Palei Hòa Thủy lac labik hu mbuan cuah prong min thu lagu, nan ye mbuan cuah njauk klaak balau ralo thun ini mai. Piah tabiak truh kathaot tui jalan ngak brei kan kandah jeng mbuan lagaih, puac thun 2012, ong Đinh Duy Nghĩa sahneng tal bruk raong anek jah angaok cuah piah pablei.

Tuk nan, ralo menuac klao hia ka ong Nghĩa, kayua lac gul cuah bhong pandiak bhang luac thun, phun hareik daok metai ndom hagait tal anek raong. Pang mahit yau nan, ong Nghĩa gandi gandang palih ruah 250m2 taneh di gul cuah saong buh tabiak 20 triệu đồng padang ngak van ro, ong pajeng cuah di labik karei mai tuh pabak tagok taneh cuah bhong gam ngak nền ro gam ngak dom mbuan cuah sit, pala hareik, takac lubang… ngak jeng labik sinh thái tự nhiên blaoh buh tabiak 3 triệu đồng, blei 10 kg jah pajaih mai raong.

Hadei di 6 bilan, tapol jah caih menek siam, oh hu jit ruak. Dom drei jah binai palao raong hu ralo drei mebaoh ralo baoh dalam lubang, dalam hang. Jaik 6 adit, baoh caih tabiak tapul jah anek, bloh dom drei jah anek ini eng drei nao duah pandap mbang dalam van  ro, ong Nghĩa dak mboh sahanag hatai jang ka jalan ngak di drei saong cang dom siam mekre ba mai. Jah anek prong biak samar. Raong meng tuk bahrau caih tabiak tal harei pablei abih meng 20 tal 24 bilan, jah tano prong ye klau tal pak drei  trak sa kg; jah binai meng 6 tal 8 drei sa kg. Urang mai duah blei tal van ro ngan haong yaom  450 ribau đồng/kg.

Mboh hu kein laba di bruk raong jah, ralo bhap bani nao tabiak mbuan cuah bhong padang ngak van ro blaoh palao yaok ribau drei jah raong. Padang ngak van ro biak mbuan, angaok mblang taneh cuah, mikva ngak móng pacang meng patau dalam 0,5 tal 0,8m, piah pacang anek jah takac lubang nduac tabiak. Patui di nan, xây gạch táp-lô pacang glaong jaik 1,5m atau ngak vang paga vin taom dhal mblang taneh. Angaok nền van ro ye ngak jeng mbuan taneh, takac lubang kaoh ka jah binai hu labik mebaoh… pambuak haong pala hareik saong phun hijao ngak jeng môi trường tự nhiên ka anek jah cakrok patagok. Pandap mbang raong jah nan lac dom janih njam patam,  phun ratak…

Ong Nguyễn Hữu Lương - Akaok Kapul urang nong xã Phước Hải brei thau, Hòa Thủy hu 592 baoh sang, tal urak ini hu jaik 50 baoh sang raong jah angaok cuah praong abih tih lac dua ha, yaok thun  hu labaih dua tấn jah pablei tabiak ka darak pasar di dom tỉnh Ninh Thuận, Bình Thuận, Khánh Hòa, TP Hồ Chí Minh.

Yaom lac raong jah oh njauk lac bruk ngak praong, min meng yaom pablei 450 ribau đồng sa kg jah, mikva hu jien mek tame glaong jang ralo mbang dut haong ngak padai atau raong menuk ada. Urak ini, Hòa Thủy hu jeng labik raong jah di tỉnh Ninh Thuận. Meng jien mek tame glaong, ralo baoh sang labik ini yam tagok ngak meda.

Ong Trịnh Lân brei thau, meng jien mek tame di 4 ribau mét vuông taneh raong jah, nan ye 5 urang anek di ong hu nao bac daa jeng manuac jeng urang. Ong patak pataom hu hasit phun jien, rai diuk di sang ong siam mekre jang dahlau biak ralo.

Dalam thun 2018, xã Phước Hải hu jalan padang “Tổ hợp nghề nghiệp raong jah”, piah daong phun jien, ilamu kỹ thuật, pambak prong mô hình saong peih prong darak pasar, duah labik pablei ka urang nong. Tui ong Nguyễn Hữu Lương, tuk nan meda daong ka urang nong hu mbuan lagaih jang dalam bruk taom gaok Kadung jien daong urang nong di Trung ương Hội piah buh tame peih prong bruk raong jah saong ngak jeng pandap mbang biak karei ka Ninh Thuận./.