Akok Mentri Nguyễn Xuân Cường duah thau ka ar pacang glut jaleih di ban sit Đức Phổ

  Hadei di tuk thau bruk glut jaleih taneh khang di palei 1, xã Trà Leng haong palei 1, xã Trà Vân, huyện Nam Trà My, tỉnh Quảng Nam lam lahik 53 rahra, Quân khu 5 hu ba labaih 200 urang lin samar nao tal labik bala piah daong. Rilo janih radaih yau radeih múc, radeih gạt, radaih daong manuac njauk rambuac... jeng hu tagok jalan nao tal xã Trà Leng piah daong. Min bruk nao tal labik nan gaok rilo kan kandah kayua hu rilo labik glut jaleih angaok jalan Roya 40B. Lingiu di nan, riyak langik klaih klaoh nan ye bruk brei thau gaok biak rilo kan kandah. Dom gah daong duah gam kuac patau haluk piah hu jalan nao tal labik bala, gam khik caga salamat ka dom urang nao daong duah.

Pagam tal bruk  2 sruh kapan  Bình Định song  26 urang tong chap ikan gaok bala angaok tasik, 2 kapan di  kiểm ngư song 1 kapan di  hải quân hu nao tal labik nan song daok duah urang lahik. Tukvak  0 tuk  10 minite melam  29/10, kapan Kiểm ngư 467 hu nao tal jaik kapan ikan  BĐ 98658 TS ( lac kapan ikan camereip nao jaik kapan gaok bala BĐ 96388 TS) song hu dui ba kapan tame boh taneh. Tuk vak nan, pren yava di  14 urang angaok kapan hu tani tanat. Tui kuhria tuk langik siam, gah dong duah hu ba kapan haoh DCH-6 tabiak bhum tasik labik dom kapan ikan gaok bala piah duah urang tong ikan daok lahik.

Tập đoàn Điện lực Việt Nam (EVN) brei thau, ribuk ka 9 ngak klaoh, khut 06 labik jalan talei 500 kV, 09 jalan talei 220 kV, tal mesup 29/10 pasiam veik hu 08 dalam 09 jalan talei  220 kV klaoh, khut. Tui nan, hu labaih 1,1 triệu sang oh hu điện pandar kayua ribuk ka 9 hu pabak điện veik. Lingiu menuac di Điện miền Trung daok hu dom menuac di Tổng Công ty Điện lực miền Nam hu ba mai piah daong pasiam dom tayah khut di ribuk tui jalan pabak điện brei dahlau ka dom phụ tải praong dalam harei 29/10; dom labik daok veik kham merat hadei di 03 harei hu pabak điện veik.

Biar harei kabroi  28/10, di  huyện Tu Mơ Rông (Kon Tum), 5 xã: Tê Xăng, Đăk Sao, Măng Ri, Ngọc Yêu haong Đăk Na njauk pacang cakak kayua ribuk ka  9. Jeng dalam harei kabroi ,  xã Đăk Tơ Kan hu ba bloh jiak 100 urang dok di gah ala binek Thủy lợi Đăk Trăng tal labik siam mekre. Gah chức năng daok padeih bruk brei urang jakar nao pasang iek dom labik glut jaleih, hu panuac ieu tong abih dom urang jakar takik nao mai, dok pak di palei piah khik caga siam mekre. Urak ni hajan ia sua  ngak glut jaleih dom pluh labik rah tui dom jalan  dalam  huyện Tu Mơ Rông ngak ka menuac saong radeih oh nao mai hu.

Tui brei thau tuk mesup ini di Tổng cục Yaok pataom, ramik veik yaom dịch vụ pato megru tui jalan lagaih haong yaom darak pasar saong kan kandah di hajan, rabuk, ia sua di dom tỉnh bhum kreih negar lac dom kadha praong ngak brei tanut blei pandar (CPI) bilan 10/2020 tagok 0,09% duk haong bilan 9 saong tagok 2,47%  duk haong vaktu ini thun dahlau. Kuhria rah tapa 10 bilan thun 2020 lạm phát tagok glaong jang lạm phát cơ bản. Kadha ini brei mboh srau kadau yaom rilo meng lac kayua yom padai brah, pandap mbang menyum, yaom xang menyek tagok.

Gilang pariak negar Trung Quốc harie ni  (29-10) hu “buh tame” labaih 140 tỷ nhân dân tệ  (samu  20,8 tỷ đôla Mỹ)  tame gilang pariak di negar ni  piah khik hu rilo jien dalam gilang pariak. Dahlau di nan, harei  21-10, Gilang pariak negar Trung Quốc jeng hu buh tame  70 tỷ nhân dân tệ (labaih  10, 46 tỷ USD) tame drak pasa  tapa dom bruk ngak dreih yau nan.

Urak ini dom taneh ia châu Âu yau Bỉ, Pháp, Tây Ban Nha,… daok hu dom menuac njom Covid-19 njauk tame sang iek ruak di tanut glaong di abih dalam rilo bilan tapa. Kadha ini ngak brei ka urang mboh duh hatai ka gah y tế tuk daok glaih glar pacang jit. Harei kabroi, Tổng thống Pháp Em-ma-nu-en Ma-crông hu tabiak panuac brei thau bruk pacang cakak negar dalam 5 adit piah pacang jit, meng mesup page (30/10). Min karei jang mbang pacang cakak negar di kreh bilan 3, dalam mbang pacang cakak ini, rilo labik ngak bruk di karja, abih di nyu lac dom sang bac, oh pacang cakak.

Peru bahrau hu sa urang ruak bạch hầu camereip hadei di  20 thun. Urang ruak lac uranaih kumei umo 5 thun,  dok di ban ine  Lima. Rajaei  Peru hu tabiak panuac khan chip ka jit ruak di negar, ba 50 kapul urang, hu bruk dong di cảnh sát song bol bala, piah pacang veik 130 boh sang di labik hu uranaih kumei ruak nan, piah duah dom urang ruak karei  meda hu. Ruak bạch hầu lac ruak  njom mbak chip, gam nhiễm trùng gam nhiễm độc song dom pandik harao trak damak di ruak kayua ngoại độc tố anek ruak  bạch hầu./.

Urang lang: M.Phuong & H.Pha - 29/10/2020 14:54:58