Haleik lac sa janih pandap mbang biak siam brei kubao limo. Langiu di nan, hèm bia, bã rượu, hu lượng đạm meng 26 – 32%. Hèm bia gam hu ralo đạm, gam hu ralo năng lượng nan ye meng lavik mai hu pandar piah raong limo, pabui, daong patrun jien raong saong tapol limo, pabui cakrok prong samar. Hèm bia daok hu pandar piah raong palimek pabo. Daa mikva saong taong abih gauk duah thau bruk raong pabo tui jalan palimek meng hèm bia di sa-ai Huỳnh Nguyên Đăng daok di xã Phước Thuận, huyện Ninh Phước, tỉnh Ninh Thuận.

       Bruk raong pabo palimek meng hèm bia di sa-ai Huỳnh Nguyên Đăng daok di palei Phước Khánh, xã Phước Thuận, huyện Ninh Phước hu mong yau sa  bruk ngak bahrau, daong ka pabo praong samar, tagok kilo yaom lac bilan pandiak.

Sa-ai Huỳnh Nguyên Đăng hu pandar hèm bia piah raong pabo palimek. Akaok mereip, sa-ai raong 150 drei pabo palimek tui jalan brei mbang hareik haong hèm bia. Hadei di 3 bilan raong iek, tapol pabo di sa-ai praong siam, takik ruak, trọng lượng tagok meng 3 – 4 kg dut haong jalan raong meng kan. Meng jak  jeng tuk akaok mereip, sa-ai Đăng peih prong trang trại saong patagok tapon pabo meng 150 drei tagok 700 drei. Anak tal, sa-ai meda padang sa trang trại raong pabo palimek meng hèm bia jaik 3.000 drei, piah grap tanat bruk pablei tabiak saong ba bruk ngak ka mikva dalam palei. “Meyah hu mbuan laghaih ye drei meda peih prong mô hình ini tagok jaik 3.000 drei piah grap tanat bruk pabak ka darak pasar. Ka dua drei pandar pandap mbang labaih di pabo, dreingak 2 danao raong ikan piah tuk halei dalam van pabo jeng hu máng pandap mbang hacih, pandap mbang labaih nan drei raong menuk, ada saong dua danao ikan, daok khak di nyu biak grap tanat  saong drei daok roh duah pala saong pabak njam hacih ka bei gon". 

     Tui sa-ai Huỳnh Nguyên Đăng, bruk raong pabo palimek meng hèm bia meda daong ka urang raong glang takik pambak tame langik tasik; trun 50 - 70% jien pah urang yuak hareik saong blei pandap mbang tinh; taphia di nan, trọng lượng pabo tagok meng 20 – 30% dut haong jalan raong meng kan; balau  jangaih mekre saong jalan tung pruac cakrok siam nan ye takik njauk jit ruak. Bruk pandar hèm bia piah raong pabo palimek di sa-ai Huỳnh Nguyên Đăng hu mong yau sa jalan nao bahrau, pandar pandap mbang hu di puk palei, yaom biar, trun phụ thuộc tame pandap mbang hijao, min pabo jeng praong samar, drah tagok kilo, tapa nan, ba mai kein laba glaong ka urang raong glang. Ong Lê Văn Duông, urang jakar gah ngak nong xã Phước Thuận, huyện Ninh Phước - Ninh Thuận brei thau, njauk pambak prong bruk raong pabo meng hèm bia. "Meyah pambak prong bruk raong pabui meng hèm bia ini nyu patak pataom mblang taneh pala hareik biak ralo, kayua lac urak ini taneh di ini pala hareik daok biak takik, nan ye njauk pambak prong bruk raong pabo palimek meng hèm bia, kayua pandap mbang ini biak siam, meyah khaol drei raong rilo, meng 50 tal 300  drei ye mblang taneh pala hareik oh ginup ka nyu mbang nan ye njauk nao duah hèm bia mai brei ka pabo mbang nan lac biak siam, samar tagok kilo”

          Bruk pandar hèm bia dalam raong pabo palimek di sa-ai Huỳnh Nguyên Đăng hu mong yau sa jalan nao bahrau, pandar pandap mbang hu di puk palei, yaom biar, trun phụ thuộc tame pandap mbang hijao, min pabo jeng praong samar, drah tagok kilo, ba mai kein laba ka urang raong glang./.