Rajaei bahrau tabiak sarak 165 di harei 5/11/2020 ka bruk daong jien ngak pasiam dom khut khat trak di sang danaok kayua bala meng langik tasik dalam bilan 10/2020 di dom tỉnh: Nghệ An, Hà Tĩnh, Quảng Bình, Quảng Trị, Thừa Thiên Huế, Quảng Nam, Quảng Ngãi, Bình Định, Phú Yên, Gia Lai, Kon Tum. Sarak ndem cambaih: dom sang jalieh, tayah, ia ba thiek nao abih, daong glaong abih 40 triệu đồng/yaok sang, daok dom sang njauk khut trak hu daong glaong abih lac 10 triệu đồng/yaok sang. Dom tinh, bal daok pandar kadung jien di drei saong jak ba dom kadung jien karei piah ba tabiak yaom daong lagaih ka dom baoh sang njauk bala.

UBND tỉnh Thừa Thiên-Huế bahrauhu  harak ieu Công ty Cổ phần thủy điện Rào Trăng 3 padeih tong abih bruk padang ngak; pambuak gauk dong duah urang lahik; langyah sarak ka urang gaok bala. Bruk padeih ngak  thủy điện Rào Trăng 3 piah tong yaom bruk glut jaleih, mbuan si ba tal bala biak glong di danak dak. Danak dak hu công suất 13MW, hu padang ngak bloh dom jalan ngak prong yau kuac raok labik  taneh; sang mac song bilai parabha điện 110 kV... Pagam tal bruk metai, lahik menuac urang  kayua glut jaleih taneh di Rào Trăng 3, urak ni hu 5 atau hu duah mboh, dok 12 urang daok lahik.

Harei ni (6/11), danak dak cak rok patagok Liên Hợp Quốc (UNDP) hu mai tal Quảng Ngãi piah alin pandap pandar dalam sang saong daong bhap bini ngak pasiam viek tabung sang hadei tuk ribuk Molave. Nan lac sa binah dalam paok daong samar drak hu yaom 400.000 USD (labaih 9 tỷ đồng) di danak dak daong ka bhap bini bhum ribuk ia sua di 5 tỉnh njauk kan kandah trak abih, dalam nan hu: Quảng Bình, Quảng Trị, Thừa Thiên Huế, Quảng Nam saong Quảng Ngãi. Mbang ni, UNDP daong 800 paok pandap pandar dalam sang; 30 tấn jru hóa chất pametai anek ruak; 5 paok pandap pasang iek, taong yaom ribuk ia sua ka dom Ban  pacang caga bala meng langik tasik; ramik ngak pasiam 300 sang khut trak. UNDP tui kuhria ieu pataom 1 triệu USD ka dom bruk ngak pacang caha saong ngak pasiam veik.

UBND TPHCM bahrau njauk hatai haong bruk buh jien tabiak padang ngak  điện ia harei angaok tabung sang di  trụ sở di dom jabat  hành chính, đơn vị sự nghiệp công lập dok di ban raya. Bruk peih ngak ni hu lagaih song sarak patagok  năng lượng hacih, năng lượng pasiam veik  di rajaei song ban raya. Tapa nan, rik dong khik ramik  siam mekre an ninh năng lượng, khik caga alam môi trường, pagam song bruk patrun phát thải khí sang camin ka ban raya HCM.

Dah page ni, jabat Cảnh sát pasang iek Công an tỉnh An Giang brei thau hu tabiak sarak langyah tui hukum saong cap khik Trần Văn Hải, Nguyễn Văn Minh, Võ Minh Tâm saong Phan Văn Bồ, gam daok di tỉnh An Giang piah pasang iek ka bruk pajeng pandap panda suan hukum tapa jalan tapen negar. Abih 4 urang nan pambuak tal bruk pablei salih lậu 51 kg amek meng Campuchia tame Việt Nam. Dom urang nan hu taduan dom bruk ngak suan. Urak ni bruk pablei salih lậu ameh biak praong ni hu Công an tỉnh An Giang daok peih praong bruk pasang iek, duah thau.

Mbang ka 2 di jit  Covid-19 nyu pacang veik bruk pasiam  kinh tế di châu Âu. Tui kuhria dahlau bahrau di abih, Ủy ban Châu Âu brei thau kinh tế dalam bhum meda tagok 4,2% dalam thun hadei, patrun dut song tanut tui kuhria  6,1% di bilan 7. Châu Âu dok pacang caga jit Covid-19 pambak khang. Thủ tướng Na Uy Erna Solberg khan lac negar ni dok dang jiak tanut oh pasang iek hu ngan song jit ruak. Hy Lạp khan lac brei paatah di gauk dalam negar  dalam 3 adit meng harei 7/11. Di  Đức, urang njom bahrau Covid-19 harei kabroi tagok khang: 19.990 urang song bhap bini tuh nao blei pandap panda . Di Ba Lan, rajaei daok sahneng kuhria ba tbaiak bruk pa atah di gauk dalam negar kayua urang ruak tagok khang  hu  27.143 urang njom bahrau dalam harei  5/11.

Tổng thống Azerbaijan In-ham A-li-ép (Ilham Aliyev) brei thau negar ni halain hatain padieh bruk mesuk matak  di gah Nagorno-Karabakh, meyah Armenia sanya ba bol lin tabiak truh bhum taneh daok meblah mek ni. Tổng thống A-déc-bai-gian brei thau: dahlau di nan bol lin negar ni eng drei peih paha 4 labik njauk blah mek. Klak tapa dom asal kadha sanya padieh cuh phao mek hu di Nga saong Mỹ, urak ni gah A-déc-bai-gian saong Ác-mê-ni-a jeng daok mesuk gauk biak khang di labik Na-gô-rơ-nưi Ka-ra-bắc.

Labaih 6 ribau urang di ban Lan Châu, pasak di  tỉnh Cam Túc, Tây Bắc Trung Quốc tapa dut iek  mboh dương tính song sa janih ruak kayua anek ruak rah tabiak, ieu lac Bru-xê-la (brucellosis), dok ieu lac pandiak Địa Trung Hải. Tui  gah Y tế dunya, ruak  Bru-xê-la mạn tính biak kan si pasiam song ba tal gleih glar, pandiak lavik harei. Dom triệu chứng meda dui atah yaok bilan ,yaok thun, ngak kan kandah tal bruk ndih tapui anek, yaom lac ruak ni takik ngak brei metai menuac./.

Urang lang: Thu Thảo - H.Pha  6/11/2020