Quốc hội klak rabha saong bhap bini bhum kreh negar

Di mbang nyaom Quốc hội daok peih tabiak di Hà Nội, rilo urang Quoc hoi hu brei thau ka bruk pandik harao di bhap bini bhum kreih negar dalam mbang ribuk hajan ia sua meng blaoh, dalam nan hu mikva bangsa takik bhum ceik njauk khat lahik trak abih, meng menuac tal drap ar, sang danaok. Urang dang akaok Đảng, kanja, rajaei saong rahra jeng caik hatai sangka di abih tal bruk samar daong manuac njauk bala, daong bhap bini njauk bala samar tani tanat raidiuk. Langiu di bruk payua panuac rivang tal mikva bangsa takik njauk kan kandah dalam mbang hajan ia sua saong glut jaleih taneh, Đảng, rajaei hu pato tacei brei daong brah, daong jien, iek glang prien yava ka bhap bini.

  Piah dong ka dom sinh viên hu sang njauk kayua hajan ia sua song ribuk ka 9, rilo sang bac đại học hu pasang iek harak angan song iek tui hộ khẩu di dom adei  piah payua jien dong tui rilo jalan  yau: patrun jien bac, alin pok jien bac. Yaom dong ni yaom lac oh rilo duh song dom khat lahik di sang dom sinh viên bhum ia sua min dong ka dom adei yam tapa kan kandah anak meta song pabak pren bac daa. Gam song bruk dong brei ka sinh viên, dom sang bac đại học jeng peih bruk rik pataom dong pandap panda  ka sinh viên dom tỉnh gah kreih negar.

Kayua njauk dom mbang ribuk saong áp thấp nhiệt đới dalam bilan 10, di Bình Thuận hu rilo mbang hajan praong, ngak dauk rilo labik, ngak kan kandah trak tal bruk pala drak di urang ngak nong dalam tỉnh. Tui kuhria dalam tỉnh khat lahik labaih 3.228 ha padai saong njam patam, yaom jaik 50 tỷ đồng. Sở ngak nong saong patagok palei pala Bình Thuận brei thau: iek tui khat lahik, gah ngak nong hu panuac likau UBND tỉnh daong ka bhap bini, takik abih lac 2 triệu đồng/ha mayah khat lahik labaih 70% saong 1 triệu đồng/ha mayah khat lahik ala 70%.

Tổng công ty jalan pasei Việt Nam brei thau, bruk radeih pajeng pandap  SH3 ginuh tame radeih container di jalan canah 4 hu gai pacang di  ban  Dĩ An, tỉnh Bình Dương mesup ni (5/11) lac kayua gah jalan pasei. Bala rah tabiak kayua urang khik jalan oh pacang jalan veik, ba tal radeih pasei  SH3 ginuh tame radeih container nao tapa jalan pacang. Bruk nan rah tabiak di canah 4 jalan jalan Lý Thường Kiệt (tỉnh Bình Dương), radeih pasei  SH3 ginuh njauk radeih container dok nao tapa jalan pasei, ngak ka radeih jaoh jeng dua, urang peih radeih container njauk rambuac, jalan pasei njauk gar dalam labaih 3 tuk.

Baoh sang UBND TP HCM – lac danak dak padang ngak biak gheih hu umur 111 thun, daok di quận 1, bahrau hu Mintri ilamo Thể thao saong Du lịch dak tame angan inem mek pakat negar. Labik hu brei angan lac baoh sang praong di jalan Lê Thánh Tôn. UBND TP HCM hu jao khik ramik kanja ngan haong inem krung ni tui adat hukum ka inem mek ilamo. Lingiu di nan, mintri Bộ ilamo Thể thao saong Du lịch hu dak angan baha Linh Đông lac inem mek kiến trúc nghệ thuật pakat negar. Baha Linh Đông daok di phường Linh Chiểu, quận Thủ Đức, TPHCM, hu padang ngak di thun 1823 saong hu patao Tự Đức brei angan Thần Thành Hoàng thun 1852.

Mỹ tabiak truh Hiệp định Paris ka bruk biến đổi khí hậu. Tổng thống Donald Trump mbang camereip brei thau bruk khin tabiak truh Hiệp định Paris meng thun 2017, song hu panuac lac hiệp định ni ngak khat lihik ka kinh tế Mỹ, min mbiah tal harei ini Meng meda tabiak kayua dom hukum pambuak tal. Jabat Liên hợp quốc ka bruk biến đổi khí hậu, dom negar: Anh, Pháp, Chilê song Italia ndom lac bruk  Mỹ tabiak truh thỏa thuận ni hu ngak jeng labik huan  dalam jalan pambuak bruk  song kham merat di dunya piah mek hu jalan ngak di Hiệp định Paris. Min, tukvak  Mỹ dang langui Hiệp định ni mai meng bruk palih ruah Tổng thống, kayua ong Joe Biden hu ndom tal meda talap veik tui Thỏa thuận meyah mek hu jayah.

Piah pacang caga bruk tamuh gilac di jit praong Covid-19, Anh daok yam tame mbang pacang cakak dalam negar mbang ka 2. Bruk patakik nao mai dui atah 4 adit camereip, meng harei 5/11 tal puac harei 2/12. Mbang pacang cakak rilo labik ni hu rajaei Anh ba tame ngak dalam tuk jit praong Covid-19 ngak ka 492 urang Anh metai dalam 24 maong tapa, tagok 24% dut saong harei dahlau di nan, daok urang ruak tame sang iek ruak tagok tal labaih 12 ribau urang. Min, bruk pacang cakak mbang ka 2 hu brei thau lac "mbuan suak yava jang” dut saong mbang ka 1, tuk dom labik khik iek ranaih, dom sang bac, dalam nan hu gam sang bac đại học jeng daok hu peih pambang.

Gah Y tế dunya (WHO) khan lac dunya dok rah tapa tuk vak kan kandah di jit prong Covid-19. Bruk njom mbak ruak di dunya dalam dom bilan anak tal biak samar, abih di nyu nan lac di labik bắc bán cầu. Tui yaok pataom bahrau di abih angaok blah Worldometers, di dunya urak ni hu  labaih  48 triệu 400 ribau urang njom Covid-19 song labaih 1 triệu 200 ribau urang metai. Mỹ jeng lac negar njom glong di abih ngan song labaih  9 triệu 800 ribau urang, hadei di nan lac  Ấn Độ hu labaih  8 triệu 300 ribau urang song Braxin hu jiak 5 triệu 600 ribau urang njom Covid-19./.

Urang lang:Thu Thảo –H.Pha - 5/11/2020 16:06:34