Pathau mikva saong taong abih gauk! Dalam tukvak raong katrau Prang, sa trại pajaih  di ban Phan Thiết, tỉnh Bình Thuận ngak iek hu bruk raong katrau pambuak saong menuk glai. Bruk ngak ini hu ba mai kein laba glaong kayua pandar hu abih pandap mbang labaih dalam raong glang jeng yau taneh var ro. Urang vak Việt Quốc daok di ban raya HCM hu kadha vak brei thau ka bruk raong hu kein laba ini    

Labaih 10 thun dahlau,  tuk DL Bình Thuận daok patagok, saai Nguyễn Minh Tâm, daok di xã Thiện Nghiệp, ban  Phan Thiết mboh bruk caong mbang huak di tuai damuai biak ralo. Langiu dom janih kaya ikan ye ralo katrau jeng hu ralo menuac takre, nan ye saai Tâm raong iek katrau Prang dalam bein sang di drei.  

 40 gu pajaih katrau Prang akaok meti hu saai Tâm blei di huyện Củ Chi, ban raya HCM mai. Dom bilan hadei, katrau praong samar, caih ralo, nan ye saai  patagok  tapon hu tal 2.000 gu. Thun bloh, saai Tâm raong iek menuk glai dalam trại katrau, kayua katrau mbang prah pandap mbang haok tabiak gah langiu ralo. Saai Nguyễn Minh Tâm, po trại pajaih ABC mboh menuk glai mbang hu pandap mbang prah tabiak ini:

 “Menuk glai mbang pandap mbang gah ala. Nyu nao duah pandap mbang, katrau ngak laik trun nyu mbang abih. Menuk glai hu pren pacang ruak biak glaong saong yaom kinh tế biak glaong. Kayua yau nan ye, dahlak palih ruah menuk glai raong hong katrau”.

Meng pajaih menuk glai thuần chủng, trại pajaih ABC brei lai thế hệ F1, F2. Drei pajaih jeng khik hu đặc tính sami samar, mbang takik saong pacang ruak ruak glaong. Menuk glai yaok mbang mebaoh jaik 10 baoh, meng hu ấp điện, nan ye menuk caih tabiak diukhu ralo. Tal urak ini abih tih menuk glai di trại ABC hu 500 drei. Raong menuk glai oh abih pandap mbang, kayua hu pandap mbang labaih di katrau, min saai Tâm hu jien mek tame meng menuk glai 20 triệu đồng yaok bilan.

Urak ini, bruk raong katrau pambuak saong menuk glai daok hu peih praong di Phan Thiết ngan saong jaik pluh baoh sang raong. Saai Trương Minh Tuấn po trại katrau 117 phường Phú Tài, lac sa dalam dom baoh sang raong katrau Prang di ban Phan Thiết samar thau bruk raong ini meng trại pajaih ABC.

 “Menuk glai nyu oh kaik gauk hagait saong katrau. Menuk glai mbang gah ala, ndih gah angaok saong mebaoh gah angaok. Nan ye drei pandar hu abih pandap mbang prah tabiak di katrau . Oh abih jien hagait tra, bo drei daok hu menuk glai piah pablei, hu jien mek tame. Sa pandap mbang bo drei hu 2 janih piah pablei ye biak hu kein laba”.

Urak ini, drak pasar blei ralo menuk glai saong katrau di Bình Thuận biak praong. Langiu dom nhà hàng, quán mbang, quán nhậu, quán bu dinh dưỡng, ye ralo ini daok hu dom labik ngak ndam lakhah biak takre. Tui nan, trại pajaih ABC hu pambuak bruk saong dom baoh sang urang nông patagok bruk raong tui jalan gam pabak pajaih gam blei veik abih ralo. Kayua yau nan ye, dom baoh sang raong oh huac bruk pablei tabiak.     

Jeng kayua yau nan, ong Trần Minh Quân, akaok kapul urang nông xã Thiện Nghiệp mboh bruk raong menuk glai saong katrau di trại pajaih ABC biak siam meda patagok hu di xã jeng yau dom labik jaik taphia. Ong Quân lac:

. “Jalan anak tal di kol dahlak lac pachreih ba, daong saai Tâm patagok bruk ini khang jang. Saong daong ka dom baoh sang karei khin patagok bruk ini piah patagok kinh tế baoh sang, pabak ka drak pasar  dom labik DL di  Hàm Tiến - Mũi Né dalam tukvak anak tal”.

Raong katrau pambuak saong menuk glai lac bruk raong barau di ban Phan Thiết, tỉnh Bình Thuận. Kein laba meng bruk raong yau ini biak cambaih laih. Labik DL mbang menyum biak rilo, kayua yau nan ye anak tal bruk ngak ini meda hu jalan  piah tagok khang, tapa nan daong ka ralo urang nông puk palei patagok jien mek tame ka baoh sang./.