Puh ramik hacih sa-at alam môi trường, langyah dom sruh jit sit, oh caik ka jit pambak praong

Nai Lâm Thị Nhàn, sang daok di phường Xuân Khánh, quận Ninh Kiều brei thau, meng akaok bilan hajan tal urak ni, yaok baoh sang hu gah y tế gam saong dom kapul pak ni bhian khan brei thau ka bruk pacang caga jit ruak pandiak tabiak darah; urang jaka y tế hu mai puh ramik hacih saat, pruh jru pametai anek ruak. Di dom labik bhap bini daok, bhap bini jeng biak pachreih tui, abih di nyu nan lac oh caik pandap padang ia dalam sang lac palagaih ka jamaok caih nek pambak ruak pandiak tabiak darah. Nai Nhàn ndom lac: “Ramik hacih saat gam gam, yaok harei njauk uak  thur mur saong oh caik ka ia kandong veik. Pagap yau tuk rao panyin jam ye di gah ala hu pakô pandok ia saong ba nao tuh klaak chip. Sang danaok jeng yaok harei uak piah oh hu jamaok. Dalak jeng bhian pandar jru pametai jamaok pruh dalam sang.

Meng akaok thun tal urak ni, gah y tế dom pakat di ban Cần Thơ hu peh rilo mbang khan brei thau ka bruk pacang caga jit ruak pandiak tabiak darah di dom tinh, ban; peih dom tal pasram piah paglaong hatai saneng pacang caga jit ruak ka dom urang jaka y tế piak jhul kadun likuk jit ruak. Tui yaok pataom di pasak pacang ruak kik ban Cần Thơ, meng akaok thun tal urak ni, dalam ban hu labaih 530 urang njom ruak pandiak tabiak darak, trun labaih 240 urang dut saong vaktu di thun dahlau saong ka oh mboh urang halei matai. 

Min, dalam 9 quận, huyện di ban Cần Thơ hu 2 quận, dom urang njom ruak pandiak tabiak darah tagok glaong dut saong vaktu ni thun dahlau, nan lac quận Thốt Nốt hu 117 urang saong quận Ô Môn lac 79 urang. Anak bruk yau nan, gah y tế 2 quận Thốt Nốt saong Ô Môn daok jhul tagok khang bruk pathau khan, jak ba bhap bini puh ramik hacih sa-at alam môi trường, langyah dom sruh jit sit, oh caik ka jit pambak praong. 

Ong Trần Văn Tuấn, Aakaok bilik pacang caga ruak njom mbak - Kiểm dịch y tế dunya, di pasak pacang ruak kik ban Cần Thơ brei thau, urak ni lac bilan hajan, lac tuk vak lagaih ka jamaok vằn caih nek tabiak njom mbak ruak pandiak tabiak darak. Kayua yau nan ye, gam saong bruk pathau khan, tacei pato ka bhap bini pacang caga jit ruak, gah y tế pasang iek catang dom urang ruak dalam ban piah hu jalan langyah samar drah dom sruh jit. Ong Trần Văn Tuấn ndom lac: “Khol drei jhui iek lap bo njauk pasang iek catang dom urang njom ruak yaok harei. Tal bilan hajan, bhap bini bhian pandar dom pandap caik ia, kayua yau nan ye dom pandap ni njauk gum ka nyu sin viek, atau palao ikan oh caik ka jamaok caih nek tabiak. Bhap bini hu thau ka jalan pacang caga ruak pandiak tabiak darah,  min bruk ngak jeng ka oh hu siam lagaih. Kayua yau nan ye, ngak habar piah ka yaok urang meng thau tapa  ngak piah ba gauk pacang caga jit ruak hu siam makre jang.”         
Bác sĩ chuyên khoa 1 Nguyễn Thành Lập – akaok jabat Nghiệp vụ y, Sở Y tế ban Cần Thơ brei thau, meng akaok thun, Sở hu pato tacei pasak pacang ruak kik ban paglaong bruk ngak hacih saat alam, pacang caga jit ruak piah khik ginup prien yava ka dom urang yau ye urang taha saong uranaih. Gam tui di nan,  y tế ieu kakei sang iek ruak uranaih ban Cần Thơ peih dom mbang ginum baai, sinh hoạt chuyên đề, pasram bruk pasang iek saong iek glang dom ruak njom mbak, dalam nan praong abih lac bruk pacang caga ruak pandiak tabiak darak, abih di nyu nan lac bruk khau tin saong ba tabiak jalan taong ruak ka dom urang ngak gah y tế di sang iek ruak saong gah y tế cơ sở: “ Sở y tế pambuak haong Công ty Cổ phần jru tavao Hậu Giang padang ngak dom kadha di mangaok dom Pano, tờ rơi…  caik di dom labik hu bhap bini daok rilo saong daok salih dom jalan pathau khan. Daok ngan haong gah pato magru, anek saih ye dalam vaktu padieh hè yaok thun hu dom kadha pandar ka cei gru, nai gru. Thun ni, Sở y tế jeng kakei pasak pasang iek ruak kik ban Cần Thơ patui bruk brei thau ka ilamo pacang caga ruak pandiak tabiak darak ka dom cei gru, nai gru”.

Langiu di ruak pandiak tabiak darak, meng bilan 9 tal bilan 12 yaok thun jeng lac tuk vak tabung glaong di ruak tangin takai camboi, dalam tuk gah y tế jeng daok kham marat pacang caga jit Covid-19. Kayua yau nan ye, piah plaih bruk “jit kateik tagok jit”, bruk hu makna praong di abih lac yaok rahra oh njauk maong bier, iek lap./.

Urang lang: Thu Thảo – 17/08