Dom anek saih bangsa takik hu nao bac daa 

Boh sang praong siam di  ong K’Lộc padang tapen jalan palei bahrau hu tuh bê tông hacih saat di bon Bu Rá, xã Đồng Nai Thượng. Ong K’Lộc brei thau, bon Bu Rá harei ni salih bahrau mbaok meta meng  hu phun jien buh tame ngak di karja gam song bruk brei taneh, rik pren, dong drap ar di bhap bini.

 “Piah peih jalan meyah taneh sang halei gam tame jalan  ye mik va halan hatain brei taneh. Kayua karja ngak jalan piah dong ka bhap bini patagok bruk ngak nong, palei pala di  xã drei”.

Gam song jalan điện, jalan mbak, sang bac, blai iek ruak hu sangka padang ngak, bhap bini jeng kham merat salih janih phun pala, athur rong, ba ilamu kỹ thuật tame bruk ngak mbang, pala drak. Tui nan, rilo sang yam tagok tabiak truh kathaot, ngak kaya meda di bhum palei di drei.

Muk Điểu Thị Prợt-Phó Chủ tịch UBND xã Đồng Nai Thượng brei thau, meng labik kurang mbang, kurang cuk, ngak mbang tui jalan klaak, urak ni meng ngak siam rilo danak dak di karja, xã Đồng Nai Thượng hu salih bahrau mboh di anak meta. Dom mblang padai dahlau deih urak ni hu salih tapa dom janih phun pala brei kein laba kinh tế glong. Urak ni dalam xã, hu labaih 1.000 ha pala paaok blait, cao su, cà phê song phun mbang boh yaok thun ba jien tame ka dom boh sang yaok rituh triệu đồng.

  “Tong abih bruk pathau khan jak ba tui sarak di  Đảng, hukum di karja  jeng hu bhap bini sangka, pachreih tui. Meng bruk ngak mbang sit sot, oh tani tanat, urak ni mik va thau pandar  khoa học kỹ thuật  dalam bruk pala drak rong glang.

Gam song dom salih bahrau gah ngak mbang song mbaok meta palei pala hadah hadai, akaok sahaneng ka dom bruk xã hội di mik va dom puk palei Đồng Nai Thượng jeng hu siam tagok. Dom adat cambat klaak  yau  tảo hôn, tok duik tok pasang dalam ralow darah meng rilo rai ni mai, hu tah klaak.  Saai Điểu Thị Réo daok di palei Bù Gia Rá brei thau,  dahlau deih urang kamei dalam palei, tuk ndik tapui ye pagam pambak tame muk mbui, tuk ruak kik brei hu gru ieu yang. Min, urak ni, hei jeng  jia tame urang jakar y tế song nao iek ruak di blai y tế xã:

“Ruak kik mik va oh yau dahlau deih dok di sang ieu yang.  Urak ni, mik va ruak kik atau ndik tapui hu ba nao blai  y tế iek ruak”.

Ong Điểu K’Giắc-Bí thư Đảng ủy xã Đồng Nai Thượng bui sambai khan lac, rai duik di mik va dak harei dak salih bahrau. Meyah thun 2010 dalam xã hu labaih meteh dom sang kathaot  ye urak ni dalam  xã hu  417 boh sang song labaih 1.900 urang, dok 17 boh sang kathaot min, jien mek tame kuhria tui akaok menuac  hu labaih  40 triệu đồng/thun. Xã hu ngak salah  19 tanut song puac thun ni taduan hu angan xã mek hu tanut palei pala bahrau.

  “Xã bahrau padang yau nan ye dom danak dak pagam tal bruk  quy hoạch, bayar jien giải phóng mặt bằng biak rilo. Bruk njauk uan tabuan nan lac urang jakar, urang đảng tuk halei jeng nao dahlau dalam bruk brei taneh padang dom danak dak kein laba ka puk palei. Meng hu urang jakar, urang  đảng nao dahlau yau nan, bhap bini biak njauk hatai  pachreih tui,  nan ye bruk pathau khan biak siam lagaih  ”.

Nao tal Đồng Nai Thượng mboh hu bruk salih bahrau mboak meta di bhum taneh kan kandah dahlau deih, thei jeng mboh bui sambai ka mik va pak ni./.

Urang lang: Hanipha - 21/11