Ikan chiên, janih ikan hu brei angan lac “chúa tể kraong Đà” kyua nyu biak jhak saong drei praong trak tal 70 kg. Ini lac sa janih ikan daok dalam kapul “tứ quý”, rilo menuac abih rilo pren yava piah thuần hóa janih ikan ini, min oh jeng. Bruk raong ikan Chiên mboh lac biak kan nan, urak ini hu peih ngak jeng di danao thủy điện Sơn La. Kadha vak di kapul urang vak di rayo sap ndom VN daok di bhum Tây Bắc hu ndom tal bruk ini. Da-a mikva saong taong abih gauk tui pang:

         Urang raong hu janih ikan ieu lac “thủy quái” di trại ikan Sa Thư labik tatua Pá Uôn, xã Mường Giàng, huyện Quỳnh Nhai  lac “urang oh pambuak pagam hagait tal gah kaya ikan”. Ong angan lac Lường Văn Ngoa, dahlau deih ngak gah xây dựng. Trại ikan di ong daok kreh danao thủy điện Sơn La di bản Pá Uôn. Abih tih hu 16 lồng, lingiu bruk pablei ikan ralo tabiak darak pasar, trại ikan daok lac labik pablei ikan pajaih, labik tacei pato ilamu raong ikan ka bhap bini dalam bhum. Ông Lường Văn Ngoa, Giám đốc Công ty TNHH Sa Thư, huyện Quỳnh Nhai, tỉnh Sơn La brei thau: Tuk dahlak sahneng mboh bruk raong ikan, dahlau di abih dahlak sahneng tal janih ikan halei mbuan pablei. Meng nan dahlak sahneng tal ikan chiên, janih ikan hu di kraong Đà meng kan mai. Janih ikan ini urang blei takik kateik yaom, saong ikan praong ye pablei hu yaom jang. Kayua yau nan ye, dahlak ruah ikan chiên piah raong, yaom lac pajaih ikan ini biak takik hu.

          Hadei di tuk padeih tui chế độ, ong Ngoa bac megru bruk raong ikan lồng meng harak, báo saong dom urang hu ilamu. Tuk camereip, ong Ngoa duah pataom ikan meng tự nhiên saong nyu praong sit karei di gauk piah ba mai raong. Min ikan diuk hu takik. Hadei di 2 thun roh duah, ong saong urang anek likei nao tal dom tỉnh duah thau bruk raong ikan chiên blaoh blei pajaih mai raong. Ong hu da-a urang thau gah kaya ikan mai tacei pato ilamu raong ikan chiên. Biak tatuak drei, meng ikan pajaih trak yaok drei meng 50 tal 100gam, yaok lồng palao 200 drei ikan pajaih, hadei di sa thun, yaok drei trak hu 2kg. Dalam tuk nan, tui ilamu raong ye 2 thun meng hu 2kg, ikan diuk hu 95%. Yaom pablei di labik raong trun tagok meng 430 ribau tal 450 ribau đồng sa kg, daok lingiu darak yaom 600.000 đồng sa kg. Urak ini, lứa ikan ini trak hu labaih 2kg yaok drei saong hu dom nhà hàng kakei blei dahlau. Hadei di mbang ini, meyah pataom hu ginup phun jien, ong raong 10 lồng ikan chiên saong yaok lồng palao rilo ikan jang. Ong Lường Văn Ngoa daok brei thau lac: Ilamu raong ikan ini dahlak mboh oh karei hagait. Ikan ini nyu mbang takik, dua harei meng brei mbang sa mbang. Dut saong dom janih ikan karei, ikan ini nyu takik ruak jang. Dahlak mboh lac, meng ilamu iek glang yau urak ini, bhap bini drei meyah duah hu pajaih ye urang halei jeng raong hu.

          Tapa bruk di ong Lường Văn Ngoa brei mboh lac, bruk raong ikan chiên lồng lac sa bruk ngak bahrau, oh kan si ngak saong meda pambak praong di Sơn La. Lingiu di nan, ini daok lac jalan peih tabiak bahrau ka bhap bini daok di labik Kraong Đà atau dom baoh sang di tapen thủy điện Sơn La. Sa-ai Ngô Văn Trường, Kỹ sư thủy sản, Công ty TNHH Sa Thư, huyện Quỳnh Nhai, tỉnh Sơn La lac: Di labik ini hu danao praong, mbuan si cakrok praong, hu ia hacih, oh njom nerak. Raong ikan chiên ini drei njauk caga ruak, định kỳ, 20 harei drei brei nyu menyum jru sa mbang, drei tui iek, tuk brei mbang ye drei brei ka nyu mbang trei, mbang ginup, oh caik ka nyu labaih, kayua mbang pandap mbang labaih nyu mbuan si njauk ruak.

          Meng siam lagaih lac mbaok danao ia thủy điện Sơn La praong tal 20 ribau héc ta, ye bruk pachreih bhap bini cakrok patagok kinh tế meng bruk raong pala kaya ikan, dalam nan hu ikan chiên lac jalan nao njauk. Ong Lưu Bình Khiêm, Phó akaok UB bhap bini huyện Quỳnh Nhai, tỉnh Sơn La brei thau: Ikan chiên lac ikan daok di danao, urak ini urang patagok janih ikan ini, lac biak siam kayua nyu hu ba tabiak pablei di dom darak pasar yau ye di Hà Nội, saong dom darak pasar lingiu Sơn La. Gah huyện daok pachreih dom hợp tác xã patagok bruk ini, pambuak haong bruk pablei ka dom nhà hàng. Dua tra, meda pok panuac tagok tỉnh likau samar peih ngak quyết định 226 di Thủ tướng Rajaei daong ka dom hợp tác xã, dalam nan hu hợp tác xã gah ngak nong saong gah kaya ikan dalam huyện.

Dalam tự nhiên ye ikan chiên dak harei dak takik hu. Kayua yau nan ye, piah cakrok patagok bruk raong ikan angaok danao thủy điện Sơn La jeng yau raong ikan chiên, njauk hu bruk roh duah, tacei jalan saong quy hoạch, piah daong ka bhap bini di labik ini patruh eik patrun kathaot saong patagok pren khang di puk palei drei./.