Jalan mbak hu tuh betong mik va nao mai lagaih 

Daok atah di ban sit Liên Dương oh ka tal 30 mbaik jalan, min dalam dom thun 90, uang halei khin tame tal xã Phan Dũng njauk caga pandap mbang, ia menyum ka dom harei nao jalan, tapa craoh, tapa mbon ceik… biak glaih glar. Min urak ini, meng tuk hu Karja ngak jalan menyek, blaoh jalan điện jeng hu dui mai, mbaok meta palei pala xã Phan Dũng, huyện Tuy Phong, Bình Thuận hu salih bahrau saong dak harei dak hadah hadai tagok.

Kol dahlak nao tal UBND xã njauk di tuk urang jakar daok ieu pataom rahra piah khan brei thau Chỉ thị 16 di Thủ tướng Rajaei ka dom jalan njauk ngak chip piah pacang caga jit COVID-19. Ong Hoàng Văn Duy, urang pan akaok UBND xã Phan Dũng brei thau, dalam xã urak ini hu labaih 265 sang gam saong labaih 810 urang lac bangsa Raglai. Lac xã biak kan kandah nan ye Phan Dũng tuk halei jeng taduan hu bruk sangka di Đảng saong Karja. Tal urak ini dom sang dalam xã rilo meng hu daong padang ngak sang khang kajap; taong abih dom baoh sang di mikva hu pandar điện negar saong hu ia hacih piah pandar. Sang bac, bilai iek ruak jeng hu padang ngak siam, pabak hu bruk bac daa saong iek glang prein yava ka mikva pak ini:

Meng hu bruk sangka di dom pakat karja brei ka xã biak kan kandah ini, yau bruk salih janih phun pala, anek athur raong. Urak ini xã jeng hu phun pala lavik thun yau kruac bung saong dom janih phun katut harei karei karei. Lingiu di nan, mikva daok hu ngak padai ia.

Thun 2019, abih tih taneh ngak padai di xã Phan Dũng lac labaih 331 ha, samu 132% bruk ba tabiak, padai ngak hu abih tih jaik 2.000 tấn. Labaih 95 ha padai mùa di bhap bini pak ini urak ini daok tamuh siam. Bruk njauk biai nan lac bhap bini thau ngak tui dom ilamu bahrau, salih janih phun pala ka nyu lagaih, rilo sang raong limo, pabe, pabui jhuk saong blei jamriak la-ua piah ngak ngak nong. 

Mai tal Phan Dũng di bilan pandiak bhang min labik ini jeng daok hu sambo hijao that li-an bingi di dom glai ram saong mblang padai mekre, siam, meng hu dom ribaong atah, ba ia pruh ka hamu, puh, ka dom bein kruac bung, bein kandiuk… di mikva daok tabiak bingu, ndam baoh. Urak ini, bhap bini bangsa Raglai pak ini oh daok am cuh glai ngak puh bo hu tani tanat labik daok, labik pala drak. Rilo sang tabiak truh kan kathaot meng ngak padai yaok thun 3 mbang, pala phun mbang baoh, raong athur, raong menuk ada saong taduan khik iek glai. Tuk ruak kik, pandik harao, bhap bini thau nao tal bilai iek ruak atau sang iek ruak piah pasiam ruak. Raidiuk trei sir, bhap bini jeng sangka jang tal bruk bac da-a di anek bhik, taong abih uraniah jeng hu nao bac.

Di xã Phan Dũng hu labaih 200 sang ye hu tal 100 sang hu jao brei khik iek glai. Ong Mang Khoan, sa urang khik iek glai brei thau: yaok klau bilan, sa sang taduan hu labaih 1 triệu đồng jien khik iek glai, lingiu di nan, daok hu mek dom pandap tamuh tui glai. Hadei di mbang nao glai, ong caik tukvak piah iek glang 1 ha padai haong 200 phun kandiuk di sang. Bruk pala drak jeng mbuan lagaih jang meng hu jamriak:

      Urak ini hu radaih, hu jamriak ngak bruk tani tanat jang dahlau. Dahlau daih yuak padai meng tangin glaih lô, glaih di abih lac bilan hajan ngin, daok urak ini bingi sahanang lô, hu jamriak ngak abih. Blaoh daok hu Pasak bruk ngak bhum ceik buh brei dahlau pajaih, khak drak... siam jang dahlau biak rilo.

Lingiu di ngak padai, mikva Raglai pak ini daok hu pala dom janih phun mbang baoh saong njam patam baoh kraoh karei karei. Sang sa-ai Mang Kha daok di xã Phan Dũng hadei di tuk pala iek 50 phun kruac bung brei rilo baoh praong, siam, nan ye peih praong taneh pala. Urak ini lingiu di 200 phun kruac bung daok tabiak bingu, sa-ai Mang Kha daok hu pala tamekai angaok taneh hamu dalam bilan pandiak thu:

       Ngak piah taneh hijao jang, bilan halei drei pala phun nan, kham merat pruh ia. Muk kei drei ndom taneh lac ameh, hu ngak meng hu ameh. Urang Cam, urang Raglai tok thau ngak hamu, ngak puh piah hu jien, hu drap ar.)

Tuk pandap mbang pandap huak hu ginup, hatung hatian di mikva bangsa Raglai di xã Phan Dũng jeng hu chreih chrai jang. Dom kadha daoh khan, dom ragam mã la, sap cha-pi… meng kan jeng daok yava tagok tapen ché alak cần di dom melam ia bulan hadah. Dom kadha daoh khan meng kan di urang Raglai ndom ka raidiuk di bhap bini labik glai ram, ceik glaong, tuk yamen bingi yau ia craoh la-an, tuk khang kadang yau ngin ceik glai…ngak pachreih hatai urang pang.

Nao rah tapa dom jalan dalam xã di tuk ia harei tame ceik, atah atah lac rup binguk dom kumei dara Raglai bak yot rabung, yot tangei mai sang, dom ong muk taha daok la anak pabah mbang sang laik tangei, pak yot, ndom klao chreih chrai. Daok kol anek naih ba gauk me-in sambai di mblang bein sang ilamu, dom likei dam pataom gauk taong valei… Dom drei pabe, tapon limo hu teok mai veik var ro… Phan Dũng biak sron mbon dalam biar harei sup di dom harei bilan 4 sajarah./. 

Mousaphuong-19/4