Akaok QH Vương Đình Huệ brei panuac

Beir harei 27.4, ala bruk pal akaok di Akaok QH Vương Đình Huệ, UBTVQH brei tapa panuac caong di rajaei, brei adat pandar 12 rabau 1 ratuh tỷ jien patak pataom di kadung jien negar piah blei vaccine pacang Covid-19. Rajaei hu kuhri kuhria dom pok jien pandar cai  lagaih song njauk bruk. Min, UBTVQH jeng hu panuac kakei lac caik hatai dong ka dom tỉnh ban kan kandah dalam bruk pandar cai kadung jien ka nyu lagaih song bruk blei song pandar vaccine.

  Mintri ilamo, Thể thao saong Du lịch hu harak payua tal UBND dom tỉnh, ban di TW  ka bruk paglaong peih ngak dom jalan pacang caga jit Covid-19 dalam gah ilamo, thể thao, du lịch saong ndem lac njauk pamaong tal bruk patakik peih dom bruk ngak pataom rilo manuac. Mayah peih ngak, njauk ngak catang dom bruk khik siam ka pacang caga jit tui njauk adat, khik salamat abih ka rahra saong tuai damuai.

  Jit ruak Covid-19 dok rah tabiak kan kandah di rilo negar jiak tapen, anak bruk mbuan si tamuh jit, jeng daok hu rilo menuac daok iek lap, ka oh sangka dalam bruk pacang caga jit, oh ngak tui 5 paka di mintri  Y tế. Cuk patiah pacang mbaok, paatah di gauk lac sa dalam dom jalan ngak prong piah pacang caga njom mbak Covid-19 min biak rilo urang di ban raya HCM oh ngak tui, yaom lac hu dom urang  njauk tong phạt kayua oh cuk patiah pacang mbaok di labik hu rilo menuac  ngan song yaom jien meng  1 - 3 triệu đồng.

Đắk Lắk hu 49 bangsa, dalam nan hu labaih 667.000 urang bangsa takik, meblah 1/3 rahra dalam tỉnh. Ong Y Biêr Niê, Phó Bí thư Tỉnh ủy, akaok HĐND, akaok kapul urang QH, akaok Ủy ban pilih ruah tỉnh Đắk Lắk brei thau, piah ka bruk pilih ruah mek hu jak jeng glaong, tỉnh Đắk Lắk daok pataom tame jhul khang bruk pathau khan, abih di nyu nan lac pathau khan tal bhum atah bayah, bhum bangsa takik. Dalam nan, patagok bruk pathau khan di kapul urang taha dalam palei, akaok puk palei, urang hu angan je, dom halau janieng… piah ka bhap bini paglaong hatai ngak po, bruk ngak di drei, pilih ruah tabiak dom urang hu angan je  hu hatai siam, hu ilamo, lambuak ka hatung hatian saong hatai caong di bhap bini.

Tui bruk “dam dara ba gauk padang ngak palei pala bahrau”, beir harei 27. 4, di Hà Nội, Kapul dam dara TNCS Hồ Chí Minh pakat negar peih bruk pakacah “Danak dak sahneng duah jalan padang mbang ngui dam dara puk palei  thun 2021”.  Bruk pakacah duah dom danak dak di  3 gah lac: patagok bruk ngak nong pandar ilamu kỹ thuật, patagok pandap panda puk palei tapa bruk pala drak rong glang, kaya ikan, ngak glai, ngak sara, công nghiệp khik piah, ngak tabiak, palei ngak, pandap ngak nong; dom danak dak pandar ilamu kỹ thuật dalam bruk ngak nong, khik caga môi trường song pandar drap ar dalam palei; khik ramik ilamu bangsa tapa bruk patagok gah ngak, pandap meng kan, peih bruk rivang main bhap bini.

Gah Y tế dunya daok tui iek biak catang chủng vi-rút Sars CoV-2 bahrau di Ấn Độ, jang yau roh duah dom jalan langyah piah pacang cakak. Ngan haong biến chủng klak di dunya, kuhria yaok sa urang ruak Covid-19 hu mboh njom mbak virus ka 4 urang, ye tanut ni di Ấn Độ lac 9-10 urang. Sa urang dng akaok di gah Y tế dunya ndem lac, chủng bahrau dak njom mbak biak praong ye bruk đột biến di nyu lac biak glaong. Bruk ni ngak ka bruk di dom urang roh duah dak kan kandah jang.

  Tổng thống Mỹ Joe Biden harei 27/04 brei thau ong “cong khin song cang maong” piah klah rabha vắc-xin pacang Covid-19 ka Ấn Độ song dom negar karei dok khin. Jeng dalam harei ni, Thư ký Báo chí Nhà Trắng Gien Psa-ki (Jen Psaki) brei thau, jiak 10 triệu mbang vắc-xin AstraZeneca hu batabiak gilang dalam dom adit tal, meyah Jabat khik ramik pandap mbang song jru tavoa  Mỹ (FDA) ngak salah bruk tong yaom ka tanut siam di vaccine ni. 50 triệu mbang vắc-xin sa janih jeng hu ba brei ka dom negar dalam dom bilan anak tal.

Dom urang ngak praong di kanja Anh daok pasang iek bruk meda cak rok patagok 1 janih jien kỹ thuật số bahrau, hu angan lac Brit-coi (Britcoin). Tui pathau khan di Mintri jien padai Anh, jabat ni daok pambuak haong gilang pariak Trung ương piah taong yaom kein laba di 1 janih jien kỹ thuật số bahrau dalam tuk bruk biyar jien mbaok di bhap bini dalam dunya mboh daok trun, 1 manieng kayua jit praong Covid-19. Mayah Brit-coi hu rajaei Anh brei tapa, ni lac sa janih jien ảo bahrau hu brei pandar gam haong bruk biyar jien tapa thẻ saong jien mbaok. Jien ảo, atau daok ieu lac jien kỹ thuật số yau ye đồng Bit-coi (Bitcoin), đồng I-thơ (Ether) hu pandar  di dom negar di dunya. Min, đồng Brit-coi di Anh hu taong yaom biak karei dut saong dom janih jien ni kayua hu ngak tabiak saong khik ramik di dom jabat kanja./.

Urang lang: Thu Thao -H.Pha  28/4/2021