Dom tỉnh samar pasang iek sdom danak dak dự jalan mbak nao mai njauk khut jaleih kayua bala

Rajaei bahrau brei dong chip 1.350 tỷ đồng piah pasiam veik dom khut tayah kayua bala meng langik tasik thun 2021. Dalam nan,2 tỉnh Quảng Ngãi song Phú Yên yaok tỉnh hu dong 160 tỷ đồng. Tui sarak ni, dom tỉnh samar pasang iek sdom danak dak dự jalan mbak nao mai njauk khut jaleih kayua bala, ribuk, ia ndik ia sua, (dalam nan hu ar pacang, danak dak pacang glut jaleih, panidka bhang, ia njom mbak, krong ribong, bruk nao mai dalam tỉnh, y tế, sang bac, danak dak pabik ia hacih saat, labik ngak bruk song dom danak dak karei karei) njaku labik, njauk menuac urang dong; parabha cambaih laih phun jien ka dom danak dak, jalan ngak tui njauk adat di hukum kadung jien karja, hukum Đầu tư công.

Kuhria tal bilan 12/2021, hu taong abih bruk ngak harak gar hành chính di tỉnh Bình Dương hu peih ngak tui jalan online. Meng hatai kham merat salih bharau bruk ngak harak gar hành chính ka nyu siam lagaih jang saong caga lagaih haong yaok tukvak pacang jit COVID-19 dalam vaktu bahrau, tỉnh Bình Dương hu tacei pato dom pakat, dom gah pataom tame ngak khang piah peih ngak dịch vụ công online pakat 3, pakat 4 samu gauk di pakat tỉnh, pakat huyện haong pakat xã . Bruk peih ngak dịch vụ công online hu daong ka bhap bini, doanh nghiệp patak pataom jien ndo saong tukvak nao ngak harak gar, gam haong nan, pacang aga hu siam bruk urang jakar pambak tame bruk ngak di drei piah ndok mbang jien padai, ngak kan rahra haong doanh nghiệp.

Piah samar pacang cakak biến thể Omicron, Sở Y tế tỉnh Ninh Thuận hu jalan ngak pok tagok UBND tỉnh ka bruk padang 2 labik brei dok karei iek ruak karei di gauk ka dom biến chủng Delta song biến thể Omicron. Meyah dalam tỉnh hu urang ruak njom COVID-19 njom biến thể Omicron ye brei dok brei , ie kruak karei. Dalam dom harei tapa urang njom COVID-19 dalam tỉnh dok trun . Kuhria tal bier harei 2/1, dalam tỉnh daok taong ruak ka 460 urang ruak song hu 53 urang ruak COVID-19 metai.

Labaih 500 SV dom sang bac ĐH, CĐ dalam ban raya HCM lambaok ka jaik 50.000 urang lin halan hatian hu mbaok tuk tabiak brukh “Xuân halan hatian” mbang ka 14 thun 2022. Bruk Xuân halan hatian dui atah tal abih harei 30/1/2022, bruk praong lac 4 danak dak: “Tết salamat”, “Xuân klah rabha”, “Xuân urang lin”, “Tết văn minh”. Dua harei ngak bruk tabung glaog lac: “Dam dara ban raya angan Wa ba gauk tame pacang caga jit COVID-19” di harei 09/1 haong harei “Urang lin Xuân halan hatian klah rabha kayau an sinh xã hội” di harei 23/1. Taphia nan, daok hu rilo bruk praong yau bruk papaok 5.000 ahar bánh chưng, pei nung, alin hadiah 4.000 pok pandap tết ka anek saih, SV, uranaih ruak, urang ruak kan kathaot, urang gaok kan kandah tapa meng jit COVID-19 haong dom bruk ngak halan hatian di huyện pulao Phú Quý, tỉnh Bình Thuận. Gam haong nan, peih 25 kapul tacei pato jalan iek glang prein yava ka F0 daok taong ruak di sang.

Hadei di rilo bilan kandang joa kayua jit ruak COVID-19, dalam dom harei akaok thun bahrau 2022, dom labik du lịch di tỉnh Tiền Giang song Bến Tre hu rilo tuai mai rivang main, tuai damuai tagok meng 4-5 mbang dut song yaok harei , rilo meng lac tuai dalam negar. Peih ngak sarak 128 di rajaei , urak ni ni gah du lịch Tiền Giang, Bến Tre hu danak dak, jalan ngak pasiam veik song patagok gah du lịch tui jalan duikrai salamat haong jit ruak . Dom labik, doanh nghiệp ngak mbang du lịch gam patagok bruk pabak, gam pacang caga jit Covid-19, khik ramik siam mekre pren yava ka tuia rivang main. Tuai damuai rilo dalam dom harei akaok thun bahrau yau brei mboh bruk bui sambai, hadah hadai dalam thun bahrau ka gah du lịch di bhum taneran krong CL.

Kinh tế bhum châu Á brei mboh lac daok siam veik tuk pandap ngak kong di dom taneh ia kinh tế praong jeng tagok khang dalam dom bilan puac thun 2021. Tui dom taong yaom bahrau di abih, dom pandap ngak kong di dom taneh ia kinh tế praong di bhum châu Á yau Trung Quốc, Japon, saong Hàn Quốc tagok tal tanet glaong di abih dalam dom bilan puac thun 2021. Gah chuyên gia kinh tế jeng kuhria mboh dahlau lac, dalam pluh thun tal, kinh tế dunya meda tagok yaok thun 3,2%, biar jang hasit dut saong tanut kuhria rah tapa lac 3,5% dalam vaktu 2010-2019. Bruk di dom taneh ia kinh tế praong daok salih karei, abih di nyu lac Trung Quốc.

Harei 2/1, gah tình báo di karja Taliban brei thau lac brei tuh klaak labaih 3.000 lít alak trun krong di Kabul tui bruk kham merat pacang ngak song pablei salih alak di Afghanistan. Sa urang jakar ndom lac dalam video ba tagok di angaok blah Twitter: “Urang Muslim brei ngak catang tui bruk oh ngak alak song pablei alak ”. Bruk pablei salih alak oh brei ngak meng karja Afghanistan dahlau deih. Meng di tuk gah Islam tagok pan akaok taneh ia di kreih bilan 8/2021, bruk pasang iek hu tagok khang di dalam taneh ia. 

Amuk taha Kane Tanaka hu peih bruk uan harei menek, harei ndih tapui mbang ka 119 haong ayut sahabat dalam sa labik iek glang urang taha di tỉnh Fukuoka, gah meraong negar Japon. Amuk taha Tanaka ndih tapui harei 2/1/1903, lac anek ka 7 dalam sa baoh sang hu 9 urang anek . Amuk Tanaka hu Gah kỷ lục Guinness dunya lac urang umo thun taha atah abih di dunya di bilan 3/2019 tuk umo 116 thun. Urak ini prein yava oh daok khang kadang, min amuk Tanaka jeng daok ndom biai nao mai hu meng tangin takai haong dom urang iek glang drei, saong bhian mbang menyu,m dom janih pandap drei takre yau ye Chocolate haong ia yamen. Muk daok caong khin diuk hu tal umo 120 thun./.

Urang lang: M. Phuong – Hani Pha – 03/01 10:41:30 AM