Klak rilo hareik ngak jhak ka labik công cộng saong mbaok meta di đô thị

Biar harei mai, dua pabah mbang tame mblang bein Lê Thị Riêng di Quận 10, rilo pandap jao hu parang tabiak pablei. Meng jalan Trường Sơn tapa pabah mbang tame mblang bein labaih pluh mét min hu tal 3,4 labik pablei pandap jao; nan oh ka ndem tal gah anak mbaok mblang bein Lê Thị Riêng, di jalan Cách mạng bilan 4 jeng pablei pandap jao bak. Sa-ai Trần Thị Lý saong Vũ Thị Nhung daok Quận 10 min bhian tal công viên pasram thể dục ka sambai, brei thau: “Pandap jao pablei bak yau nan ye mblang bein oh hu laneing lanoi. Tame mblang bein oh mboh sambai. Khol dahlak caong khin dom jabat chức năng  brei ngak yau habar  piah ka urang hu labik  njauk tui quy định hu haci hacih, tani tanat. Caik yau ini mboh nyu nerak tachrauk lo.”

Sa-ai Vũ Thị Nhung jeng daok di Quận 10 khan lac:“ Karja drei peih ngak, công an atau dân phòng ramik ngak ka nyu siam, meyah oh ngak, ye akaok jalan, pabah mbang tame mblang bein urang pablei bak, mbang menyum klak rilo hareik, jhak lo”.

Rilo mblang bein karei di ban ray HCM yau mblang bein Hoàng Văn Thụ, mblang bein Gia Định...jeng mboh pablei rilo pandap, pacang meta oh maong mboh jalan, oh mekre đô thị…Di jalan Đặng Văn Sâm, quận Gò Vấp, peih jalan birau tapa Công viên Gia Định piah takik gar jalan, bruk pablei pandap jao di dua gah jalan nyu ngak kan bruk nao mai, mblang bein oh mekre. Gam saong dom pandap jao lac radaih di tuai damuai padeih tapen jalan meblak tame dom radaih pablei pandap, kanya pandap naong jao…daok vỉa hè mblang bein njauk urang lih mek caik gaik, oh daok jalan nao mai hu. Sa-ai  Dương Đức Quang nao mai labik ini, duh hatai lac: “ Meng harei ngak jalan birau ye mboh hu ye. Page hu dua radaih. Biar harei ye rilo jang, melam dam dara mbang klak hareik brei  urang puh ramik .”

Mblang bein dalam đô thị lac labik brei ka bhap bini me-in sambai, lac labik piah bhap bini hu không gian hijao di đô thị, saong daok lac labik khik ramik alam langik tasik. Yau nan min, urak ini rilo mblang bein di Ban raya HCM  daok jeng labik ka urang pablei pandap jao lih tame ngak nerak lavang đô thị, pambak tal bruk mein sambai di menuac sia pak mblang bein. Piah mea lanagyah hu bruk ini, urang ilamu gah đô thị Hoàng Minh Trí, dahlau diah lac Phó Viện trưởng Viện roh duah saong patagok Ban raya HCM mboh lac, siam di abih lac ban raya brei duah thau hatai caong khin di bhap bini, duah thau ka xã hội di dom gah piah duah dom labik pablei tani tanat, lagaih di công viên. Meyah ramik labik pablei pataom nan lac njauk brei ngak, piah patrun patakik nerak, khik hu siam mekre vỉa hè saong jalan mbak nao mai ye lac biak siam, min njauk duah thau cambaic dom labik nan.

Biak di nyu yaom lac hu rilo jalan ngak, min dom thun tapa, Ban raya HCM jeng oh ka ramik hu bruk pablei pandap jao bak mblang bein. Pandap pablei jao daok ngak ka rilo mblang bein nerak tachrauk, srau kadau, oh mekre meta …Yau nan min, pandap pablei jao jeng lac bruk ngak mbang duah jien di rilo baoh sang,  nan ye ban raya njauk samar hu jalan ngak ka nyu lagaih, caik hatai tal bruk ngak mbang duah jien di dom baoh sang pablei salih saong bayar veik njauk bruk ka mblang bein ./.

Urang lang: Ái Nghiêm - 20/03  09:09:37