Pathau mikva. Meng pandar công nghệ barau dalam raong glang bo trang trại menuk di saai Vũ Yên Sơn, xã Công Hải, huyện Thuận Bắc, tinh Ninh Thuận takik hu jit ruak.

Hadei di tuk luai ngak lin mai veik sang, thun 2005, saai Vũ Yên Sơn buh jien tame peih trang trại raong menuk, jaik 1000 drei, saong yaom jien tuk camereip jaik 300 triệu đồng. Hu ilamu meng bruk raong menuk, saai blei vak mai raong gac piah mek panak raong atah. Hadei di jaik 10 thun, trang trại di saai urak ini patagok jang, praong jaik sa ha, hu 5000 drei menuk, 11.000 drei vak, jeng raong mek baoh. Yaok mbang mek hu 90% duk saong menuk, cim vak (jaik 4.500 baoh menuk, 9.900 baoh vak), tui yaom pablei di darak, yaok bilan jien mek tame hu labaih 300 triệu đồng, saai daok ba bruk ngak ka 4 -5 urang ngak dalam palei saong jien bilan tani tanat.

Yaok ribau drei menuk dalam trang trại oh menyum ia meng dom máng yau dom trang trại karei, bo menyum meng dom van ia tự động, tuk menyum, menuk nyu caoh tame dom van ia, tapa nan nyu pacang patakik bruk njom mbak jit ruak. Thun 2008, trang trại di saai hu mintri ngak nông saong patagok palei pala daong brei hệ thống langyah khak vi sinh ralai eng. Meng nan, bruk raong glang di saai dak hu mbuan lagaih jang. Siam lagaih di hệ thống ini ba mai oh takik: nyu tự động ngak brei khak ralai eng, tiệt trùng dom vi sinh vật oh siam; oh mbau, langyah bruk ô nhiễm môi trường; meng nan nyu pacang hu dom ruak njom mbak, ruak jalan tung pruac dalam menuk ada. Langiu di nan, tuk pandar hệ thống ini, khak menuk ada ralai eng ngak jeng janih yau aih kayau saong janih ini buh ka phun cảnh biak siam. Meng iek glang njauk ilamu kỹ thuật, pandar công nghệ dalam raong glang nan ye dalam dom thun tapa, trang trại di saai oh hu jit ruak. Yaok thun, trang trại saai pabak yaok ribau baoh menuk, baoh vak ka darak pasar.  

Saai Vũ Yên Sơn khan lac: Tuk camereip oh ka hu ialmu, eng drei ruah duah, bac megru saong praong di abih nan lac brei hu hatai caong ngak kaya meda, gam saneng, gam ngak, tari tarieng saong kham merat ngak. Ngak kinh tế trang trại jak jeng, langiu dom bruk njauk ngak, urang raong glang brei hu ilamu palih ruah anek pajaih saong sangka tal bruk klauk vacxin njauk tukvak. Anak tal, saai brei peih praong trang trại saong ba dom công nghệ barau tame raong glang piah mek hu kein laba glaong di abih./.