Diuk saong ruak me-ik saradang type 2 jaik 20 thun min labaih 4 thun ini mai ong Đ.H.L umo 65 thun, daok di tỉnh Đồng Tháp hu urang dalam palei khan ka jru  brei ka urang ruak me-ik saradang di sa urang pablei jru daok pak An Giang.  Meng harei menyum jru đông y nan, baoh sang ong uan tabuan tuk mboh darah dalam rup ong tani tanat, oh daok mbang khik rup yau dalau diah. Yau nan min, tukvak jaik di ini, ong mbang oh tame, glaih glar, var drei jan hu anek bik ba tame sang iek ruak Đa khoa Đồng Tháp. Hadei di dom harei iek ruak oh mboh thit, sang iek ruak bayar mai sang, saong dom anek di ong jak gauk ba ame tame Sang iek ruak Chợ Rẫy “jru ruak tui patuah jamo”.

Di Sang iek ruak Chợ Rẫy, urang angan Đ.H.L ruak me-ik saradang nồng độ acid lactic dalam darah glaong jang tanut bhian dalam rup trak, barah rilo labik dalam rup. Urang ruak nan njauk suy thận, kan suak yawa, bruk kalik. Hadei di sa adit hlang darah gam gam, suak yawa meng mac, urang ruak yam tapa tuk jaik metai saong daok hu  patui iek ruak.

Sa urang karei tra lac sa-ai C.T.H umo 41 thun daok di tỉnh Long An jeng hu ba tame Sang iek ruak Chợ Rẫy cấp cứu hadei di 6 thun menyum jru đông y piah jru ruak me-ik saradang. 6 bilan dahlau, urang ruak nao pasang iek prein yawa saong hu gru jru pandar padeih menyum jru đông y kayua menyum suai lavik ngak khut thận. Oh pang panuac kakei di gru jru, sa-ai C.T.H daok menyum jru nan kayua abih takik jien, tok 150.000 đồng sa bilan. Yau nan min, tukvak jaik di ini sa-ai trun kilo, lavang lavaih, glaih glar dalam rup, ba tame Sang iek ruak Chợ Rẫy dom urang gru jru  mboh lac, sa-ai njauk jru mek phenphormin dalam jru iek ruak me-ik saradang.

Bác sỹ Trương Dương Tiển - Akok Khoa Hồi sức cấp cứu Khu D, Sang iek ruak Chợ Rẫy brei thau, dalam dom thun jaik di ini, bruk pandar jru nam iek ruak me-ik saradang dak harei dak ralo di Viet Nam kayua nyu khik saradang dalam darah hu siam. Langiu di nan, janih jru ini mbuan blei hu di dom tiem jru đông y, dom baha hu pablei jru đông y saong abih di nyu nan lac biak lap jien. Dom urang ruak di sang iek ruak gah ala ba tagok mai bhian ruak trak, brei hlang darah gam gam meng daong diuk hu veik,  hu sa urang metai yaom lac dom bac sĩ biak kham merat iek ruak. 

Jru nam bo urang ruak me-ik saradang bhian pandar hu ngak jeng asar rilo sambo màu karei di gauk yau hồng, kanyik katam, hijao, nâu, tui saradang dalam  darah urang ruak. Dom janih jru nan kayua dom urang pablei jru ngak eng meng phun jru dalam bein atau blei mai meng Trung Quốc saong lai tame dom janih yau phenformi, metformin, biguanides - ini lac dom jru khik saradang hu siam min njauk pakauk oh brei pandar  kayua tỷ lệ ruak trak njom acid lactic biak glaong.

Dom bác sỹ kakei lac, urang ruak me-ik saradang brei bhian nao iek ruak di dom cơ sở y tế hu angan je, tui nan brei ngak njauk tui jalan iek ruak bo bác sĩ ba tabiak. Bhap bini juai jia tame dom janih jru tui cambuai urang oh thau meng halei mai atau dom janih pandap chức năng kayua oh thau hu dalam dom janih jru, pandap chức năng nan hu janih pakauk ha-oh, atau hàm lượng glaong tapa tanut brei pandar ngak jhak tal prein yawa ha-oh./.

Urang lang: A.Nghiêm -14/5/2020