Rajaei brei tabiak sarak 86 ka dom jalan ngak samar drah pacang caga jit ruak Covid-19 piah peih ngak Sarak 30 harei 28/7/2021 di Quốc hội mbang 15. Sarak tacei lac, TP.HCM kham merat pasang iek hu jit ruak dahlau di harei 15/9/2021; dom tỉnh: Bình Dương, Long An, Đồng Nai kham merat pasang iek hu jit ruak dahlau di harei 1/9; dom tỉnh, ban karei kham merat pasang iek hu jit ruak dahlau di harei 25/8/2021. Daok bruk vaccine, Sarak ndom lac, jhul khang bruk “ngoại giao vaccine” meng yaok jalan ngak, pachreih patagok bruk daong brei, blei vaccine meng negar langiu tame piah pabak bruk klauk samar di abih, rilo di abih piah samar mek hu bruk oh njaom mbak dalam bhap bini.

Mesup ni, mintri  Y tế brei thau, dalam 12 tuk tapa, dalam negar hu 4.802 urang njom bahrau ruak Covid-19, dalam nan 10 urang tame Viet Nam, hu 1.135 urang dalam bhap bini. Dalam dom tỉnh, ban hu urang njom, ban raya HCM hu 2.128 urang, Bình Dương 936 urang…Bruk kluak jru, tong abih mbang vaccine hu klauk lac labaih  11triệu 300 rabau mbang.

Viện Hàn lâm Khoa học saong Công nghệ Việt Nam bahrau brei thau bruk roh duah dahlau lâm sàng jru taong ruak Covid-19 hu angan Vipdervir. Tapa nan mboh lac jru ini siam mekre saong pacang hu bruk cakrok di virus SARS-CoV-2, patagok miễn dịch angaok dom bruk roh duah, ngak iek. Tui gah roh duah, dalam tuk ngak iek lâm sàng, meda ngak iek angaok dom urang ruak Covid-19 hanjual saong mbiah. Dom menuac hu mbaok tame piah ngak iek, lac labaih 200 urang.

UBND tỉnh Bình Thuận bahrau hu harak ieu dom sở, ban, ngành, dom jabat, đơn vị, puk palei dalam tỉnh jak ba, pathau khan, bruk xã hội hóa dut iek sàng lọc Covid-19. Urang hu jak ba, ieu xã hội hóa dut iek halan hatain (hu bayar jien) nan lac: urang jarka, công chức, viên chức, urang ngak, gah tapon nyaom bol pan phao krong dalam tỉnh; urang ngak dalam dom doanh nghiệp; bhap bini rahra dok dalam tỉnh (oh kuhria dom urang kan kandah). Sở Y tế tỉnh jeng batabiak jalan peih bruk xã hội hóa dut iek sàng lọc SARS-CoV-2 dalam tỉnh, tuk vak tui kuhria meng harei  11/8 tal  11/9/2021.

Ban Chỉ huy Biên phòng pabah lamnge TP.HCM brei thau lac bahrau taduan raok saong ba nao brei daok karei 18 urang nao kapal gaok bala angaok tasik. Dahlau di nan, kapal Tân Bình 127 (hu quốc tịch Panama) meng TP.HCM nao Malaysia ye gaok bala di labik bhum tasik dunya, ngak brei kapal kram meneing. Dom urang angaok kapal tabiak tín hiệu ieu daong; tabiak truh kapal, trun ghe cứu sinh. Mboh hu hu tín hiệu, kapal MCC CHITTAGONG (quốc tịch Hồng Kông) hu mbaok pak nan, ba 18 urang angaok kapal nan tagok kapal di drei.Tal melam 8/8, kapal tame pabah lamnge Cát Lái – TP.HCM, jao 18 urang nao kapal Tân Bình 127 gaok bala brei ka bộ đội biên phòng Việt Nam. Dom urang nan hu ba nao brei daok karei tui adat hukum di gah y tế.

Jit  Covid-19 di negar Anh tamuh tabiak dom srau kadau bahrau biak duh hatai tuk hu 146 urang metai kayua Covid-19 dalam harei 10/8, glong di abih meng bilan 3/2021, dalam tuk 75% menuac urang prong hu klauk ginup 2 mbang vaccine. Dom yaok pataom ni dok pachreih bruk sangka prong di gah chuyên gia y tế kayua negar Anh hu mong lac dok peih bruk ngak iek prong abih di dunya meng siam lagaih di dom janih vaccine pacang Covid-19, tuk batabiak yah klaak dom jalan patakik pacang jit meng harei 19/7. Min, Thủ tướng Anh Boris Johnson dok jia lac negar Anh samar pacang caga jit dalam bhap bini di bilan 10/2021.

Harei kabroi, Taliban tabiak panuac lac kapul ini sanya tui jalan ginum biai di Đo-ha (Doha), Ca-ta saong oh khin bruk ginum biai ini klaoh, jaleih. Dalam tuk nan, sa urang dalam rajaei Afghanistan brei thau, karja Ca-bun ieu gah dang kreh hu mbaok tame bruk ginum biai piah thau cambaih bruk di dua gah, kayua gah Taliban oh sangka tal bruk ginum biai, bo tok caong ngak hu bruk di drei meng taong, mesruh. Taliban urak ini pasang iek hu 65% taneh ia Afghanistan, meda meblah mek quyền pasang iek 11 pasak tỉnh saong kham merat pacang cakak bol bala taneh ia di gah brak mai daong ban ine Ca-bun.

  Algeria dok dang anak bruk rah tabiak khang dom mbang khuah glai  di rilo bang dalam negar. Kurhia tal melam 11/8, hu 99 mbang khuah glai rah tabiak  di 16 bang, 42 urang metai, dalam nan hu 25 urang lin song 17 rahra. Rajaei Algeria hu panuac ieu bruk dong meng dunya song dok ginum biai song dom  gah piah pah kapan haoh pacang pandam pui. Karja Algeria ndom lac dom mbang khuah glai rilo meng lac “hu mbaok di kol tội phạm” song dok peih bruk pasang iek, jang yau chap kreih dom urang hu pagam tal./.

Urang lang: H.Pha & Thu Thao -11/8/2021