Ong Ngô Thịnh Đức, Akaok kapul ilamu kỹ thuật tatua jalan Việt Nam brei thau bruk jalan mbak nao mai gah meraong daok tavak tavaiy

Di nyaom biai sa dalam dom kadha hu dom urang lambaok ba tabiak nan lac jalan mbak nao mai gah meraong daok tavak tavaiy, oh ka hu peih ngak samu gauk, kan kandah dalam bruk pambuak pagam, patrun bruk meriak gauk dalam dui pachreih urang buh jien tame ngak, rilo danak dak kuhria peih ngak min tal urak ini jeng oh ka peih ngak. Ong Ngô Thịnh Đức, Akaok kapul ilamu kỹ thuật tatua jalan Việt Nam brei thau, pambuak pagam Miền Đông saong Miền Tây daok suai damuai saong oh pambuak pagam hu bhum taneh, ini lac kadha daok tavak tave dalam tukvak tapa :“pambuak pagam bhum taneh Đông Nam bộ saong Tây Nam bộ ngak jeng sa bhum taneh kinh tế prong piah palahik bruk glaong biar di gauk gah jien mek tame di dom tỉnh miền Đông saong miền Tây. Khaol drei pambuak pagam bhum taneh habar ka nyu catang, khaol drei pataom tame ngak meng ini tal thun 2025 saong 2030 langyah ka nyu blaoh saong ngak ka bahu jalan nduac nao tal Cà Mau di thun 2030.”

Brei mboh dom hagait daok rah tabiak di tỉnh, ong Dương Văn Thắng, Phaok akaok UBND tỉnh Tây Ninh brei thau, jalan meng Tây Ninh tal Cần Thơ atah jaik 230 km min abih tal 6 tuk meng nao tal Cần Thơ. Tỉnh ini tok hu sa jalan piah pambuak pagam haong bal raya HCM nan lac jalan Roya 52 yaok harei hu labaih 27.000 sruh radaih nao mai ba tal gar jalan: “Piah ngak jalan cao tốc bal raya  HCM – Mộc Bài, kol dahlak hu nao yaok iek mboh  radaih nao mai biak rilo, container nao tapa pabah mbang dunya Mộc Bài sa harei jaik 600 sruh, tok hu sa bruk hagait sit oh lagaih ye gar jalan 5 – 10 cây số”

Dalam bruk padang ngak jalan mbak negar tal thun 2030 pamong tal thun 2050 hu kuhria ngak jaik 5.300 km jalan cao tốc dalam negar. Dalam nan, bhum Đông Nam bộ saong Tây Nam bộ ba jalan ngak lac gam ramik veik, gam pabak tame ye tui kuhria hu jaik 2.300 km jalan cao tốc. Ong Lê Đỗ Mười, akaok Viện Chiến lược saong cak rok patagok jalan mbak pajeng ba, Mentri jalan mbak pajeng ba brei thau, bruk pambuak pagam di Đông Nam bộ saong Tây Nam bộ urak ini daok lac tanut gar gah jalan mbak saong tanut gar ini hu langyah dalam quy hoạch mbang ini. Meyah khaol drei peih hu jalan meng bal raya HCM tal Cà Mau thun 2030 nan lac jalan ngak prong di bhum.

Thứ trưởng Mentri jalan mbak pajeng ba Lê Đình Thọ ndom lac, bhum  taneran kraong CL oh neh tabiak truh bal raya HCM hu, bruk pasiam dom jalan cao tốc meda ngak jeng pren khang pambuak pagam bhum taneh, khu kinh tế, đô thị saong khu ngak kong. Ini lac quy hoạch jalan mbak nao mai dalam negar saong brei mboh hu bruk pambuak pagam bhum taneh prong, ngak jeng pren khang cak rok patagok kinh tế, xã hội ka abih bhum. “Quy hoạch harei ini dahlak caong khin dom adei sa-ai roh duah njauk brei panuac ka mạng lưới, tuk mạng lưới hu cambaih ye drei ba tabiak jalan ngak, pak ini quy hoạch lac jalan mbak nao mai dalam negar ye nyu brei mboh asal kadha pambuak pagam bhum taneh biak prong, ngak jeng pren khang ka sa bhum taneh. Langiu di puk palei nyu daok lac pambuak pagam bhum, kayua yau nan ye dom adei sa-ai kuhri kuhria mong iek quy hoạch yau nan, buh jien tame ngak yau habar ka nyu siam.”

Dalam dự thảo pathau khan Quy hoạch jalan mbak nao mai dalam negar, jalan ngak tal thun 2030, meda lac ngak hu dom jalan cao tốc pambuak pagam dom pasak kinh tế, kham merat tal thun 2030 hu labaih 80% dom tỉnh, ban hu jalan cao tốc pambuak pagam, dalam nan pataom tame ngak dahlau jalan cao tốc Bắc - Nam gah timur, dom jalan cao tốc pamong tame gah Barak saong gah Meraong./.

 Urang lang: Jasi – 23/12