Puac harei 28/7, hadei di 9 harei ngak bruk abih drei, mbang nyaom ka 1, QH mbang 15 hu ngak salah danak dak ba tabiak saong jak jeng siam mekre. Peih tabiak dalam tuk jit praong Covid-19 daok srau kadau, QH brei dui katut panak tukvak mbang nyaom 8 harei duk haong kuhria dahlau saong ba tabiak jalan pambuak bruk khang kajap haong Rajaei pok tagok QH pabak tame Sarak haong gauk di mbang nyaom dom jalan ngak samar drah pacang caga jit. Tapa nan piah padang jalan adat hukum, patagok bruk kuhria caga dahlau ka Rajaei, Thủ tướng Rajaei haong dom tỉnh ban, samar pabak bruk pan akaok, ba jalan pacang caga jit, kuhria gam tuk jit ruak khang jang saong meda tamuh tabiak dalam tukvak anak tal.

UBND TP.HCM bahrau hu harak payua dom sở ban ngành haong UBND dom quận, huyện, TP Thủ Đức ka bruk daong urang ngak, urang pandar menuac ngak gaok kan kandah kayua Covid-19 tui Sarak 68 di Rajaei haong Sarak 23 di Thủ tướng Rajaei. Yau nan, TP peih ngak haong gauk dua pok jien daong 886 tỷ đồng tui Sarak 09 di HĐND TP.HCM saong pok 26.000 tỷ đồng tui Sarak 68 di Rajaei. Tui Sở LĐTBXH TP, tal urak ini, hu 298.000 urang ngak bruk tự do hu daong labaih 447 tỉ đồng, samu 100%; jaik 35.000 urang ngak padeih bruk, oh hu jien bilan, hu daong jaik 70 tỷ đồng; 10.000 urang pablei salih di dom darak pasar meng kan hu daong 15 tỷ đồng.

Meng harei 28/7, UBND tỉnh Tây Ninh hu panuac ieu bhap bini oh tabiak truh sang meng mon 6 biar harei tal mon 6 mesup meyah oh hu bruk hagait. Tỉnh ieu dom huyện, ban sit padang jalan talei pandiak luac harei melam piah taduan saong langyah dom caong khin di bhap bini. Gam haong nan, peih bruk brei phiếu ka dom sang bhap bini blei pandap meng mon 7 mesup tal mon 4 biar harei yaok harei, brei phù hiệu phản quang piah thau menuac hu adat brei nao jao pandap. Dahlau di nan, dom tỉnh, ban gah meraong lac TP.HCM, Bình Dương, Bình Phước, Đồng Nai, Bạc Liêu, Long An, Tiền Giang hu tabiak bruk oh brei bhap bini tabiak jalan meng mon 6 biar harei tal mon 6 mesup harei hadei.

UBND tỉnh Bà Rịa – Vũng Tàu bahrau padang 3 kapul ngak bruk di dom gah piah pasang iek bruk pacang caga  jit Covid-19 di dom doanh nghiệp dok ngak bruk dalam dom labik ngak cong, cụm công nghiệp song pabah lamnge dalam tỉnh. Urak ni, jit ruak dalam tỉnh daok njom mbak samar dalam bhap bini, bruk njauk caik hatai nan lac, dom labik ngak cong, cụm công nghiệp, pabah lamnge hu urang njom  Covid-19 song  F1, F2 lac urang ngak. Kayua yau nan ye, tỉnh pandar dom doanh nghiệp patagok bruk pruh jru, rami ramik hacih saat labik dok peih bruk 3 di labik  song urang ngak , menuac ngak tuk halei jeng khik kajap bruk ngak tui 5 paka di Mintri Y tế.

Quan khu 9 peih bruk blei labaih 3,6 tấn njam bồn bồn, yaom 13 ribau đồng sa kilo ka mikva di xã Mỹ Tú saong xã Mỹ Thuận, huyện Mỹ Tú, tỉnh Sóc Trăng. Kayua kan kandah meng jit Covid-19, janih njam ini oh hu urang mai blei, rilo bhap bini oh hu jien mek tame. Tui urang ngak praong di Bộ Tư lệnh Quân khu 9, tukval anak tal, taphia di bruk peih ngak siam “ Labik pablei pandap 0 đồng”,  tapon nyaom bol pan phao karong QK 9 daok brei blei dom janih kaya nong daong mikva yam tapa kan kandah.

Jabat Y tế pakat glaong negar Prang hu brei adat ka uraniah meng 12 thun tal 17 thun di taneh ia ini hu klauk vaccine pacang Covid-19 di hãng jru Moderna, 5 harei hadei di tuk Gah jru tavao châu Âu tabiak bruk dreih yau nan. Urak ini negar Prang daok hu bruk njaom mbak khang di biến thể Delta, ngak ka dom menuac njaom ruak saong tame sang iek ruak tagok glaong veik. Anak bruk yau nan, rajaei Prang caong lac bruk pandar harak thông hành y tế samar hu ba tabiak ngak meng akaok bilan 8/2021.

Rajaei negar Anh tabiak bruk lac meng adit hadei, tui meng Mỹ haong dom taneh ia EU hu klauk ginup 2 mbang vaccine oh brei daok karei paatah tuk mai tal negar Anh, min brei hu harak dut iek PCR mboh âm tính haong SARS-CoV-2, saong brei sanya ngak dut iek karei hadei di tuk mai tal negar Anh. Min dom đảng đối lập haong rilo chuyên gia y tế di Anh ndom lac bruk peih pabah mbang tapen negar ka yaok triệu tuai meng Mỹ saong EU meda ngak ka rilo biến thể virus bahrau tamuh tabiak di Anh saong tamuh khang.

Thủ tướng Campuchia Hun Sen brei thau, hu 7 triệu dalam 10 triệu menuac di taneh ia ini hu klauk takik di abih 1 mbang vaccine pacang Covid-19. Campuchia peih bruk klauk vắc xin pacang Covid-19 meng harei 10/2, saong Trung Quốc lac taneh ia pabak praong vaccine./.

Urang lang: A.Nghiem & H.Pha  - 29/7/2021