Pathau mikva saong taong abih gauk! Nao rah tui bhum taneh Ba Hòn, huyện Hòn Đất, tỉnh Kiên Giang, tal dom palei dalam xã Thổ Sơn labik halei jeng mboh mikva ndom meyai bruk raong limo menek. Tangi sua meng thau lac, bhap bini labik ini peih ngak dự án paglaong rai diuk baoh sang urang ngak nông ngan saong bruk patagok cộng đồng di Heifer (kapul ngak pahala kayua bruk patruh eik patrun kathaot) daong raong limo menek. Meng peih ngak dự án, rai diuk di bhap bini daok hu salih barau. Kadha vak di Lê Sen angaok harak mbao TTXVN:

Xã Thổ Sơn, huyện Hòn Đất (tinh Kiên Giang) hu labaih 15.000 menuac, daok di 6 palei lac Hòn Sóc, Hòn Me, Hòn Quéo, Hòn Đất, Vạn Thanh, Bến Đá. Ini lac xã daok ralo kan kandah, hu ralo bhap bini bangsa Khmer daok. Dahlau daih, rai diuk di bhap bini xã Thổ Sơn ralo meng pagam pambak tame bruk taong cap kaya ikan saong ngak bruk tui bilan. Min urak ini bruk ngak barau ini daong ka mikva hu jien mek tame tani tanat.

Amuk Lê Ánh Tuyết, urang jakar thú y xã Thổ Sơn khan veik, thun 2006, dự án daong limo menek di Heifer daong tuk camereip ka 40 baoh sang, ngan saong 80 drei limo. Hadei di tuk yaok baoh sang taduan mek dua drei limo, sa drei tano, sa drei binai, limo menek hu brei ka dom baoh sang kathaot karei. Tui jalan ngak yau nan, tal urak ini tapon limo patagok hu 260 drei di 109 baoh sang.

Brei thau ka dom harei camereip tame bruk raong limo, ong Danh Chí Hơn, palei Hòn Sóc hadar veik, dahlau daih, sang gaok kan kandah, njauk nao ngak pah. Kinh tế hu tani tanat jang meng tuk hu daong raong limo menek. Urak ini yaok harei ong jeng nao ngak pah, diuk ong daok di sang yuak hareik brei limo mbang. Dom harei oh hu thei pah, ong daong diuk iek glang limo. Meng jalan ngak ini baoh sang ong Danh Chí Hơn hu jien mek tame kuhria ka rai diuk, hu jien brei anek bhik mbang bac siam jang. Langiu di nan, ong Hơn jeng rabha limo anek ka dom baoh sang karei tuk limo menek. 

Jeng yau ong Hơn, ong Ngô Khạn, palei Hòn Sóc brei thau, meng dua drei limo hu daong tuk camereip, tal urak ini sang ong patagok hu 9 drei. Ong Khạn ndom bui lac, meng dom drei limo ini, urak ini drap ar jeng hu labaih 100 triệu đồng, meyah dahlau daih, ndih mepai jeng oh hu. Saai Danh Hải, sa dalam 40 baoh sang akaok meti di xã Thổ Sơn hu taduan mek limo mai raong ndom lac, dự án daong limo menek lac biak siam. Dahlau daih, tuk oh hu bruk ngak, ayut sahabat bhian pataom gauk menyum alak abih rilo jien padai. Min urak ini, hu limo, saai brei iek glang limo, yuak hareik oh hu tukvak pataom gauk. Bruk hu mbaok tame dự án hu rik daong patagok kinh tế baoh sang saai.

Ndom ka bruk daong di karja palei ngan saong urang raong, amuk Lê Ánh Tuyết, urang jakar thú y xã Thổ Sơn brei thau, piah daong ka mikva raong limo hu kein lagaih, yaok thun, urang jakar thú y xã nao tal dom palei pato pasram ka dom baoh sang bhap bini ilamu raong limo; peih bruk klauk jru pacang cakak jit ruak ka tapon limo. Taphia di nan, bhap bini hu tacei pato pandar khak limo piah buh ka phun pala, takik pandar khak hóa học, patak pataom phun jien. Taphia di nan, karja palei jak ba bhap bini padang kapul pambuak bruk raong limo menek. Kapul ngak bruk tui jalan raong riêng lẻ, min bhian klah rabha ilamu raong glang, pacang cakak jit ruak.   

Meng kein lagaih yau nan, bruk raong limo hu iek lac jalan patagok kinh tế di ralo baoh sang urang nông xã Thổ Sơn. Bruk raong limo menek dak harei dak salih barau pajaih limo, padang bhum raong glang chất lượng glaong, taphia di nan rik daong ngak brei hadah hadai jang ka xã bhum atah bayah labik ini. Điện, jalan mbak, sang bac, blai hu padang ngak siam, abih di nan lac jalan meng pasak xã nao tal palei Vạn Thanh saong Hòn Quéo barau ngak bloh, ngak brei salih barau gah kinh tế - XH. Thun 2016, kinh tế di xã tagok siam, an ninh, trật tự hu khik kajap, rai diuk bhap bini hu salih barau./.