Dah page harei 11/8, rajaei mbang 15 (vaktu 2021 - 2026) peih mbang nyaom camriep ala bruk par akaok di Thủ tướng Phạm Minh Chính. Mbang nyaom hu peih tabiak tui jalan online dalam negar tal dom tinh, bal. Brei panuac peih mbaok, Thủ tướng Phạm Minh Chính brei thau, ini lac mbang nyaom sajarah, ngan haong hatai kham marat padang rajaei salih bahrau, liêm chính, ngak bruk, siam lagaih, duh ka bhap bini. Ala bruk hu mbaok di Tổng bí thư Nguyễn Phú Trọng, urang par akaok Đảng, kanja, mbang nyaom meda pataom tame ginum biai, patabiak dom asal kadha hu makna praong abih dalam dom gah di taneh ia dalam 5 thun anak tal.

Mintri Jalan mbak pajeng ba brei thau, Cục Hàng không hu brei bruk parabha dom hãng par iek tui bruk jit ruak, patrun patakik dom mbang par tal Nội Bài kayua Hà Nội daok brei pa-atah di gauk. Gam haong jalan par praong Hà Nội – TP.HCM, meda brei adat par takik jang 2 mbang par nao mai yaok harei. Urak ini, Mintri Jalan mbak pajeng ba jeng daok khik jalan par meng dom tỉnh ban tal mblang kapal haok Nội Bài, lingiu dom jalan par tal dom tỉnh daok pa-atah di gauk di gah Meraong yau Cần Thơ, Phú Quốc, Rạch Giá, Côn Đảo. Daok dom mbang par meng Hà Nội nao dom tỉnh ban karei jeng brei trun takik veik.

Mintri Y tế bahrau hu harak payua UBND TP.HCM ka bruk pandar vacine Vero Cell. Tui nan, iek tui sarak di akaok mintri Y tế brei pandar vaccine dalam tuk samar drah piah pacang caga jit Covid-19, Mintri Y tế (Cục khik ramik jru tavao) njauk hatai brei ka Công ty TNHH sa thành viên jru tavao Sài Gòn blei tame 5 triệu mbang vaccine Covid-19 (Vero Cell). Vaccine Vero Cell hu gah Y tế dunya (WHO) brei adat pandar dalam angan vacine hu klauk samar drah piah pacang caga jit ruak Covid-19 saong hu rilo negar di dunya ba tame klauk pacang caga.

Mesup ini, Bình Thuận hu 38 urang njaom bahrau Covid-19. UBND tỉnh ieu ban sit La Gi daok brei pa-atah di gauk tui Sarak 16 tal harei 18/8, saong brei pacang veik abih phường Hưng Long, pacang meneing phường Bình Hưng, ban Phan Thiết meng harei 11/8 piah pacang caga jit. Dalam tukvak pacang veik, karja pak nan brei hu jalan pabak pandap mbang huak tal sang bhap bini saong pataom tame pasang iek praong. Kuhria tal mesup 11/8, Bình Thuận hu 1.257 urang njaom Covid-19, dalam nan hu 1.000 urang daok di ban sit La Gi.

Dah page harei 11/8, pasak pasang iek ruak kik tỉnh Đồng Nai brei thau ka 975 urang dương tính haong virus SARS-CoV-2 bahrau mboh di tỉnh. Ni lac dom urang njom Covid-19 dalam harei glaong abih kuhria meng dahlau mai di Đồng Nai. Dalam nan, 18 urang hu duah mboh tapa bruk pasang iek saong 957 urang hu duah mboh dalam labik brei daok karei, labik pacang veik. Sở Y tế tỉnh Đồng Nai ieu kakei karja dom labik hu jalan brei paatah di gauk, patrun dom manuac urang dalam labik sang trọ, abih di nyu nan lac dom labik hu sruh jit piah patrun patakik bruk njom mbak rilo.

Harei 11/8, mbang camereip abih kuhria meng tuk tamuh jit Covid-19, dom urang njom bahrau dalam 24 mon tapa di Hàn Quốc yam tapa tanut 2.000 urang, tui nan, abih tih urang njom ruak di Hàn Quốc urak ini tagok tal 216.206 urang. Gah y tế kuhria mboh lac, dom urang ruak di Hàn Quốc meda tagok kayua biến thể Delta daok njaom mbak samar. Meng bilan 7, ban ine Seoul haong dom tỉnh jaik taphia, pasak jit bahrau abih di Hàn Quốc, brei patakik ngak dom bruk tal pakat 4 (lac pakat glaong abih dalam 4 pakat di taneh ia ini), min meda lac takik pacang cakak hu jit ruak dalam bilan pandiak.

Jabat khik ramik pandap panda taong ruak di Australia bahrau brei adat pandar di anak meta sa janih jru taong ruak Covid-19 kayua hãng jru Merck di Mỹ ngak tabiak. Janih jru pacang virus ini hu hãng jru ieu pandar chip dalam dom harei camereip bahrau njom virus, pacang cakak virus caih tabiak rilo. Bilan 6 meng blaoh, rajaei Mỹ sanya blei 1 triệu 700 rabau mbang jru Molnupiravir yaom tagok tal 1 tỉ 200 triệu USD meyah jru ini hu Gah khik ramik jru tavao Mỹ brei adat pandar chip.

Campuchia daok caga peih pabah mbang raok tuai du lịch mai veik di puac thun 2021. Mintri Du lịch taneh ia ini daok padang jalan piah peih pabah mbang veik gah du lịch, khik siam mekre, salamat, oh njom mbak. Gam haong nan, hu ndom tal dom jalan ngak samar drah di Rajaei Campuchia piah daong dom doanh nghiệp du lịch saong peih bruk klauk vaccine Covid-19 ka uranaih, urang umo meng 12-17 thun, kuhria klauk mbang ka 3./.

Urang lang: M.Phương -11/08/2021