Rilo sang bac đại học di karja daok di ban raya HCM hu brei thau bruk pilih ruah saih bac ka thun bac 2020-2021. Gam haong nan, sang bac jeng brei thau ka yaom jien bac bo saih bac bahrau  njauk buh tame tuk tame bac. Mboh lac yaom jien bac jeng tagok. Dalam nan, bac gah prein yava, iek ruak, jru tavao tagok biak glaong, ngak brei menuac sia tatuak drei saong biak duh hatai.

Hu adei kumei daok bac di sang bac caga tame Đại học TPHCM saong hatai caong bac gah y khoa dalam thun ini, sa-ai Dụng Toàn Thắng, palei daok di Bình Thuận pachreih tui bruk tagok yaom jien bac piah pabak ka bruk paglaong asal pato pakai. Min kayua sang ngak nong, jien duah hu pagam pambak tame bruk ngak nong nan ye sa-ai biak duh hatai:Ngak nong pagam pambak tame langik tasik nan ye jien duah hu oh tani tanat. Tui yaom jien duah hu di sang dahlak urak ini ye meda gaok kan kandah tuk nduac jien bac saong jien mbang huak yaok harei di adei dalam luac tukvak bac megru.

Tui yaom jien bac bahrau meng 30 – 70 triệu đồng yaok thun bac, dalam tuk thun bac 2019 lac 13 triệu đồng sa thun, pandar ka taong abih gah bac, bruk tagok yaom jien bac di sang bac ĐH Y dược ban raya HCM hu menuac sia biak caik hatai sangka.

PGS.TS Nguyễn Ngọc Khôi, akaok jabat pato pakai – sang bac ĐH Y dược ban raya HCM brei thau: yaom 13 triệu đồng dahlau daih oh ginup piah pato pakai 1 bác sĩ, binah daok veik hu kadung jien karja pabak tame. Min meng thun ini, karja oh buh jien tabiak brei sang bac tra, nan ye sang bac brei kuhria njauk, kuhria ginup yaom jien pato pakai.

PGS.TS Nguyễn Ngọc Khôi jeng khan lac, sang bac meda daong abih drei ka dom saih bac kan kathaot bac megru naih joi. Sang bac hu caik tabiak 800 pok jien bac yaom abih tih labaih 15 tỷ đồng, saong meda hu jaik 37% saih bac hu pilih ruah tame sang bac thun 2020 hu taduan jien bac: “Sang bac tuk halei jeng caong lac dom saih bac gheih di abih, naih joi di abih tame bac di sang bac, kayua nan lac angan je di sang bac meng kan mai. Min kadha nan oh hu makna lac kol drei pabak abih jien bac ka saih bac. Kayua oh hu sang bac halei eng drei ginup jien padai piah ngak hu bruk nan.”

PGS.TS Nguyễn Minh Thuyết, dahlau daih ngak Phó Chủ nhiệm UB ilamu, pato megru, dam dara, uraniah di Quốc hội mboh lac, bruk khik bao cấp pato pakai đại học dalam tukvak suai lavik lac makna ba tal pato pakai đại học di taneh ia drei takik cakrok duk saong dom taneh ia dalam bhum. Di jaik abih dom taneh ia karei, karja tok bao cấp ka pato pakai bắt buộc, daok lingiu di nan ye urang bac eng drei buh jien tabiak bayar atau klah rabha haong karja. Kayua yau nan ye, bruk tagok yaom jien bac di dom sang bac lac bruk bắt buộc, min njauk ngak tui jalan ba tabiak tui kuhria dahlau:” Dahlak mboh lac dom sang bac Đại học hu quyền tabiak yaom jien bac tui Hukum Pato megru. Jien bac brei pabak hu yaom jien pato pakai. Min dom sang bac njauk kuhri kuhria saong hu jalan ngak lagaih, oh tagok sa mbang bloh biak glaong, oh lagaih haong bruk ngak mbang duah jien dalam taneh ia.”

PGS.TS Nguyễn Minh Thuyết jeng ba tabiak panuac kakei: Dalam tuk rilo sang bac brei tagok jien bac, urang bac jeng njauk sahneng kuhria tani tanat, pilih ruah sang bac saong gah bac ka nyu lagaih haong prein bac di drei, piah tuk bac tamat blaoh meda samar duah hu bruk ngak, saong brei thau pagam pambak tame jien brei ka anek saih, sinh viên mesraiy piah bac megru./.

Urang lang: M.Phương - 13/6/2020