka bruk bhap bani pak ini abih hatai rik daong jien padai, cuah, kiak, patau saong harei ngak. Sa-ai jeng khan brei thau ka bruk bui sambai harei melam angaok dom canah jalan bahrau hu tuh bê tông ini: Anek naih blaoh tal urang taha nao tập thể dục 4 tuk page ye mboh sap ndom klao paje. Anek naih melam mai nyu nao tập thể dục blaoh nyu ndik radaih bui ralo. Hu jalan ini lagaih ginup janih. Hacih sa-at, laneng lanoi. Tuk oh ka hu jalan ini yaok mbang radaih pajeng menuk, pajeng ada pajeng aia nao tapa ye dhul mul bak abih oh daok mboh hagait. Urak ini hu siam mekre paje.

Jeng tui jalan ngak lac karja brei xi măng, bhap bani pabak binah daok veik, bruk padang ngak jalan mbak nao mai dalam palei daok hu mboh di rilo xã karei dalam bal Buôn Ma Thuột. Ong Đỗ Mạnh Hùng, Bí thư chi bộ palei 12 xã Ea Tu, bal sit Buôn Ma Thuột brei thau: tok dalam dua bilan peih ngak, mikva dalam palei rik daong hu labaih 273 triệu đồng, tuh bê tông hu 657 m jalan nao mai dalam palei. Mikva daok cang xi măng piah ngak salah 300m jalan tra, kham merat dalam thun ini meda tuh bê tông hu 1 km jalan nao mai dalam palei: Hadei di tuk hu karja sangka daong brei taong abih xi măng, khaol dahlak mai pataom gauk ginum biai, tabiak Nghị quyết, dom kapul nyaom peih bruk jak ba bhap bani pachreih tui bruk padang ngak palei pala bahrau. Meng nan, hadei di tuk peih ginum biai haong dom baoh sang ye mikva thei thei jeng pachrei tui saong rik daong cuah patau harei ngak.

Tui taong yaom di UB bhap bani bal sit Buôn Ma Thuột, tỉnh Đắc Lắc, bruk jak ba bhap bani ngak jalan mbak tui jalan Karja daong brei xi măng ye hu mikva njauk hatai pachreih tui. Di dom puk palei, bhap bani padang kapul pasang iek piah jak ba mikva rik daong saong pasang iek bruk peih ngak nan ye daom canah jalan hu padang siam mekre. Hu dom palei, bhap bani hu rik daong jien padai piah ngak jalan kapal jang, pandar hu suai lavik.

Ong Nguyễn Thanh Liêm, Akaok Phòng Kinh tế bal sit Buôn Ma Thuột, brei thau: dalam 3 thun meng thun 2011 tal thun 2013, bruk jak ba bhap bani rik daong ngak jalan tok hu labaih 28 tỷ đồng, ngan haong 78 km jalan nao mai dalam palei hu padang ngak. Min dalam 5 bilan tapa, bal sit hu daong labaih 5.300 tấn xi măng, bhap bani rik daong vật liệu karei yaom 11 tỷ đồng, padang ngak hu 45 km jalan nao mai dalam palei. Bruk jak ba pren rik daong di bhap bani hu patagok meng jalan ngak njauk ini: Dalau di tuk bal sit daong xi măng brei bhap bani ngak jalan ye bhap bani tok pachreih tui tuk karja daong meng 70-90%, bhap bani rik tame meng 10-30% min. Peih ngak danak dak daong xi măng ngak jalan ye bhap bani hu ginum biai, hu pasang iek saong hu ngak jalan ini nan ye bhap bani pachreih tui. Tapa nan mboh lac patagok hu bruk tự chủ, patagok hu pren khang di bhap bani dalam bruk padang ngak palei pala bahrau pak bal sit Buôn Ma Thuột. 

Urak ini dalam bal sit Buôn Ma Thuột, tỉnh Đắc Lắc jeng daok hu labaih 200 km jalan oh ka hu tuh be-tông. UB bhap bani bal sit meda  pok panuac tagok Hội đồng bhap bani parabha phun jien ralo jang piah blei xi măng daong ka bhap bani, jhul pakhang bruk padang ngak jalan, daong ka bhum palei pala di bal sit samar jeng labik hadah hadai, jalan mbak nao mai hu mbuan lagaih jang./.