Vacxin hu blei mai meng negar  langui piah klauk ka bhap bini 

Rajaei bahrau tabiak Sarak 90/NQ-CP ka bruk blei pabak vaccine pacang COVID-19 BNT162 di Pfizer.  Tui nan, Rajaei njauk hatai haong bruk Thủ tướng Rajaei brei adat pilih ruah nhà thầu tui Paka 26 Hukum Đấu thầu ngan saong bruk blei pabak 19 triệu 998 rabau 810 mbang vaccine pacang COVID-19 di Pfizer.  Mintri Y tế samar peih bruk blei vaccine pacang COVID-19 di Pfizer piah hu vaccine samar di abih, rilo di abih meda pabak hu bruk pacang caga jit, khik hu siam mekre, pacang bruk duah laba dalam tuk blei, pandar vaccine.

Urak ni, dom urang F0 duah mboh dalam bhap bini dut song duah mboh dalam labik brei dok karei, labik pacang veik di  ban raya.HCM daok tagok glaong jang dahlau. Tui ong Nguyễn Thành Phong- Akaok UBND ban raya .HCM, dahlau deih, urang F0 dalam dom labik pacang veik lac jiak 80% dom urang njom bahrau, min dalam harei kabroi, F0 bahrau dalam bhap bini meblah 53%, di dom labik pacang veik lac 41%. Piah patrun urang njom Covid-19 dalam bhap bini, nyu pagam pambak tame bruk klauk vaccine. Kayua yau nan ye, ong Nguyễn Thành Phong hu pandar dom quận, huyện song ban.Thủ Đức patagok bruk klauk vaccine, khang hatai pacang jit, abih di nyu nan lac di 7 labik bo ban raya HCM jao bruk pasang iek jit dahlau di harei 30/8 nan lac Cần Giờ,Củ Chi, Nhà Bè, Phú Nhuận, Quận 5, Quận 7 song  Quận 11.

Harei 16/8, hadei di tuk ngak salah harak gar pasang iek chất lượng, lô vaccine pacang Covid-19 hu labaih 1 triệu 100 ribau mbang hu Hệ thống Pasak klauk jru VNVC jao ka  Viện Pasteur TP.HCM. Ini lac mbang jao vaccine ka 8 tui sarak pambuak bruk blei dahlau 30 trieu mbang vaccine Covid-19 di VNVC saong AstraZeneca. Mbang jao labaih 1 triệu 100 rabau mbang vaccine ini hu makna biak praong anak bruk jit Covid-19 tamuh veik biak khang, bruk khin klauk jru vaccine di bhap bini daok tagok glong, abih di nyu lac di dom bhum jit praong yau TP.HCM, Bình Dương…

Dom harei puac bilan 7 song akaok bilan 8, rilo menuac palei di tỉnh Ninh Thuận hu mai veik palei. Abih di nyu nan lac dalam harei 31/7 hu labaih 2.000 urang peih radaih mac meng xã Thạnh Phú (huyện Vĩnh Cửu, tỉnh Đồng Nai) mai palei. Dalam dom urang ni hu labaih 400 urang jeng F0, ngak trak damak ka  tỉnh meng labik brei dok karei, iek ruak , mbuan si pambak jit ruak biak glong. Kayua yau nan ye, UBND tỉnh Ninh Thuận hu harak payua ka UBND tỉnh Đồng Nai song UBND tỉnh Bình Thuận, ieu 2 tỉnh pathau khan jak ba rahra Ninh Thuận chreih hatai dok veik, patui ngak siam bruk pacang caga jit; hu jalan pasang iek catang song peih ngak dom bruk dong chip  gah mbang huak, y tế ka dom urang palei Ninh Thuận sang kan kandah hu tani tanat rai duik

Tỉnh ủy Bình Dương brei thau, hu jao Công an tỉnh pambuak bruk haong dom gah pasang iek, ngak brei cambaic laic, langyah catang tui hukum bruk 5 balai y tế oh taduan cấp cứu ngak brei sa  urang likei metai. Pambuak tal bruk nan, Cục Khik iek ruak, taong ruak di Mentri Y tế hu payua harak tal Sở Y tế tỉnh Bình Dương ieu duah thau cambiac laih; langyah taong phạt ngan saong kapol, urang pambuak tal bruk nan meyah ngak suan. Gam haong nan, Sở Y tế Bình Dương brei samar ngak bruk haong dom balai y te di tinh, brei gam ngak bruk pacang caga jit, gam iek ruak, taong ruak ka menuac ruak karei.         

Mbang megei baoh taneh khang 7,2 độ Rich-te tuk mesup ini 14/08 di Haiti ngak brei takik di abih 1.419 urang metai haong 6.000 urang njauk rambus, min dom menuac metai saong njauk rambus meda hu rilo jang dalam dom harei anak tal. Mbang megei baoh taneh jeng palai tayah yaok rabau baoh sang ngak ka rilo menuac oh hu labik daok, Yam ndok điều hành UNICEF Hen-ri-e-ta Pho (Henrietta Fore) brei thau, bruk daong ngak pahla di Haiti lac biak praong tuk menuac urang daok kurang iek glang prein yava, ia hacih haong labik daok. Mỹ, Mê-hi-cô, Cộng hòa Đô-mi-ni-ca, Chile haong dom taneh ia karei hu payua pandap daong saong brei dom kapul duah, daong mai daong ka Haiti. 

Dalam harak ndom puac camereip abih hadei di tuk Taliban meblah hu ban ine Kabul di Afghanistan, Tổng thống Joe Biden brei thau bruk ba lin Mỹ tabiak truh Afghanistan lac sa bruk ngak njauk. Tổng thống Biden brei thau, bruk dang akaok di Mỹ urak ini lac ba tabiak truh Afghanistan yaok rabau menuac ngak saong rahra Mỹ jeng yau dom urang Afghanistan hu harak adat “di cư” meng bruk daong di yaok rabau lin Mỹ. Tui Tổng thống Biden, bruk ba menuac tabiak  hu salah blaoh jeng lac tuk Mỹ blaoh abih bruk ba lin di drei tabiak saong salah bruk mesruh suai lavik abih di drei  di negar lingiu.  

Dalam tuk biến thể Delta pambak praong di dalam bhum song dom taneh ia, Áo song Slovenia brei ngak catang dom adat hukum tame negar ka urang EU piah pacang cakak bruk njom mbak jit ruak. Tui nan, meng harei 18 bilan 8, bruk tame negar Áo hu ngak catang. Urang EU tuk tame brei hu harak lac klauk ginup 2 mbang vắc-xin pacang Covid-19, bruk ni oh pandar ka urang abih ruak  kayua Covid-19./.

Urang lang: Ái Nghiêm- Hanipha- 17/8