Quoc hoi gimum biai harei 8-4

  Mesup ini (8/4), meng hu rilo urang QH njauk hatai, nan ye QH brei tapa sarak ka bruk Thủ tướng Rajaei likau pok dom urang ngak dom Phó Thủ tướng rajaei, dom akaok mintri saong dom urang karei di rajaei. Bí thư Thành ủy Hải Phòng Lê Văn Thành saong urang dahlau daih ngak Tổng Thanh tra rajaei lac ong Lê Minh Khái hu tagok ngak Phó Thủ tướng. 12 akaok mintri, urang di rajaei jeng hu Quốc hội pasang iek, brei pok ngak. Yau nan, hadei di tuk pasang iek, pilih ruah, pok ngak, rajaei urak ini hu 28 urang.

Akaok Cục Y tế pacang caga – Mintri Y tế mesup ni (8/4) brei thau:  hadei di labaih sa bilan peih bruk klauk vaccine AstraZeneca pacang Covid-19, urak ni hu labaih 55.000 urang lac urang ngak y tế, duah thau dịch tễ, dut iek, di  19 tỉnh  ban, hu klauk mbang ka sa. Mintri  Y tế hu panuac khan ka bruk parabha labaih 800.000 mbang vaccine kayua Covax dong. Pasak pasang iek ruak kik  di  63 tỉnh ban, công an, bol bala, danak dak klauk jru peih prong pakat negar lac dom jabat hu pabak  vaccine. Dom jabat nan hu panuac ieu ngak salah bloh bruk klauk jru dahlau di harei  15/5.

Piah lang talaih tavak tavaiy, jhul samar bruk padang ngak dom danak dak, UBND tỉnh Bình Thuận jao ka Sở Kế hoạch saong Đầu tư pambuak bruk haong Sở Tài nguyên - Môi trường, UBND dom huyện, ban sit saong dom gah pambuak tal, pasang iek veik taong abih dom danak dak hu adat brei ngak dalam tỉnh Bình Thuận; neh rabha tui janih, tui gah cambaih laih. Anak meta, Bình Thuận  pataom tame pasang iek dom danak dak hu adat brei ngak meng 2015 nao, min tal urak ini oh ka peih ngak atau daok ngak hu meteh dhi. Dom danak dak oh hu prein peih ngak ye khang hatai mek veik tui njauk hukum.

Mesup ni, Tòa án bhap bin tỉnh Đắk Nông peih veik mbang  langyah bruk  ngak tabiak, pablei salih  xăng ja prong abih meng dahlau mai ngan song 39 urang, kayua  Trịnh Sướng pal akaok. Tapa pasang iek, công an brei thau meng bilan 1/2017 tal bilan 5/2019, dom urang nan lai, ngak tabiak labaih 137 triệu lít xăng ja, jiak 1,6 triệu lít menyek DO ja. Yaom xăng menyek ja hu pablei tabiak drak pasa jiak abih, duah hu labaih 102 tỷ đồng. Phiên tòa tui kurhia  rah tabiak tal puac bilan  4.

UBND tỉnh Long An hu harak payua Thủ tướng rajaei ka bruk cuh phao bingu di tuk lễ 30/4 tal. Dahlau di nan, Long An daok kuhria peih bruk cuh phao bingu melam  palao thun klak, raok thun bahrau anek sak kbao thun 2021. Min kayua jit ruak Covid-19 nan ye bruk cuh phao bingu brei padeih. Dom pháo bingu yaom labaih 5 tỉ đồng hu blei meng jien ieu pataom di rahra nyu abih tukvak pandar di bilan 5/2021 saong njauk mek veik. Kayua yau nan ye, UBND tỉnh Long An daok kuhria cuh phao bingu salam uan nyaom roya Đảng jak jeng siam mekre saong salam uan bruk pahadar 46 thun harei yasa taneh ia. 

Karja Tổng thống Mỹ Joe Biden khan lac  hu dong  235 triệu USD ka urang Palestine jang yau pasiam veik dom bruk dong karei dahlau deih njauk karja ong Donald Trump brei klaak. Tui nan, Washington pabak 150 triệu USD tapa jabat dong brei song bruk ngak ka  urang tị nạn di Liên Hợp Quốc; 75 triệu USD dong kinh tế song patagok tapak 10 triệu USD ka dom danak dak padang ngak siam mekre salamad. Bruk ni lac sa binah kham merat di karja Mỹ piah pasiam veik talei pambuak bruk 2 gah hong Palestine.

  Harei ini, New Zealand brei padeih bruk tame negar ngan saong dom urang mai meng Ấn Độ meng harei 11/4 tal harei 28/4, hadei di tuk mboh rilo urang njom Covid-19 meng Ấn Độ tame negar ini. Lingiu di nan, 1 urang ngak bruk dalam dom labik brei daok karei njauk njaom Covid-19 jeng lac makna ngak ka New Zealand mbang camereip di abih oh brei rahra di drei daok di negar lingiu mai veik taneh ia. New Zealand jeng tabiak bruk lac tok klauk vaccine caga Covid-19 ka menuac ngak bruk pacang jit.

Jabat khik iek bala di Indonesia brei thau, kuhria tal abih harei 7/4, ribuk nhiệt đới Seroja ngak ka 138 urang metai, 61urang lahik song labaih 2.000 urang njauk panduan nao labik karei. Bruk duah urang gaok bala lahik di dom labik kan si tame kayua langik jhak, hajan khang dok rah tabiak. Rilo labik urak ni oh nao mai hu song kan kandah ka bruk pambuak pagam. 4 sruh kapan haoh trực thăng hu nao tal dom labik nan piah brei pandap ka bhap bini di bhum ia sua./.

Urang lang: Ai Nghiem – H.Pha  8/4/2021- 16:39:36