Rija Negar lac rija uan raok thun birau di urang Cam daok di dua tỉnh Ninh Thuan saong Binh Thuan.  Rija Negar hu bhap bini Cam peih ngak dalam dua harei lac  harei Jip saong harei Suk di adit akaok bilan tha saka Cam, bhian lacbilan 4 saka ia harei, lacc tuk  langik bhian bhang pandiak piah likau po yang chraong daong brei hajan siam, ngin lagaih ka mikva pala drak. Adat cambat ngak  Rija jeng brei mboh hatai jia khang tame langik tasik, taneh riya  saong  hatai caong khin di bhap bini ka sa raidiuk trei sir, haniem phol. Hadei di ini lac kadha vak di Ái Nghiêm, urang vak di Rayo sap ndem Viet Nam daok ngak bruk di ban raya Ho Chi Minh brei thau ka Rija Negar di urang Cam daok di tinh Ninh Thuan: 

Yaok thun tal bilan 4 saka ia harei, mikva dom palei Cam di tinh Ninh Thuan peih ngak Rija Negar. Mikva jak gauk rik jien blei sa drei pabe, klau drei manuk saong rik alak, brah, dom pandap karei karei piah ngak Rija akok thun ka palei drei. Amuk Đàng Thị Hận daok di palei Caklaing My Nghiep, ban sit Phuoc Dân, huyen Ninh Phuoc, tinh Ninh Thuan brei thau: Tal Rija akok thun, sang muk blei hasit alak, dua baoh manuk, tha dhi patei, kamang, baoh kayau, hala paneing, bingu cakmang…ba mai labik ngak rija piah paling yang:

Rija Negar rah tabiak dalam dua harei nan lac tame di harei Jip saong tabiak di harei Suk. Adat rah tabiak dalam sa baoh kajang, urang dang tabiak ngak rija nan lac ong Ka-ing, ong Meduon, langiu di nan daok hu urang urang taong ginang, yuk saranai tra. Dalam harei camereip tame Rija Negar lac adat paling yang birau. Pandap paling yang hu thon hala, alak, baoh manuk, ndiuk, patei, manuk…Tuk sap ginang, sap Saranai yava tagok, lac tuk tame Rija, ong Ka-ing tamia da-a yang trun. Tuk nan, ong Medoun tangin gam pah baraneng gam daoh da-a dom po yang mai saong Rija. Ndem ka adat ngak Rija Negar, ong Meduon Đành daok brei thau lac: " Rija Negar hu meng kan mai, anek taco ngak tui...."

Harei ka dua, lac harei Suk, ngak adat palao po yang klak. Dalam harei ini, mikva ngak sa drei pabe, tuk ngak ia tut, ia bai. Langiu di nan daok hu salao lisei, alak, hala paneing, kamang pandaih, bingu, baoh kayau, dalam nan oh kurang hu baoh dalim ka yang Cei Dalim, saong bingu cakmang ka Po Nai Tang.

Tuk ong Me duon daoh da-a yang, ong Ka-ing tamia, yaok sa ragam tamia jeng da-a sa po yang.    ( Nền nhạc…)    Tamia Po Tang Haok, ong Ka-ing cuk ao bhong, tanjiak kak kaok bhong, tangin pan mbaik tabau tamia vah ghaiy khang katang yam tapa dom riyak praong hangin khang, jayak angaok tasik praong. Tamia Cei Kathun, ong Ka-ing pan havey, tamia ndik thaik nduac yau patao tabiak nao taong mesruk kalin. Min tuk tamia Po Nai Tang, ong King cuk khan ao mbong, tangin pan tadik tamia hnjol njac, laman lamuac.  Mikva mai iek biak chreih chrai tuk ong Ka-ing tamia juak apui Po Hanimpar, takai saoh jauk tagok mbuk apui daok khuah piah padam pui dalam sap ginang taong samar saong sap preo ahei ahei…di urang dalam palei. Padam nao dalah apui hu makna yau padam nao dom pandiak bhang tua riya di bilan 4.

Tamat Rija Negar nan lac adat palao dua rup menuac (ieu lac SALIH) hu mbeik ngak meng tapung brah.  Salih hu ong Ka-ing ba palao trun ia kraong yau salih ka bhap bini dalam palei ba tui dom ruak kik, pandik  harao, dom kanjah jhak di thun klak nao, ba mai ka urang dalam palei dom siam mekre, patuah jamo, hajan siam, ngin lagaih, ngak hamu hu padai ngak apuh hu tangei dalam thun birau./.