Sang sa-ai Lê Văn An mai daok di xã Khánh Lâm meng thun 2003. Sang ong hu 7 ha taneh glai. Tui adat, ong hu salih 30% taneh piah pala darak. Harei nan, bhap bini tok angak padai, bo yaok bilanyauk meyah ngak njauk meng hu 10 ja padai dalam sa công nan ye biak kan kandah. Hadei di nan, ong An khang hatai pok ar pala phun mbang baoh ngan saong 200 got phun kruac bung, pa-ok, dalam danao raong ikan ia taba. Hadei di 3 thun, yaok phun kruac bung paik baoh pablei mek jien tame sumu 4 ja padai. Meng kein laba di phun mbang baoh ba mai rilo jang dom mbang dut saong ngak padai, ong Lê Văn An peih praong bruk pala di abih taneh ngak nong di sang drei: “Ngak iek 5 công taneh sit, gam taneh bein saong ribaong. Yaok thun mek hu 30 triệu đồng meng bein phun mbang baoh, raong ikan yaok thun duah hu dom pluh trieu. Patak pataom hu phun jien brei peih praong taneh pala drak. Phun mbang baoh brei jien tame glong, dut saong ngak padai ye glong jang jaik pluh mbang.”

Langiu  di nan, sang ong An daok hu pala dom janih njam patam ala phun mbang baoh. Jien mek tame meng njam patam hu daong ka sang ong cai pandar yaok harei. Daok jien mek tame labaih 100 triệu đồng yaok thun meng phun mbang baoh saong ikan ia taba hu daong ka sang ong oh lac tabiak truh kathaot bo daok dak harei dak kaya meda.

Mboh kein laba meng bruk ngak nan, karja palei hu daong phun jien saong pachreih bhap bini dalam palei ngak tui, pambak praong. Sa-ai Nguyễn Văn Tình lac sa dalam dom baoh sang hu mesre phun jien laba takik piah ngak mbang patagok raidiuk. Tuk camereip sa-ai Tình bac megru pala iek njam patam tui jalan hacih sa-at. Mboh njam patam pablei tabiak hu tani tanat, sa-ai Tình  padang sổ đỏ mesre jien di gilang pariak piah ngak ro abih taneh praong labaih 1 hecta. Langiu di bruk buh jien tame ngak sang halam njol labaih 400 met vuông piah pala njam hacih, taneh daok veik sa-ai pala phun mbang baoh saong raong ikan ia taba. Bruk ngak nan tagok hu kein laba saong daong ka sang sa-ai Nguyễn Văn Tình cak rok patagok: “ Dahlak mboh bhum taneh pak ini njom ia lakhun yau nan ye pandar khak lân, cur saong khak limo sraw gauk piah palahik lakhun, blaoh pala mboh hu. Mikva thau ilamu pala drak sangka tui iek ye njam tamuh biak siam. Dahlau diah dahlak pala iek, hu labik pablei ye sahanang hatai. Taneh pala njam atah phuh mét vuông min dahlak paik pablei hu 600 ribau đồng.   

Meng kham merat di karja saong bhap bini dalam bruk pala drak bo urak ini jien mek tame kuhria tui akok manuac di xã Khánh Lâm hu 45 triệu đồng sa urang sa thun. Thun 2016, xã hu labaih 1.100 baoh sang kathaot, dang kaok tỉnh Cà Mau, tal urak ini tok daok labaih 200 baoh sang kathaot, meblah oh ka tal 6%, Abih di nyu, Khánh Lâm lac sa dalam dom palei hu jalan mbak palei pala siam abih di huyện U Minh. Ong Huỳnh Thanh Luol, Phaok Akok xã Khánh Lâm brei thau, hu jak jeng yau nan meng hu bruk pataom tame cak rok patagok kinh tế. Tuk raidiuk bhap bini ginup meda ye mikva abih hatai rik tame daong rilo bruk ka xã hội:“Yaok thun, Đảng bộ xã pataom tame bruk pathau khan, jak ba mikva pambak praong dom bruk ngak mbang hu kein laba di xã. Meng nan, mikva yam tagok tapa truh kathaot. Khol dahlak pataom tame tacei pato dom bruk praong yau brei peih praong bruk ngak hu jak jeng yau raong ikan ia taba, pala njam patam, baoh kayau. Tapa nan, yaok thun baoh sang kathaot trun daok takik.”

Dalam bruk padang ngak palei pala birau, xã Khánh Lâm ngak hu 15 dalam 19 tanut chuẩn. Xã daok kham merat ngak brei salah dom tanut daok veik piah hu jeng xã ka 4 di huyện U Minh mek hu angan palei pala birau dalam thun ini./.

Urang lang: Aí Nghiêm  3/7/2020