Ong Điểu Ngon, urang bangsa STiêng daok di palei Tà Nốt, xã Lộc Thiện, huyện Lộc Ninh, tỉnh Bình Phước

Palei Tà Thiết, xã Lộc Thịnh, huyện Lộc Ninh, tỉnh Bình Phước daok atah di jalan tapen nagar Campuchia oh hadom, rahra di labik ini daok takik dalam dalam glai cao su. Sang muk Trần Thị Chi, daok gah dalam glai cao su palei Tà Thiết, labik takik manuac nao mai. Ini lac labik oh hu điện, oh hu rayak phone, nan ye takik thau bruk di gah lingiu. Dalau di Tết meng blaoh, nao darak pasar, muk Chi mahit urang ndom mayai tal jit ruak angan “virus Corona”, min oh thau nyu kanjah jhat yau habar nan ye oh caik hatai tal. Blaoh bahrau ini, tuk bộ đội biên phòng mai tal sang khan brei thau, pandar cuk khẩu trang tuk tabiak jalan, labik ralo menuac, blaok sua tangi muk Chi meng thau, ini lac jit praong daok ngak srau kadau dunya. Duh hatai di abih lac bahrau ini, hu ralo menuac di gah Campuhia duah jalan mai Việt Nam piah dauk jit, nan ye muk haong urang dalam sang njauk caga huac njom mbak. Sa bilan dahlau, Bộ đội biên phòng jeng hu padang bilai di jaik sang muk, nan ye muk jeng mboh sanang hatai: “Meng harei bộ đội bien phong mai ini ngak labik khik iek rah tui jalan tapen negar, daong mikva puk palei blaoh khan brei thau ka jit ruak Covid-19, mikva meng thau jit pambak ruak yau habar. Meng nan meng thau jalan pacang caga”.

Bình Phước hu labaih 260km jalan tapen negar haong Campuchia, dalam nan hu 100km jalan tapen nagar  daok dalam huyện bhum ceik Lộc Ninh. Piah ka bhap bini thau ka jit ruak, luac jaik 2 bilan blaoh, di 16 xã haong ban sit huyện bhum ceik Lộc Ninh yaok subuh page  haong biar harei sup, sap loa papar sap khan brei ka mikva thau ka  bruk jit ruak. Abih di nyu lac tuk Chỉ thị 15 haong 16 di Thủ tướng Rajaei ba tabiak dom jalan samar drah pacang caga jit Covid-19.

Di dom labik daok atah palei, loa papar sap pang oh hu, Bộ đội biên phòng brei dom urang jaka, urang lin nao tal yaok baoh sang piah brei siuk pacang mbaok, dhung, tacei mik va jalan pacang caga jit. Kayua yau nan ye, dalam luac tukvak peih bruk brei menuac sia daok atah di gauk, takik taom gaok gauk, mikva urang bangsa oh lac ngak njauk ngak siam bo daok ba tangin tame haong urang jakar pasang iek puk palei, caik hatai tal dom bruk urang nao mai tapa jalan negar oh njauk hukum. Ông Điểu Ngon, urang bangsa STiêng daok di palei Tà Nốt, xã Lộc Thiện, huyện Lộc Ninh, tỉnh Bình Phước khan lac: “Drei daok di bhum atah bayah, oh thau jit ruak yau habar, bhum tapen negar urang ph brei nao mai yau ini drei biak uan tabuan. Bộ đội urang pathau khan ye mikva pang tui, taom gaok urang karei biak huac mbak ruak Covid-19 tame rup drei. Nan ye urak ni mikva tagok puhblaoh mai sang, oh tabiak langiu, mbang huak di gah langiu jeng takik veik”.

Oh padieh di nan, ngan haong bhap bini hu agama daok di labik tapen negar, piah paglaong siam lagaih pacang caga jit, abih dom nhà thờ, nhà nguyện di dom giáo xứ jeng padieh ngak thánh lễ saong dom bruk di agama. Di Giáo xứ Châu Ninh, huyện tapen negar Bù Đốp, tỉnh Bình Phước hu labaih 500 giáo dân urang bangsa. Meng krieh bilan 3, giáo xứ brei padieh abih dom bruk pataom rilo manuac. Giáo dân ngak adat agama di sang piah pacang caga njom mbak jit Covid-19. 

Tui ông Điểu Xaren, urang dang akaok giáo khu Bù Tam, huyện Bù Đốp, ini lac sa bruk oh mbuan dalam harei tabung glaong di Tuần Thánh haong harei Phục sinh di urang tui agama. Min dalam tukvak ini bruk padeih pataom rilo menuac lac bruk ba tangin tame haong rahra dalam nagar pacang caga jit, oh lac kayua salamat ka rup drei, bo daok lac bruk ngak bak hatai anit ranam urang karei, jeng yau menuac sia angaok dunya: “Jeng hu dom mikva oh thau nan ye mai sua tangi hulin. Hadei di lang yah, mik va jeng thau hu bruk nan, tuk halei Rajaei tabiak panuac lac abih jit ye mikva meda nao cầu nguyện veik, oh thei pakauk hagait. Urang công giáo pak ini thau cambac bruk ini”.

Gam haong bruk peih ngak hu siam dom jalan pathau khan, padang rilo labik khik iek rah tui jalan tapen negar pacang caga jit tui tacei pato di Thủ tướng Rajaei, bruk pachreih tui di bhap bini, bruk khang hatai di karja haong dom gah di palei hu daong ngak siam bruk pacang caga jit Covid-19. Tỉnh Bình Phước pacang cakak hu dom menuac meng gah daih jalan negar tame mai oh njauk hukum; patrun patakik tal tanut biar di abih dom jalan njam mbak meng bhap bini. Mbiah tal tuk vak ini, taong abih bruk khik iek rah tui jalan tapen negar di Bình Phước daok hu ngak catang piah pacang caga hu siam jit Covid -19./.   

(Urang lang: Thu Thảo – 21/04)