Dom harei tapa, Bam giám đốc Sang iek ruak Quận 2 TPHCM daok kuhri kuhria saong ba tabiak jalan cân đối jien padai piah meda pabak hu tui Thông tư 15 – Mentri Y tế, hu ngak tui meng di harei 15/7, dalam nan hu 70 dịch vụ trun yaom meng 5% tal 24%. 

Tui Bác sĩ Trần Văn Khanh, Akaok Sang iek ruak Quận 2, yaok thun manuac urang mai iek ruak pak ini jaik 800 ribau mbang urang. Kayua yau nan ye, tuk bahrau ngak tui Thông tư 15, tok kuhria ta-eng jien khám iek ruak nyu trun tal 4,8 tỷ đồng yaok thun. Gam haong nan, dom yaom dịch vụ karei jeng trun meng 8 tal 10 tỷ.

Dalam tuk nan, tui quy định di raja-ei, meng harei 1/7, hệ số lương cơ bản di urang ngak dalam sang iek ruak tagok, ini lac kadha bui sambai ka urang ngak. Yau nan min, sang iek ruak njauk ba-yar jien bilan tagok ini, nan ye bruk pandar tui Thông tư 15 di tukvak ini ngak ka sang iek ruak njauk kuhri kuhria veik jien padai, thu – chi habar ka nyu laghaih. Taphia di nan jeng paglaong bruk khám iek ruak ka bhap bani saong pataom tame khik kajap rai diuk ka urang ngak gah y tế di sang iek ruak. Bác sĩ Trần Văn Khanh, lac: Urak ini hu Thông tư 15 ye khaol dahlak padeih dom bruk ngak yau pataom tame ka bruk pato megru atah tukvak, abih ralo jien ndo ye anak meta khaol dahlak brei patrun meng 20-30%. Langiu di nan khaol dahlak patagok bruk mong iek langiu sang iek ruak, patagok dom dịch vụ tiện ích. 

Ndom ka bruk trun yaom ngak ka dom sang iek ruak trun jien mek tame, ong Dương Tuấn Đức, Akaok pasak Giám định Bảo hiểm Y tế saong Thanh toán đa tuyến gah Barak (Bảo hiểm Xã hội Việt Nam) brei thau, bruk ramik yaom veik mbang ini di Mentri Y tế lac hadei di sa tukvak peih ngak Thông tư 37, thun 2015 ka yaom dịch vụ min mboh lac hu ralo kadha oh ka njauk dalam bruk padang yaom. Kayua thông tư ka yaom dịch vụ dahlau diah tok pasang iek di dom sang iek ruak tuyến trung ương, tuyến tỉnh, di dom sang iek ruak hạng đặc biệt, hạng 1, bo hadei di nan ba pandar ka dom sang iek ruak tuyến quận huyện. Nan ye yaom oh ka njauk, ba tal bruk ramik veik ka nyu laghaih. 

Jeng tui ong Tuấn, bahrau ini, Bảo hiểm Xã hội gam haong Mentri Y tế, Mentri Jien padai nao pasang iek di dom sang iek ruak brei mboh daok hu bruk dom cơ sở y tế oh buh jien blei trang thiết bị njauk tui quy định ba tabiak. Kayua yau nan ye njauk ramik veik yaom ka nyu siam laghaih jang. Taphia di nan, dalam tukvak nao pasang iek mboh lac dom vật tư hu kuhria dalam yaom min oh pandar tal….Ong Dương Tuấn Đức lac: Bruk njauk di nyu lac oh ramik  brei trun, bo yau urang di di Cục Khám iek ruak brei thau, nan lac khaol drei klaak tabiak langiu yaom dịch vụ y tế nan dom chi phí, yau lac jru cản quang. Dahlau diah ba tame kuhria dalam dịch vụ min urak ini klaak tabiak, nan ye mong tame lac nyu trun. Atau hu dom dịch vụ mboh nyu trun yaom 50%, min biak di nyu dalam định mức dahlau diah hu  kuhria meluk nan ye njauk ramik veik. 

Anak kan kandah di bruk ramik veik yaom dịch vụ y tế pambak tal yaom jien mek tame di sang ruak, ralo bhap bani mboh duh hatai ka chất lượng iek ruak. Sa-ai Nguyễn Thị Tố Uyên, daok di quận Tân Bình TPHCM brei thau, kadha njauk sangka di abih nan lac chất lượng khám iek ruak hu grap tanat saong patagok, atau patrun tui yaom giá dịch vụ saong jien mek tame di sang iek ruak: Tui dahlak thau, yaom dịch vụ trun ye jien mek tame di sang iek ruak trun, jien bilan di bác sĩ jeng njauk cakak trun. Yau nan bác sĩ naih jioy meda klaak dom sang iek ruak công hu jien mek tame biar piah nao ngak bruk ka dom sang iek ruak tư hu jien bilan glaong jang. Yau nan, bhap bani nao iek ruak jeng oh hu siam. 

Ndom ka bruk ini, ong Nguyễn Nam Liên - Vụ trưởng Vụ Kế hoạch tài chính – Mentri Y tế brei thau: Mentri Y tế jeng hu tacei pato dom sang iek ruak njauk khik kajap chất lượng. Urak ini dom sang iek ruak njauk duah jalan ngak, njauk pandar hu siam mekre jien padai di drei. Pagap yau patagok bruk đấu thầu, patak pataom dom vật tư, hóa chất… piah khik mkajap hu chi phí. Mentri Y tế jeng tacei pato dom sang iek ruak pandar manuac urang ka nyu njauk. 

T ui taong yaom di dom chuyên gia, Thông tư 15 nan lac sa yam nao praong dalam jalan kuhria njauk, kuhria ginup yaom dịch vụ y tế; ngak brei patagok quyền lợi di urang hu thẻ bảo hiểm y tế, ngak brei patagok bruk bhap bani blei bảo hiểm y tế. Taphia di nan pachreih dom cơ sở gah ala patagok kỹ thuật, tagok dom đơn vị eng drei khik kajap bruk chi thường xuyên, patrun bruk chỉ định kỹ thuật, thủ thuật oh njauk ngak…Jeng tui Mentri Y tế, anak tal brei pasang iek veik yaom dom dịch vụ karei, saong meda cakak trun tra. Jalan ngak nan jeng lac pamaong tal bruk pasang iek pren yava ka bhap bani, bruk patagok di sang iek ruak bo daok cân đối hu kadung jien Bảo hiểm Y tế./.